Lukaot Gud Oltaem Blong Yu No Foldaon Long Sin

1-2. (1) ?Jisas i givim wanem woning long ol disaepol blong hem? (2) ?From wanem ol disaepol oli lego Jisas? (Mo tu, yu luk ol pija.)

“I TRU, spirit i wantem tumas, be bodi i slak.”a (Mat. 26:41b) Ol tok ya oli soemaot se Jisas i kasemsave se yumi sinman. Be hem i talem ol tok ya tu blong wonem yumi se, yumi no mas trastem yumi wan bitim mak. Long semfala naet ya bifo we Jisas i talem ol tok ya, ol disaepol oli talem strong se bambae oli neva lego hem. (Mat. 26:35) Be oli no luksave se oli save lusum strong tingting taem oli fesem wan hadtaem. Taswe Jisas i talem long olgeta se: “Yufala i mas gohed blong lukaot gud oltaem mo yufala i mas prea oltaem, blong bambae i no gat wan samting i save traem yufala blong mekem yufala i foldaon.”—Mat. 26:41a.

² Sore tumas, ol disaepol oli no gohed blong lukaot gud. Taem oli arestem Jisas, ?ol disaepol oli stap klosap long hem, o oli foldaon long trap ya blong fraet long man mo ronwe? From we ol disaepol oli no gohed blong lukaot gud, oli mekem samting we oli talem long Jisas se bambae oli neva mekem.—Mat. 26:56.

3. (1) Blong holemstrong long Jehova, ?from wanem yumi no mas trastem yumi wan bitim mak? (2) ?Bambae yumi tokbaot wanem long stadi ya?

³ Yumi no mas trastem yumi wan bitim mak. I tru se maet yumi gat strong tingting blong no letem eni samting i pulum yumi gowe long Jehova. Be from we yumi sinman, i isi nomo blong yumi foldaon long sin taem wan samting i traem yumi. (Rom 5:12; 7:​21-23) Mo maet samtaem yumi mekem wan samting we yumi ting se i gud nomo, be wantaem nomo yumi sek se i pulum yumi blong mekem samting we i rong. Taswe blong holemstrong long Jehova mo Boe blong hem, yumi mas folem advaes blong Jisas, blong lukaot gud oltaem blong no foldaon long sin. Mo hemia nao samting we stadi ya bambae i halpem yumi blong mekem. Fastaem bambae yumi tokbaot se yumi mas lukaot gud moa long wanem. Biaen bambae yumi luk olsem wanem yumi save lukaot gud blong no foldaon long sin. Mo laswan, bambae yumi tokbaot olsem wanem yumi save gohed blong lukaot gud.

LUKAOT GUD OLTAEM—?LONG WANEM?

4-5. ?From wanem yumi mas lukaot gud blong no mekem ol smosmol sin?

⁴ Nating se sam sin oli smol nomo, be oli save spolem frensip blong yumi wetem Jehova. Mo tu, oli save pulum yumi blong mekem ol bigfala sin.

⁵ Yumi evriwan i stap fesem ol samting we oli pulum yumi blong mekem sin. Yumi wanwan i gat ol slak fasin. Eksampol, maet wan man i mas faet strong agensem ol doti fasin blong seks. Wan narafala man, maet i mas faet strong agensem tingting ya blong wantem mekem i no stret, olsem pleplei wetem seks blong hem, o lukluk ponografi. Mo wan narafala man bakegen maet hem i fraet long man, i wantem folem prapa tingting blong hem nomo, i save kros kwik, o wan narafala samting bakegen. Olsem we Jemes i talem, “ol samting blong traem man i save kam strong long hem taem hem i wantem tumas wan samting, nao samting ya i pulum hem, mo i trikim hem.”—Jem. 1:14.

6. ?Yumi no mas mekem wanem?

⁶ ?Yu yu save wanem i save pulum yu isi nomo blong foldaon long sin? Yumi no mas ting nating long slak fasin blong yumi o gat tingting ya se bambae yumi no save mekem samting we i no stret. (1 Jon 1:8) Tingbaot, Pol i talem se olgeta tu we oli “bigman long Kristin fasin” oli save foldaon long sin, sipos oli no gohed blong lukaot gud. (Gal. 6:1) Yumi no mas giaman long yumi wan mo yumi mas traehad blong luksave ol slak fasin blong yumi.—2 Kor. 13:5.

7. ?Yumi mas lukaot moa long wanem? Talem wan eksampol.

⁷ Sipos yumi luksave wan slak fasin we i save pulum yumi blong foldaon long sin, ?bambae yumi mekem wanem? !Bambae yumi traehad blong stanap strong agensem traem ya! Eksampol, long taem bifo, haf blong wan taon we i no strong hemia ol get blong hem. Taswe, hemia nao ples we ol gad oli protektem moa. Long sem fasin, yumi mas lukaot gud moa long ol slak fasin blong yumi blong oli no pulum yumi blong foldaon long sin.—1 Kor. 9:27.

?OLSEM WANEM BLONG LUKAOT GUD BLONG NO FOLDAON LONG SIN?

8-9. ?Yang man long Ol Proveb japta 7 i save mekem wanem blong hem i no foldaon long sin? (Ol Proveb 7:​8, 9, 13, 14, 21)

⁸ ?Olsem wanem yumi save lukaot gud blong no foldaon long sin? Traem luk samting we yumi save lanem long stori blong yang man ya we Ol Proveb japta 7 i tokbaot. Hem i mekem doti fasin blong seks wetem wan woman we fasin blong hem i no stret. Vas 22 i talem se “wantaem nomo” yang man ya i biaen long woman ya. Be ol vas bifo oli soem se hem i bin mekem sam samting we i pulum hem sloslo blong mekem sin.

⁹ ?Yang man ya i mekem wanem bifo we hem i mekem sin? Fastaem, long aftenun we klosap i tudak, hem “i pas long bigfala rod klosap long kona we [rabis] woman ya i stap long hem,” mo i wokbaot i go long haos blong woman ya. (Ridim Ol Proveb 7:​8, 9.) Ale hem i luk woman ya, be hem i no tanemraon. Hem i letem woman ya i kisim hem, mo i stap lesin taem woman ya i stap tokbaot sakrefaes blong pis we hem i mekem, maet hemia i blong mekem yang man ya i ting se hem i wan gudfala woman. (Ridim Ol Proveb 7:​13, 14, 21.) Sipos yang man ya i no bin mekem ol samting ya, bambae hem i naf blong stap longwe long trap ya we i save pulum hem blong mekem sin.

10. ?Olsem wanem wan Kristin i save mekem sem mastik olsem yang man we Ol Proveb i tokbaot?

¹⁰ Stori ya i soemaot se samting ya i save hapen long eni man blong Jehova. Maet wan man we i mekem bigfala sin i talem se: “Samting ya i hapen nomo olsem we mi no tingbaot.” Be sipos hem i tingting bak long samting we i hapen, bambae hem i luksave se hem i bin mekem sam nogud desisen we i pulum hem blong mekem sin ya. Maet hem i jusum ol rabis fren, ol samting blong spel mo pleplei we oli no stret, mo maet hem i stap go long sam websaet o long sam ples we i no stret long wan Kristin. Mo tu, maet hem i no moa prea, ridim Baebol, go long ol miting, o joen long wok blong prij. Olsem yang man ya we Ol Proveb i tokbaot, hem i foldaon long sin afta we hem i mekem plante nogud desisen.

11. ?Yumi mas mekem wanem blong yumi no mekem sin?

¹¹ ?Yumi lanem wanem? Yumi mas lukaot gud blong no mekem sin, be tu long ol samting we i save pulum yumi blong mekem sin. Hemia nao poen we Solomon i makem taem hem i tokbaot stori blong yang man ya wetem woman ya we fasin blong hem i no stret. Hem i talem se: “Yu no mas wokbaot krangke i go long ol rod blong hem.” (Prov. 7:25) Mo tu, hem i talem se: “Yu mas stap longwe long woman olsem, yu no mas go klosap long fored blong haos blong hem.” (Prov. 5:​3, 8) Yes, blong no mekem sin, yumi mas stap longwe long ol samting we i save lidim yumi blong mekem sin.b Maet hemia i min se yumi mas stap longwe long ol pleplei o ol samting we maet i stret nomo blong ol Kristin oli mekem, be oli save pulum yumi blong mekem sin.—Mat. 5:​29, 30.

12. ?Wanem strong desisen we Job i mekem, mo hemia i givhan long hem olsem wanem? (Job 31:1)

¹² Blong blokem ol samting we i save pulum yumi blong mekem sin, yumi mas mekem strong desisen blong lukaot gud oltaem. Hemia nao samting we Job i mekem. Hem i “mekem wan kontrak wetem ae blong [hem]” blong i neva lukluk wan woman wetem wan tingting we i no stret. (Ridim Job 31:1.) Taswe hem i naf blong stap longwe long trap ya blong mekem adaltri. Yumi tu, yumi save mekem strong desisen blong stap longwe long ol samting we i save pulum yumi blong mekem sin.

13. ?From wanem yumi mas lukaot gud long tingting blong yumi? (Mo tu, yu luk ol pija.)

¹³ Yumi mas lukaot gud tu long tingting blong yumi. (Eks. 20:17) Samfala oli ting se i oraet nomo blong pijarem se oli stap mekem wan nogud fasin, from we oli no rili mekem ol nogud samting ya. Be tingting olsem i no stret. Taem wan man i gohed blong tingbaot ol nogud samting, hemia bambae i pulum hem blong i wantem mekem samting ya. I tru, wanwan taem bambae yumi gat ol nogud tingting. Be long taem olsem, i impoten we yumi sakemaot kwiktaem, mo fulumap tingting blong yumi wetem ol gudfala samting. Olsem nao, bambae yumi blokem ol rong tingting blong oli no kam bigwan, nao i had tumas blong yumi faet agensem, ale oli pulum yumi blong mekem wan bigfala sin.—Fil. 4:8; Kol. 3:2; Jem. 1:​13-15.

14. ?Yumi save mekem wanem moa blong yumi no foldaon long sin?

¹⁴ ?Yumi mas mekem wanem moa blong yumi no foldaon long sin? Yumi mas trastem se gudfala samting bambae i kamaot sipos yumi obei oltaem long ol loa blong Jehova. Wanwan taem bambae i had blong mekem ol tingting mo ol samting we yumi wantem oli laenap wetem tingting blong God. Be sipos yumi gohed blong traehad, bambae yumi kasem trufala glad.

15. Sipos tingting we i pusum yumi i stret, ?hemia i save halpem yumi olsem wanem?

¹⁵ Yumi mas traehad blong mekem se tingting we i pusum yumi blong mekem samting, i stret. Sipos yumi lanem blong ‘no laekem nating samting we i nogud, mo laekem samting we i gud,’ bambae yumi gat strong tingting blong mekem samting we i stret, mo blokem ol samting we i save pulum yumi blong mekem sin. (Amos 5:15) Mo tu, sipos tingting we i pusum yumi i stret, bambae yumi naf blong stanap strong mo no mekem sin, nating se yumi stap long wan ples we yumi no save ronwe, o yumi mekem wan samting we yumi no luksave se i save pulum yumi blong mekem sin.

16. ?Olsem wanem ol samting long saed blong spirit oli save halpem yumi blong lukaot gud oltaem? (Mo tu, yu luk ol pija.)

¹⁶ ?Yumi save mekem wanem blong gat wan tingting we i stret? Yumi mas bisi oltaem long ol samting long saed blong spirit. Taem yumi stap long ol miting o wok blong prij, bambae i had blong yumi tingbaot blong mekem samting we i rong. (Mat. 28:​19, 20; Hib. 10:​24, 25) Taem yumi ridim Baebol, stadi, mo tingting dip long hem, bambae yumi laekem moa blong mekem ol samting we i gud, mo agensem ol nogud samting. (Jos. 1:8; Sam 1:​2, 3; 119:​97, 101) Tingbaot, Jisas i talem long ol disaepol blong hem se: “Yufala i mas prea oltaem, blong bambae i no gat wan samting i save traem yufala blong mekem yufala i foldaon.” (Mat. 26:41) Taem yumi prea long Jehova, yumi stap givim janis long hem blong i halpem yumi, mo givhan long yumi blong gat strong tingting blong mekem hem i glad.—Jem. 4:8.

GOHED BLONG LUKAOT GUD

17. ?Wanem slak fasin we i had blong Pita i winim?

¹⁷ I tru, yumi save winim sam slak fasin blong yumi. Be sam narafala slak fasin, maet i had blong winim. Hemia nao samting we i hapen long aposol Pita. Hem i fraet long ol man, taswe hem i giaman se hem i no save Jisas. (Mat. 26:​69-75) Be i luk olsem se Pita i winim fraet ya, from we hem i gat strong tingting blong prij taem hem i stanap long fored blong Sanhedrin. (Wok 5:​27-29) Nating se i olsem, sam yia biaen, hem i “fraet long olgeta ya we oli sakomsaes,” nao blong smoltaem, hem i stop blong kakae wetem ol Kristin we oli no man Jiu. (Gal. 2:​11, 12) Yes, slak fasin blong Pita i kambak. Maet hem i neva winim slak fasin ya fulwan.

18. ?Wanem i save hapen long sam slak fasin blong yumi?

¹⁸ Maet yumi tu, yumi olsem Pita. Maet yumi gat wan slak fasin we yumi ting se yumi winim finis, be biaen i kambak. Eksampol, wan brata i talem se: “Blong ten yia mi stop blong wajem ponografi, mo mi ting se mi winim fasin ya finis. Be slak fasin ya i olsem wan wael animol we i stap haed, mo i wet long stret taem blong i kakae mi.” Yumi glad se brata ya i no givap. Hem i luksave se hem i mas mekem sam samting evri dei blong faet agensem slak fasin ya, mo maet hem i mas mekem olsem long ful laef blong hem long rabis wol ya. Be wetem help blong waef blong hem mo ol elda long kongregesen, hem i gat strong tingting blong stap longwe long ponografi.

19. ?Yumi save mekem wanem sipos yumi no winim slak fasin blong yumi yet?

¹⁹ ?Yumi save mekem wanem blong yumi no letem wan slak fasin blong yumi i pulum yumi blong mekem sin? Yumi save folem advaes blong Jisas we i se: “Yufala i mas gohed blong lukaot gud oltaem.” Nating sipos yu stap stanap strong, be yu mas gohed blong blokem ol samting we i save pulum yu blong mekem sin. (1 Kor. 10:12) I gud yu gohed blong mekem ol samting we oli bin halpem yu finis blong winim ol slak fasin blong yu. Ol Proveb 28:14 i talem se: “Man we oltaem i stap lukaot gud, hem i glad.”—2 Pita 3:14.

BLESING WE YUMI KASEM TAEM YUMI LUKAOT GUD OLTAEM

20-21. (1) ?Wanem ol blesing we yumi save kasem sipos yumi lukaot gud oltaem blong no foldaon long sin? (2) Sipos yumi tekem faswan step blong no foldaon long sin, Jehova bambae i mekem wanem? (2 Korin 4:7)

²⁰ Yumi save sua se i no blong nating we yumi gohed blong lukaot gud. Taem yumi mekem sin, yumi “harem gud blong smoltaem nomo,” be sipos yumi folem ol rul blong Jehova, bambae yumi kasem trufala glad. (Hib. 11:25; Sam 19:8) Hemia from we Jehova i wokem yumi blong yumi laef folem ol rul blong hem. (Jen. 1:27) Sipos yumi mekem olsem, bambae yumi gat wan tingting we i klin mo yumi save laef olwe.—1 Tim. 6:12; 2 Tim. 1:3; Jud 20, 21.

²¹ I tru, “bodi i slak,” be i no minim se yumi no save winim ol slak fasin blong yumi. Jehova i rere blong givim paoa long yumi. (Ridim 2 Korin 4:7.) Mo paoa ya i bigwan bitim mak. Be fastaem yumi mas yusum prapa paoa blong yumi. Sipos yumi tekem faswan step, yumi save sua se Jehova bambae i ansarem ol prea blong yumi, mo i givim paoa we yumi nidim. (1 Kor. 10:13) Yes, wetem help blong Jehova, yumi naf blong lukaot gud oltaem blong yumi no foldaon long sin.