Gudfala Advaes: ?Bambae Yu Folem o Nogat?
Sipos yumi jus blong folem ol gudfala advaes, bambae yumi glad long laef blong yumi. Jehova God i save samting ya. Taswe hem i wantem se yumi folem ol advaes blong hem.
Jehova i wantem se yumi gat pis mo yumi glad.
“Mi Jehova, mi God blong yufala, mi nao mi stap tijim yufala blong givhan long yufala, mi nao mi stap lidim yufala long rod we yufala i sud folem. !Mi mi wantem tumas we yufala i lesin gud long ol komanmen blong mi! Sipos yufala i mekem olsem, pis blong yufala bambae i kam olsem reva, mo stret fasin blong yufala, bambae i olsem ol wef blong solwota.”—Aesea 48:17, 18.
God nao i wokem yumi, taswe hem i save beswan rod blong yumi folem. Hem i wantem se yumi jusum blong folem ol advaes blong hem, from we oltaem oli wok gud. Ol advaes ya bambae oli givhan long yumi blong mekem ol gudfala desisen we i mekem se yumi gat pis mo yumi glad.
Ol advaes blong Jehova oli no had tumas blong folem.
“Komanmen ya we mi stap talem long yu tede, hem i no strong tumas long yu, mo hem i no longwe tumas blong yu kasem.”—Dutronome 30:11.
Sipos yumi wantem folem ol advaes blong God, yumi mas jenisim sam tingting mo fasin blong yumi. Be ol samting we Jehova i askem yumi blong mekem oli no had tumas long yumi. Hem i wokem yumi, taswe hem i save samting we yumi naf blong mekem mo samting we yumi no naf blong mekem. Sipos yumi traehad blong save gud Jehova, bambae yumi luksave se “ol komanmen blong hem oli no had tumas blong folem.”—1 Jon 5:3.
Jehova bambae i halpem olgeta we oli jus blong folem ol advaes blong hem.
“Mi, Jehova God blong yu, mi stap holem raethan blong yu, mi nao mi stap talem long yu se: ‘Yu no fraet. Mi bambae mi halpem yu.’”—Aesea 41:13.
Yumi naf blong folem ol advaes blong God from we hem bambae i givhan long yumi. Hem i stap yusum Tok blong hem Baebol blong leftemap tingting blong yumi.
Plante milian man raon long wol oli luksave se taem oli folem ol advaes blong Baebol, laef blong olgeta i kam gud moa. I gud yu gohed blong kasem save moa long ol gudfala advaes we i stap long Baebol. Yu save go long websaet ya jw.org mo ridim buklet ya !Enjoem Laef Olwe! we i fri nomo. Insaed long buklet ya, i gat ol lesen ya:
?Olsem Wanem Baebol i Save Halpem Yu?
Baebol i Givim Hop
?Yu Save Trastem Baebol?
Sipos yu stadi long Baebol, bambae yu luksave se ol advaes blong hem oli stret yet tede, mo “man i save dipen long olgeta oltaem, naoia mo blong olwe.” (Ol Sam 111:8) Taem yumi folem ol gudfala advaes blong Baebol, bambae yumi glad long laef blong yumi. Be God i no fosem yumi blong folem ol advaes blong hem. (Dutronome 30:19, 20; Josua 24:15) Yumi wanwan i mas jus se bambae yumi folem o nogat.