Mi Luk Plante Brata Mo Sista Oli Holemstrong Long Jehova

Mi laf from mi luk fren blong mi olsem se hem i no man we i stap go long jos. Nao mi askem se: “?Yu yu save wanem long saed blong Baebol?” Be hem i no kwik blong ansa. Biaen hem i talem long mi se mama blong hem i wan Witnes blong Jehova, mo hem i lanem sam samting long hem. Mi wantem save moa, taswe mi askem hem blong i gohed blong tokbaot sam moa samting long mi.

Mitufala i storian klosap ful naet. Mo fren blong mi i talem se Baebol i talem se Setan i rula blong wol ya. (Jon 14:30) Maet yu yu save trutok ya long ful laef blong yu, be long mi, hemia i wan niufala samting mo mi wantem save moa. Oltaem mi harem oli talem se wan God we i kaen i rulum wol ya. Be mi luk se hemia i no laenap nating wetem wanem we i stap hapen long laef blong ol man. Mi gat 26 yia nomo, be mi luk plante samting we i mekem mi harem nogud.

Papa blong mi i bin wok olsem wan paelot long United States Air Force. So taem mi pikinini, mi savegud se i posibol blong i gat wan bigfala faet, from we ol ami oli rere enitaem nomo blong sakem bom. Taem wo long Vietnam i stat, mi stap skul long yunivesiti long Kalifonia. Mi joenem ol studen blong mekem ol protes. Ol Polis oli ronem mifala wetem ol nalnal blong olgeta, mo mifala i ron. Mifala i no save pulum gud win mo lukluk gud from oli sakem ol gas long mifala. Hemia i wan taem blong trabol mo ol man oli rebel. Oli kilim ol lida blong politik, i gat ol protes, mo ol man oli mekem trabol. Evri man oli gat ol defdefren tingting long saed samting we oli mas mekem. Evri samting i paspas we.

Long 1970, mi stat blong wok long not kos blong Alaska mo mi winim plante mane. Biaen mi go long London, mi pem wan moto mo mi draev i go long saot, we mi no save weples blong go long hem. Afta long sam manis, mi kasem Afrika. Taem mi stap go, mi mitim ol man we oli wis se oli save ronwe long ol problem blong olgeta.

Ol samting we mi luk mo harem i mekem mi trastem tijing ya blong Baebol, se wan rabis spirit nao i stap kontrolem ol samting long wol ya. Be mi mi wantem save se, ?sipos i no God we i kontrolem wol ya, hem i stap mekem wanem?

Be afta long sam manis, mi faenem ansa blong kwestin blong mi. Sloslo mi stat blong save mo lavem plante man mo woman we nomata wanem situesen oli stap gotru long hem, be oli pruvum se oli holemstrong long tru God.

NOT BLONG AEALAN—“PLES BLONG BOM MO BOLET”

Taem mi gobak long London, mi kontaktem mama blong fren blong mi mo hem i givim wan Baebol long mi. Biaen, taem mi go long Amsterdam long Netalan, wan Witnes i luk we mi stap sidaon aninit long wan pos laet, mi stap ridim Baebol mo hem i halpem mi blong lanem moa. Afta, mi go long Dublin, long Aealan, mo mi faenem branj ofis blong ol Witnes blong Jehova. Mi noknok long doa mo hemia nao olsem wanem mi mitim Arthur Matthews, wan brata we i waes mo i gat ekspiriens. Mi askem blong stadi Baebol, mo hem i agri blong stadi wetem mi.

Mi intres tumas so mi stat blong stadi, mo mi wantem tumas blong ridim ol buk mo magasin we ol Witnes blong Jehova oli wokem. Be long sem taem mi ridim Baebol. !Mi mi glad tumas! Taem mi go long ol miting, mi luk se ol pikinini oli save ansa blong ol kwestin we ol man oli traem blong save ansa blong hem blong plante handred yia olsem: ‘?From wanem ol nogud samting i stap hapen long wol? ?God hem i hu? ?Wanem i hapen long man taem i ded?’ Evri fren blong mi oli ol Witnes blong Jehova, from we mi no save eni man nating long kantri ya. Olgeta oli halpem mi blong lavem Jehova mo blong wantem mekem wil blong hem.

Mi baptaes long 1972. Mo wan yia afta, mi stat blong paenia mo mi joenem wan smol kongregesen long Newry, long Not blong Aealan. Mi rentem wan haos antap long wan hil. Long ples ya i gat ol buluk, mo mi stap praktisim ol tok blong mi long fored blong olgeta. Oli lesin gud taem oli stap kakae. Oli no save givim advaes, be oli halpem mi blong lanem olsem wanem blong lukluk ol man taem mi stap givim ol tok. Long 1974, mi kam wan spesel paenia mo mi paenia wetem Nigel Pitt, we hem i kam wan gudfala fren blong mi.

Long taem ya, i gat “plante faet” long Not blong Aealan. So samfala oli singaotem Not blong Aealan se “ples blong bom mo bolet.” Oltaem ol man oli faet long rod, oli sutum ol man, mo oli bomem ol trak. Plante taem hemia ol problem blong politik mo ol relijen. Be ol Protestan mo Katolik oli luksave se ol Witnes oli no joen long politik, taswe oli no blokem mifala blong prij. Plante taem ol man blong haos oli save wetaem mo weples bambae i gat faet long hem, mo oli givim woning long mifala blong mifala i no kasem trabol.

Be yet i gat sam taem we mifala i fesem sam situesen we i denja. Wan dei, mi mo Denis Carrigan, we hem tu i wan paenia, mitufala i go prij long wan taon klosap we i nogat ol Witnes long hem, mo mifala i bin kam wan taem finis long ples ya. Wan woman i talem se mitufala i ol soldia blong Inglan mo mitufala i kam olsem ol spae, maet from fasin blong toktok blong mitufala i no olsem blong ol man Aealan. Hemia i mekem mitufala i fraet. Sipos yu traem blong fren wetem ol soldia yu save kasem trabol from, maet oli sutum yu ded o oli sutum ni blong yu. Taem mitufala i stap stanap aotsaed long kolkol mo wet long bas, mitufala i luk wan trak i kam stop long fored blong stoa we woman ya i stap long hem. Woman ya i kamaot mo i toktok long tufala man we i stap trak mo i stap poentem mitufala. Biaen tufala man ya i draev i kam mo oli askem sam kwestin long mitufala long saed blong bas we bambae i pikimap mitufala. Taem bas i kam stop, tufala i toktok long draeva, be mitufala i no save harem samting we oli stap tokbaot. I no gat ol narafala pasenja, so mitufala i ting se oli stap mekem plan blong kilim mitufala aotsaed long taon. Be hemia i no hapen. Taem mitufala i kamaot long bas mi askem long draeva se: “?Ol man ya oli askem wanem long saed blong mitufala?” Nao hem i se: “Mi save se yutufala i hu, yutufala i no nid blong wari, yutufala i sef.”

Long 1976, long wan bigfala asembli long Dublin, mi mitim Pauline Lomax, hem i wan spesel paenia we i kam long Inglan. Hem i wan naesfala sista we i bigman long saed blong spirit, mo i gat tingting daon. Hem mo brata blong hem Ray oli gruap long trutok. Wan yia biaen, mi mo Pau-line i mared mo mitufala i gohed blong mekem wok blong spesel paenia long Ballymena long Not blong Aealan.

Blong sam taem mitufala i mekem wok blong Eria Elda blong givhan long ol brata mo sista long Belfast, Londonderry, mo long sam narafala eria tu we oli denja. Taem mitufala i luk olsem wanem ol brata mo sista oli lego ol giaman bilif, fasin blong no laekem narafala from kala blong skin, mo oli mekem wok blong Jehova, hemia i leftemap tingting blong mitufala. !Mo i sua se Jehova i blesem mo i protektem olgeta!

Mi bin laef long Aealan blong ten yia. Biaen long 1981, oli invaetem mitufala blong go long namba 72 klas blong Gilead. Afta long graduesen, oli sanem mitufala i go long Siera Leon, long wes blong Afrika.

SIERA LEON—OL BRATA MO SISTA OLI HOLEMSTRONG LONG JEHOVA NATING SE OLI PUA

Mitufala i laef long wan haos blong ol misinari wetem 11 brata mo sista. Mifala i serem wan kijin, tri toelet, tu batrum, wan telefon, wan masin blong wasem klos, mo wan masin blong draemap klos. Plante taem oli katem paoa long eria blong mifala we oli no givim woning. I gat plante rat antap long ruf blong mifala, mo long wan storum aninit long haos ya i gat ol kobra snek.

Nating se laef long ples ya i no rili gud tumas, be mitufala i enjoem wok blong prij. Ol man oli respektem Baebol mo oli lesin gud. Plante man oli stadi Baebol mo oli kam ol Witnes. Ol man ples oli stap singaot mi se: “Masta Robert” mo oli singaot Pauline se: “Misis Robert.” Be samtaem biaen, mi stat blong bisi moa long ol wok blong branj ofis mo mi no moa go aot tumas blong prij. Mo ol man oli stat blong singaot Pauline se: “Misis Pauline.” Mo oli singaot mi se: “Masta Pauline.” !Pauline i laekem taem oli singaot mi olsem!

Plante brata mo sista oli pua, be oltaem Jehova i lukaot gud long ol nid blong olgeta, samtaem long ol rod we oli neva tingbaot. (Mat. 6:33) Mi tingbaot wan sista we i gat smol mane we i naf blong pem kakae blong hem mo blong ol pikinini blong hem blong dei ya, be hem i givim evriwan long wan brata we i sik mo i no gat mane blong pem meresin blong malaria. Be long sem dei ya, wan woman i kam we sista ya i no ekspektem, mo i pem sista ya blong i tanem hea blong hem. I gat plante situesen we oli sem mak olsem.

NAEJERIA—LANEM WAN NIUFALA KALJA

Mitufala i stap naen yia long Sierra Leone. Biaen oli muvum mitufala i go long Betel long Naejeria. Naoia mitufala i stap long wan bigfala branj ofis. Mi mi wok long ofis mo mi mekem ol semfala wok we mi mekem long Sierra Leone, be long Pauline, hemia i wan bigfala jenis mo i rili had. Bifo hem i spenem 130 aoa evri manis blong prij, mo hem i gat plante Baebol stadi we oli gohed gud. Be naoia, wok blong hem i blong somap ol klos we oli brok. I tekem taem blong hem i lan long jenis ya, be biaen hem i luksave se ol narafala oli glad long wok blong hem, mo hem i mekem bes blong hem blong enkarejem ol narafala long Betel.

Kalja blong Naejeria i niu long mitufala mo i gat plante samting we mitufala i mas lanem. Wan taem wan brata i kam long ofis blong mi mo i introdiusum wan sista we oli jes akseptem hem blong i kam long Betel. Taem mi go blong sekhan long hem, hem i bodaon klosap long leg blong mi. !Mi mi sapraes tumas! Kwiktaem nomo mi tingbaot tu vas: Ol Wok 10:25, 26 mo Revelesen 19:10. Mi stap tingting se: ‘?Bambae mi talem long hem blong i no moa mekem olsem?’ Be afta mi tingbaot se sipos oli akseptem hem i kam long Betel, hem i mas save ol samting we Baebol i tijim.

Taem mifala i stap gohed blong storian, mi sem we. Biaen mi mekem sam risej mo mi faenemaot se samting we sista ya i mekem, i folem wan kastom we sam man long kantri ya oli stap folem yet. Ol man tu oli stap mekem sem samting olsem sista ya, mo hemia i wan fasin blong soem respek. Hem i no wan fasin blong wosip, mo i gat sam eksampol olsem long Baebol. (1 Saml. 24:8) Mi glad se mi no bin kwik blong toktok, from maet mi talem wan samting we i save mekem sista blong mi i sem.

Long ol yia we i pas, mitufala i mitim plante man Naejeria we oli soemaot se oli gat strong bilif. Wan eksampol hemia Aesea Adagbona.a Hem i lanem trutok taem hem i yangfala, be biaen hem i kasem sik ya leprosi. Oli sanem hem i go long kamp blong ol man we oli gat leprosi mo hem wan nomo i Witnes. Nating se ol man oli agens, be hem i halpem bitim 30 man we oli gat leprosi blong oli akseptem trutok mo hem i stanemap wan kongregesen long kamp ya.

KENIA—OL BRATA OLI GAT LONGFALA TINGTING LONG MI

Long 1996, oli sanem mitufala i go long branj blong Kenia. Hemia faswan taem bakegen we mi gobak long kantri ya, afta long laswan visit blong mi olsem we mi bin tokbaot long stat. Mitufala i laef long Betel. Mo long ples ya i gat plante mangki. Taem ol sista oli karem ol frut, ol mangki ya oli stilimaot long olgeta. Wan dei, wan sista i lego windo blong hem i open i stap. Taem hem i kambak long haos, hem i luk wan famle blong ol mangki oli stap harem gud long ol kakae we i stap long rum blong hem. Hem i singaot bigwan mo i ron i go aotsaed. Ol mangki ya tu oli singaot mo oli jam i gotru long windo.

Mi mo Pauline i joenem Swahili kongregesen. Smoltaem afta, oli jusum mi blong mekem buk stadi, we naoia yumi talem se Baebol stadi blong kongregesen. Be mi no save toktok gud lanwis ya. Taswe mi stadi gud long buk we mifala i yusum, blong mi naf blong askem ol kwestin. Sipos ol brata mo sista oli ansa long prapa tok blong olgeta, bambae mi no kasemsave. !Samtaem mi harem se mi sem! Mo mi sore long olgeta. Be mi sapraes we oli gat longfala tingting mo tingting daon blong letem mi lidim miting.

YUNAETED STET—BILIF I MEKEM MITUFALA I HOLEMSTRONG LONG JEHOVA

Mitufala i stap long Kenia i no bitim wan yia. Biaen long 1997 oli invaetem mitufala blong go long Betel long Brooklyn, New York. Naoia mitufala i stap long wan kantri we ol man oli gat plante samting long saed blong bodi, we i save mekem plante problem i kamaot. (Prov. 30:8, 9) Be nating se i olsem, ol brata mo sista oli soemaot se oli gat strong bilif. Oli no yusum taem mo ol samting we oli gat blong mekem oli kam rij, be oli sapotem gud wok long oganaesesen blong Jehova.

Long ol yia we i pas, mitufala i luk olsem wanem ol brata mo sista oli holemstrong long Jehova, nomata wanem situesen oli stap long hem. Long Aealan, mitufala i luk ol brata mo sista oli holemstrong long Jehova nating se i gat faet. Long Afrika, ol brata mo sista oli holemstrong long Jehova nating se oli pua. Mo long Yunaeted Stet, ol brata mo sista oli holemstrong nating se oli gat plante gudfala samting. !I sua se Jehova i glad tumas taem i luk we ol man blong hem oli soemaot se oli lavem hem, nomata wanem situesen oli fesem!

Ol yia oli pas kwik, “oli pas kwik moa i winim tul ya satel blong ol man blong wivim kaliko.” (Job 7:6) Naoia mitufala i wok wetem ol brata mo sista long wol hedkwota long Warwick, New York, mo mitufala i glad blong gohed blong wok wetem ol man we oli rili lavlavem olgeta. Mitufala i glad tumas blong mekem samting we mitufala i naf blong mekem blong sapotem king blong yumi Kraes Jisas, we i no longtaem bambae hem i blesem olgeta man we oli holemstrong long Jehova.—Mat. 25:34.