?Olsem Wanem God i Save Fogivim Ol Sin, Bifo We i Gat Ransom?

Jisas i givim laef blong hem olsem wan ransom, mo from blad blong hem we i ron, God i save fogivim ol sin blong yumi. (Efes. 1:7) Nating se i olsem, Baebol i talem se: “God i mekem tingting blong hem i longfala mo i fogivim sin we ol man oli mekem bifo,” hemia bifo we Jisas i givim laef blong hem olsem wan ransom. (Rom 3:25) ?Olsem wanem Jehova i save fogivim ol sin bifo we i gat ransom, mo long semtaem hem i holemtaet rul blong hem long saed blong jastis?

Long taem ya we Jehova i promes blong givim wan “pikinini” we bambae i sevem ol man we oli bilif long hem, long lukluk blong hem, i olsem we hem i givim praes blong ransom ya finis. (Jen. 3:15; 22:18) God i sua gud se long stret taem we hem i makemaot, Boe blong hem bambae i glad blong givim laef blong hem olsem wan ransom. (Gal. 4:4; Hib. 10:​7-10) Taem Jisas i stap long wol, Jehova i givim raet long hem blong fogivim sin blong ol man, nating se i no gat ransom yet. Jisas i mekem olsem from hem i save se praes blong ransom we bambae hem i givim long fiuja, i naf blong pemaot sin blong olgeta.—Mat. 9:​2-6.