?Yumi Save Wanem Long Saed Blong Ol Jajmen Blong Jehova Long Fiuja?

1. ?From wanem yumi talem se yumi stap laef long wan impoten taem?

!YUMI stap laef long wan impoten taem! Evri dei yumi luk we ol profet tok blong Baebol oli stap kamtru. Eksampol, yumi luk we “king blong not” mo “king blong saot” i stap faet agensem tufala, from we tufala i wantem kontrolem wol. (Dan. 11:​40, fut.) Yumi luk we oli stap talemaot gud nius blong Kingdom long plante moa ples raon long wol, mo plante milian man oli jusum blong wosipim Jehova. (Aes. 60:22; Mat. 24:14) Mo tu, yumi stap kasem plante kakae long saed blong spirit “long stret taem blong hem.”—Mat. 24:​45-47.

2. ?Yumi sua long wanem, mo yumi luksave wanem?

² Jehova i stap gohed blong halpem yumi blong kasemsave klia long ol bigfala samting we bambae oli hapen long fiuja. (Prov. 4:18; Dan. 2:28) Yumi sua se bifo we bigfala trabol i stat, bambae yumi save finis ol samting we yumi nid blong save, blong yumi naf blong stanap strong mo joen gud wetem ol brata mo sista long hadtaem ya. Nating se i olsem, yumi mas luksave se i gat sam samting we yumi no save long saed blong fiuja. Taswe long stadi ya, fastaem bambae yumi tokbaot from wanem yumi mekem sam jenis, long ol save we yumi gat long saed blong samting we bambae oli hapen long fiuja. Biaen bambae yumi tokbaot bakegen sam long ol samting we yumi save long saed blong fiuja, mo samting we Papa blong yumi long heven bambae i mekem.

SAMTING WE YUMI NO SAVE

3. ?From wanem yumi gat tingting ya se ol man bambae oli no moa save bilif long Jehova taem bigfala trabol i stat?

³ Bifo finis, yumi talem se taem bigfala trabol i stat, ol man we oli no bilif long Jehova bambae oli no sef long taem blong Amagedon. Yumi talem olsem from yumi kasemsave se stori blong bigfala wota we i ron, i wan profet tok we bambae i hapen long taem blong yumi. Eksampol, long taem blong Noa, taem Jehova i “satem doa” blong bigfala sip, ol man oli no moa save go insaed. Taswe, yumi gat tingting ya se taem bigfala trabol i stat, ol man bambae oli no moa save bilif long Jehova mo stap sef.—Mat. 24:​37-39.

4. ?From wanem yumi no moa talem se ol samting we oli hapen long taem blong Noa i wan profet tok we bambae i kamtru fulwan long fiuja? Yu eksplenem.

⁴ ?I stret we yumi talem se evri samting we oli hapen long taem blong bigfala wota we i ron, i wan profet tok blong tokbaot ol samting we bambae oli hapen long fiuja? Nogat. ?From wanem? From we i no gat wan stret vas blong Baebol we i talem olsem.a I tru se Jisas i tokbaot taem ya we hem i stap, se bambae i olsem “taem blong Noa.” Be hem i no talem se ol samting we oli hapen long taem blong Noa i olsem wan profet tok we bambae i kamtru fulwan long fiuja, olsem taem ya we Jehova i satem doa blong bigfala sip. Nating se i olsem, yumi save lanem lesen yet long stori blong Noa mo bigfala wota we i ron.

5. (1) ?Noa i mekem wanem bifo we bigfala wota i ron? (Hibru 11:7; 1 Pita 3:20) (2) ?Olsem wanem wok blong prij we yumi mekem tede i sem mak long taem blong Noa?

⁵ Taem Noa i harem woning blong Jehova, hem i soemaot se hem i gat bilif taem i bildim wan bigfala sip. (Ridim Hibru 11:7; 1 Pita 3:20.) Long sem fasin, ol man we oli harem gud nius blong Kingdom blong God oli mas tekem aksen folem samting we oli harem. (Wok 3:​17-20) Pita i tokbaot Noa se hem i wan “prija blong stret fasin.” (2 Pita 2:5) Be olsem we yumi tokbaot long laswan stadi, yumi no save sipos Noa i traehad blong prij long olgeta man long wol bifo we bigfala wota i ron o nogat. Tede, yumi gat strong tingting blong prij mo traem kasem evri man raon long wol. Be nating se olsem, yumi no naf blong prij long evri man bifo we en i kam. ?From wanem?

6-7. ?From wanem yumi talem se bambae yumi no save prij long evri man bifo we en i kam? Yu eksplenem.

⁶ Tingbaot samting we Jisas i talem long saed blong wok blong prij we yumi stap mekem. Hem i bin talemaot se ol man bambae oli talemaot gud nius “long olgeta ples long wol, blong oli witnes long olgeta nesen.” (Mat. 24:14) Profet tok ya i stap kamtru moa tede i bitim bifo. Mesej blong Kingdom i stap long bitim 1,000 lanwis, mo from websaet blong yumi jw.org, plante man raon long wol tede oli save harem gud nius blong Kingdom blong God.

⁷ Jisas i talem tu long ol disaepol blong hem se bambae oli no save “goraon long evri taon mo vilej,” o prij long evri man, bifo we hem i kam. (Mat. 10:23; 25:​31-33) Ol tok blong Jisas oli stret tu long taem blong yumi. Plante milian man tede oli stap long ol ples we oli putum tabu long wok blong prij. Antap moa, plante pikinini oli stap bon evri minit. Yumi mekem bes blong yumi blong talemaot gud nius long ol man ‘long olgeta kantri, traeb, mo lanwis.’ (Rev. 14:6) Be bambae yumi no naf blong talemaot gud nius long evri man raon long wol bifo we en i kam.

8. ?Wanem kwestin we maet yumi stap tingbaot? (Mo tu, yu luk pija.)

⁸ Folem samting we yumi tokbaot, maet yumi wantem save se: ?Olsem wanem long olgeta we oli no gat janis blong harem gud nius bifo we bigfala trabol i stat? ?Olsem wanem Jehova mo Boe blong hem we hem i putumap blong jajem ol man, bambae tufala i jajem olgeta? (Jon 5:​19, 22, 27; Wok 17:31) Stamba vas blong stadi ya i talem se Jehova “i no wantem se wan man i ded.” Be hem i wantem se “olgeta man oli tanem tingting blong olgeta.” (2 Pita 3:9; 1 Tim. 2:4) Nating se yumi save samting ya, be hem i no talem long yumi yet olsem wanem bambae hem i jajem ol man we oli neva harem gud nius. I tru, hem i no nid blong talem long yumi samting we hem i mekem finis, mo samting we bambae hem i mekem yet.

9. ?Jehova i talemaot wanem long yumi?

⁹ Long Baebol, Jehova i talemaot long yumi sam long ol samting we bambae hem i mekem. Eksampol, Baebol i talemaot se Jehova bambae i mekem “ol man we oli no stret” oli laef bakegen, hemia olgeta we oli no gat janis blong harem gud nius mo jenisim fasin blong olgeta. (Wok 24:15; Luk 23:​42, 43) Be naoia, maet yumi gat sam narafala impoten kwestin.

10. ?Wanem ol narafala kwestin we yumi gat?

¹⁰ Olgeta we oli ded long taem blong bigfala trabol, ?bambae oli ded olwe we oli no moa laef bakegen? Baebol i soemaot klia se ol man blong agens we Jehova mo ol ami blong hem oli kilim i ded olgeta long taem blong Amagedon, bambae oli no save laef bakegen. (2 Tes. 1:​6-10) ?Be olsem wanem long ol narafala we oli ded from oli olfala, oli sik, oli kasem wan aksiden, o ol man oli kilim olgeta? (Pri. 9:11; Sek. 14:13) ?Sam long ol man ya, bambae oli stap long grup blong “ol man we oli no stret” we bambae oli laef bakegen long niufala wol? Yumi no save.

SAMTING WE YUMI SAVE

11. Long taem blong Amagedon, ?Jehova bambae i jajem ol man folem wanem samting?

¹¹ Yumi save sam samting we bambae i hapen long fiuja. Eksampol, long Amagedon Jehova bambae i jajem ol man folem samting we oli mekem long ol brata blong Kraes. (Mat. 25:40) Olgeta we oli jajem olgeta olsem ol sipsip bambae oli soemaot se oli sapotem ol tabu Kristin mo Kraes. Mo tu, yumi save se sam long ol brata blong Kraes bambae oli stap yet long wol afta we bigfala trabol i stat, mo bambae oli go long heven jes bifo we Amagedon i stat. Long taem ya we sam brata blong Kraes oli stap yet long wol, i luk olsem se ol man we hat blong olgeta i stret bambae oli gat janis blong sapotem olgeta mo ol wok we oli stap mekem. (Mat. 25:​31, 32; Rev. 12:17) ?From wanem ol save ya oli impoten?

12-13. ?Maet samfala bambae oli mekem wanem afta we “Bigfala Babilon” i lus? (Mo tu, yu luk pija.)

¹² Afta we bigfala trabol i stat, maet samfala we oli luk “Bigfala Babilon” i lus, bambae oli tingbaot samting we ol Witnes blong Jehova oli bin talemaot. ?Olsem wanem? ?Sam long olgeta bambae oli jenisim tingting blong olgeta mo oli bilif long Jehova?—Rev. 17:5; Esik. 33:33.

¹³ Sipos i olsem, hemia bambae i sem mak long samting we i hapen long Ijip long taem blong Moses. Tingbaot se i gat ‘plante narafala man tu’ we oli joenem ol man Isrel blong aot long Ijip. Sam long ol man ya maet oli stat blong bilif long Jehova taem oli luk se ol Ten Panis we Moses i bin talemaot oli kamtru. (Eks. 12:38) Sipos sem samting olsem i hapen afta we Bigfala Babilon i lus, ?bambae yumi gat tingting ya se i no stret we oli joenem yumi jes bifo we faet blong Amagedon i stat? !Nogat! Yumi wantem folem fasin blong Papa blong yumi long heven we hem i wan “God we i gat sore mo i kaen, i no save kros kwik, mo fasin blong hem blong lavem man oltaem i bigwan tumas, mo hem i tok tru.”b—Eks. 34:6.

14-15. ?Blong kasem laef we i no save finis, hemia i dipen long taem we man i ded long hem, o ples we hem i laef long hem? Yu eksplenem. (Ol Sam 33:​4, 5)

¹⁴ Samtaem, yumi harem ol narafala oli talem se, “I moa gud sipos wan memba blong famle blong mi i ded bifo we bigfala trabol i stat, olsem nao bambae hem i save laef bakegen.” Ol man we oli talem ol tok olsem oli gat wan rong tingting. From we blong wan man i kasem laef we i no finis, hemia i no dipen long taem we hem i ded long hem. Jehova i wan gudfala jaj, mo oltaem ol desisen blong hem oli stret. (Ridim Ol Sam 33:​4, 5.) Taswe, yumi save sua gud se “Jaj blong olgeta man long wol” bambae i mekem samting we i stret.—Jen. 18:25.

¹⁵ Yes, blong man i kasem laef we i no save finis, hemia i no dipen long ples we hem i laef long hem. Jehova bambae i neva jajem plante milian man we oli stap long ol ples we oli neva harem mesej blong Kingdom, se oli olsem ol “nani.” (Mat. 25:46) Jehova we i gudfala jaj blong olgeta man long wol, i kea moa long ol man ya i bitim yumi. Yumi no save samting we Jehova bambae i mekem long taem blong bigfala trabol. Maet sam long ol man ya bambae oli gat janis blong save Jehova, bilif long hem, mo sapotem hem, taem hem i mekem olgeta man long wol oli save nem blong hem.—Esik. 38:16.

16. ?Yumi save wanem long saed blong Jehova? (Mo tu, yu luk pija.)

¹⁶ Taem yumi stadi long Baebol, yumi kasemsave se Jehova i tinghae long laef blong ol man. Hem i givim laef blong Boe blong hem blong mekem se yumi evriwan i save gat janis blong laef olwe. (Jon 3:16) Yumi evriwan i haremsave se Jehova i lavem yumi tumas. (Aes. 49:15) Hem i save savegud yumi wanwan mo nem blong yumi. Taswe sipos yumi ded, hem i save mekem yumi laef bakegen from we hem i tingbaot evri smosmol samting long saed blong yumi mo evri memori we yumi gat. (Mat. 10:​29-31) I tru, yumi gat evri gudfala risen blong trastem Papa blong yumi long heven se bambae hem i jajem gud ol man wanwan, from we hem i waes, i mekem i stret oltaem, mo i gat sore.—Jem. 2:13.

17. ?Bambae yumi tokbaot wanem long nekis stadi?

¹⁷ Naoia we yumi kasemsave klia long ol niufala save ya, yumi luksave se wok blong prij i impoten moa i bitim bifo. ?From wanem yumi talem olsem? ?Mo wanem i pusum yumi blong gohed blong talemaot gud nius we yumi no givap? Bambae yumi tokbaot ansa blong ol kwestin ya long nekis stadi.