?Jehova i Mekem Wanem Blong Sevem Ol Sinman?

1-2. (1) ?Wanem ya sin, mo wanem i mekem se yumi save fren gud wetem Jehova? (Mo tu, yu luk “Mining Blong Toktok.”) (2) ?Bambae yumi tokbaot wanem long stadi ya, mo long ol narafala stadi we i stap long Wajtaoa ya? (Mo tu, yu luk “Long Yu We Yu Ridim Magasin Ya” we i stap long magasin ya.)

?YU YU wantem save olsem wanem Jehova i soemaot se hem i lavem yu? Yu save faenem ansa blong kwestin ya, taem yu stadi long ol samting we Jehova i mekem finis blong tekemaot yu long sin mo ded. Sina i wan rabis enemi, we yu wan nomo yu no save winim. Evri dei, yumi evriwan i stap mekem sin, mo from we yumi sinman, yumi stap ded. (Rom 5:12) Be Jehova i promes se bambae hem i sevem yumi, i tekemaot yumi fulwan long sin mo ded.

² Blong bitim 6,000 yia finis, Jehova i halpem ol man blong fren gud wetem hem nating se oli sinman. ?From wanem? From we hem i lavem yumi. Long stat finis, Jehova i lavem yumi ol man, taswe hem i mekem plante samting blong halpem yumi. God i save se sin i lidim man i go long ded, mo hem i no wantem se yumi ded. Hem i wantem se yumi laef olwe. (Rom 6:23) Mo hemia nao samting we hem i wantem mekem long yu. Taswe long stadi ya bambae yumi tokbaot tri kwestin: (1) ?Olsem wanem Jehova i givim hop long ol sinman? (2) ?Olsem wanem ol sinman bifo oli mekem Jehova i glad? (3) ?Jisas i mekem wanem blong sevem ol sinman?

?OLSEM WANEM JEHOVA I GIVIM HOP LONG OL SINMAN?

3. ?Wanem i mekem se Adam mo Iv i mekem sin?

³ Taem Jehova i wokem faswan man mo woman, hem i wantem se tufala i hapi. Hem i givim wan gudfala ples blong tufala i stap long hem, hem i givim presen ya mared, mo wan gudfala wok long tufala. Wok blong tufala hemia blong fulumap wol wetem ol pikinini blong tufala, mo mekem fulwol ya i kam wan paradaes olsem garen blong Iden. Be hem i talem wan samting nomo long tufala blong tufala i no mekem. Mo hem i wonem tufala tu se sipos tufala i no obei, mo tufala i rebel agensem hem, sin ya bambae i lidim tufala i go long ded. Yumi save samting we i hapen afta. Wan spirit man we i no lavem God mo tufala, i pulum tufala blong mekem sin. Adam mo Iv i lesin long rabis enjel ya Setan. Tufala i no trastem Papa blong tufala Jehova, mo tufala i mekem sin. Olsem yumi save, ol tok blong Jehova oli kamtru. Stat long dei we tufala i no obei, tufala i fesem ol trabol we i kamaot from. Tufala i stat blong kam olfala mo biaen tufala i ded.—Jen. 1:​28, 29; 2:​8, 9, 16-18; 3:​1-6, 17-19, 24; 5:5.

4. ?From wanem Jehova i no laekem sin nating, mo i halpem yumi blong fren gud wetem hem? (Rom 8:​20, 21)

⁴ Jehova i meksua se stori ya i stap long Baebol, blong i halpem yumi blong kasemsave from wanem Jehova i no laekem sin nating. Sin i seraotem yumi long Papa blong yumi Jehova, mo i lidim yumi i go long ded. (Aes. 59:2) Hemia nao from wanem rabis spirit ya Setan, we i statem olgeta trabol ya, i laekem sin mo i pulum ol man tu blong mekem sin. Maet hem i gat tingting ya se hem i win finis, from we hem i spolem stamba tingting we Jehova i gat long ol man. Be hem i no kasemsave se Jehova i gat bigfala lav, mo bambae Hem i neva jenisim stamba tingting blong hem. Jehova i lavem tumas ol pikinini we oli kamaot biaen long Adam mo Iv, taswe kwiktaem nomo hem i givim wan hop long olgeta. (Ridim Rom 8:​20, 21.) Jehova i save se sam long ol pikinini ya bambae oli jusum blong lavem hem mo obei long hem. Taswe, hem i mekem rod blong ol man ya oli save kam klosap long hem, mo blong hem i save tekemaot olgeta long sin mo ded. ?Jehova i mekem wanem blong olgeta samting ya oli kamtru?

5. ?Wetaem Jehova i givim faswan hop long ol sinman? Yu eksplenem. (Jenesis 3:15)

⁵ Ridim Jenesis 3:15. Jehova i givim faswan hop long ol sinman, taem hem i talemaot samting we bambae i hapen long Setan. Hem i talem se wan “pikinini” bambae i sevem ol man. Pikinini ya bambae i smasem Setan mo i stretem olgeta trabol we i bin hapen long garen blong Iden. (1 Jon 3:8) Be pikinini ya bambae i safa tu. Setan bambae i givim kil long hem mo i mekem hem i ded. I sua se Jehova bambae i harem nogud tumas. Be long en, gudfala frut i save kamaot from we ded blong pikinini ya bambae i sevem plante man.

?OLSEM WANEM OL SINMAN BIFO OLI MEKEM JEHOVA I GLAD?

6. ?Ol man we oli gat bilif olsem Ebel mo Noa, oli mekem wanem blong kam klosap long Jehova?

⁶ Sloslo, Jehova i soemaot klia olsem wanem ol sinman oli save kam klosap long hem. Ebel we i sekenbon boe blong Adam mo Iv, hem i faswan man we i bilif long Jehova afta long ol trabol ya we i hapen long Iden. From we Ebel i lavem Jehova, i wantem mekem hem i glad, mo kam klosap long hem, hem i givim wan sakrefaes. Ebel i wan man blong lukaot long sipsip, taswe hem i tekem wan yang sipsip, i kilim mo i sakrefaesem i go long Jehova. ?Wanem tingting blong Jehova long sakrefaes ya? Hem “i glad long Ebel mo ofring blong hem.” (Jen. 4:4) Jehova i glad long sakrefaes blong ol narafala man tu we oli lavem hem mo oli trastem hem, olsem Noa. (Jen. 8:​20, 21) Taem Jehova i akseptem sakrefaes blong olgeta, hemia i soemaot se ol sinman oli save mekem hem i glad mo kam klosap long hem.b

7. ?Yumi lanem wanem long fasin blong Ebraham we i rere nomo blong sakrefaesem boe blong hem?

⁷ Jehova i askem Ebraham we i wan man we i gat strong bilif, blong i mekem wan samting we i had tumas. Hemia blong sakrefaesem boe blong hem Aesak. I sua se hemia wan samting we i had tumas blong Ebraham i mekem. Nating se i olsem, hem i rere nomo blong obei long Jehova. Be taem hem i rere blong kilim boe blong hem, Jehova i stopem hem. Be yet, eksampol blong Ebraham i tijim yumi wan impoten samting we Jehova bambae i mekem long fiuja. Jehova bambae i rere blong givim prapa Boe blong hem we hem i lavem tumas, olsem wan sakrefaes. Yes, Jehova i lavem ol man tumas.—Jen. 22:​1-18.

8. ?Ol sakrefaes we Loa i askem ol man Isrel blong mekem oli soemaot wanem? (Levitikas 4:​27-29; 17:11)

⁸ Plante handred yia biaen, long Loa we God i givim long ol man Isrel, hem i talem long olgeta blong mekem ol sakrefaes blong tekemaot sin blong olgeta. (Ridim Levitikas 4:​27-29; 17:11.) Ol sakrefaes ya oli soemaot se Jehova bambae i givim wan sakrefaes we i gud moa, we bambae i tekemaot fulwan sin blong ol man. God i pulum ol profet blong eksplenem se pikinini ya we hem i promes blong sanem, hemia spesel Pikinini blong hem, bambae i safa mo oli kilim hem i ded. Bambae oli tekem hem i go olsem wan sipsip blong kilim hem i ded. (Aes. 53:​1-12) Traem tingbaot: !Jehova bambae i mekem rod blong Boe blong hem we hem i lavem tumas, i ded olsem wan sakrefaes blong tekemaot ol man long sin mo ded, mo hemia i minim yu tu!

?JISAS I MEKEM WANEM BLONG SEVEM OL SINMAN?

9. ?Jon Baptaes i talem wanem long saed blong Jisas? (Hibru 9:22; 10:​1-4, 12)

⁹ Long yia 29 K.T., Jon Baptaes i luk man Nasaret ya Jisas mo i talem se: “!Yufala i luk! !Hemia Smol Sipsip Blong God we bambae i tekemaot sin blong ol man long wol!” (Jon 1:29) Ol tok ya oli soemaot se Jisas nao, hem i pikinini ya we God i promes blong sanem. Hem nao bambae i givim laef blong hem olsem wan sakrefaes. Yes, Pikinini blong Jehova i kamtru, blong tekemaot fulwan sin blong ol man.—Ridim Hibru 9:22; 10:​1-4, 12.

10. ?Jisas i soemaot olsem wanem se hem i “kam blong singaot” ol sinman?

¹⁰ Jisas i tingbaot nomo blong halpem ol man we oli harem nogud from sin blong olgeta, mo hem i singaot olgeta blong oli biaen long hem. Hem i save se sin nao i stamba blong olgeta samting we i mekem ol man oli safa. Taswe, hem i wantem tumas blong halpem ol man mo woman we oli mekem sin. Blong givhan long yumi, hem i talem wan pijatok se: “Ol man we oli no sik, oli no nidim dokta, be olgeta we oli sik, yes, oli nidim.” Mo hem i gohed se: “Mi mi no kam blong singaot ol stret man, be mi mi kam blong singaot ol man blong mekem sin.” (Mat. 9:​12, 13) Jisas i folem gud ol tok ya. Hem i fogivim sin blong wan woman we i wasem leg blong hem, long wota blong ae blong hem. (Luk 7:​37-50) Jisas i talem wan impoten trutok long wan woman Sameria we i kam blong pulum wota long wel, nating se hem i save we woman ya i laef wetem wan man we i no hasban blong hem. (Jon 4:​7, 17-19, 25, 26) Sin i lidim man i go long ded, be God i givim paoa long Jisas blong mekem ol man, woman, mo pikinini, oli laef bakegen.—Mat. 11:5.

11. ?From wanem ol sinman oli no fraet blong kam klosap long Jisas?

¹¹ Yumi kasemsave from wanem ol man we oli mekem ol bigfala sin, oli kam long Jisas. Jisas i kaen mo i gat sore, taswe ol man oli no fraet blong kam klosap long hem. (Luk 15:​1, 2) Mo Jisas i talem ol gudfala tok mo i blesem ol man we oli soemaot se oli bilif long hem. (Luk 19:​1-10) Jisas i gat sore sem mak olsem Papa blong hem. (Jon 14:9) Tru long toktok mo ol samting we hem i mekem, hem i soemaot se Papa blong hem i lavem ol man, mo i wantem halpem olgeta blong oli fren gud wetem hem. Yes, Jisas i halpem ol sinman blong oli jenisim ol fasin blong olgeta mo oli biaen long hem.—Luk 5:​27, 28.

12. ?Jisas i talem wanem long saed blong ded blong hem?

¹² Jisas i save samting we bambae i hapen long hem. Taswe, plante taem hem i talem long ol man blong hem se ol man bambae oli mekem i nogud long hem mo nilim hem long pos. (Mat. 17:22; 20:​18, 19) Hem i save se ded blong hem bambae i tekemaot sin blong ol man long wol, olsem we Jon mo ol profet oli bin talemaot. Mo tu, Jisas i talem se afta we hem i ded, bambae hem i “pulum ol defdefren kaen man” oli kam long hem. (Jon 12:32) Ol sinman oli save mekem Jehova i glad, taem oli bilif long Jisas mo folem eksampol blong hem. Sipos oli mekem olsem, bambae oli “kam fri long sin.” (Rom 6:​14, 18, 22; Jon 8:32) Taswe, Jisas i rere nomo mo i no fraet blong ded long wan fasin we i nogud olgeta, blong sevem yumi.—Jon 10:​17, 18.

13. ?Jisas i ded olsem wanem, mo hemia i soemaot wanem long saed blong Jehova? (Mo tu, yu luk pija.)

¹³ Jisas i fesem plante problem. Ol fren blong hem oli lego hem, ol enemi oli arestem hem, tok nogud long hem, oli talem se hem i gilti, mo biaen oli nilim hem long pos. Ol soldia oli lidim hem i go long ples we bambae oli kilim hem long hem, mo oli nilim hem long pos. Nating se Jisas i stanap strong long olgeta samting ya, be i gat wan Man we i harem nogud bitim mak, hemia Jehova God. Jehova i gat paoa mo i naf blong stopem ol samting ya blong oli no mekem boe blong hem i safa. Be hem i no mekem olsem. ?From wanem? Hemia from we hem i gat lav. Jisas i talem se: “God i lavem tumas ol man long wol, nao hem i givim stret Pikinini blong hem, wan nomo we hem i gat, blong olgeta man we oli soemaot se oli bilif long hem, oli no ded be oli kasem laef we i no save finis.”—Jon 3:16.

14. ?Ded blong Jisas i pruvum wanem long yu?

¹⁴ Ded blong Jisas i wan pruf se Jehova i lavem tumas ol pikinini we oli kamaot biaen long Adam mo Iv. Mo i pruvum tu se Jehova i lavem yu. Hem i mekem plante samting, mo i stanap strong long plante samting we i mekem hem i harem nogud tumas, blong hem i save tekemaot yu long sin mo ded. (1 Jon 4:​9, 10) Yes, Jehova i wantem halpem yumi wanwan blong fren gud wetem hem, mo blong tekemaot sin fulwan long fiuja.

15. ?Yumi mas mekem wanem blong ransom sakrefaes blong Jisas i mekem i gud long yumi?

¹⁵ Presen blong God, hemia ransom sakrefaes blong Boe blong hem, i mekem se God i save fogivim ol sin blong yumi. Be blong God i fogivim yumi, yumi mas mekem wan samting. ?Wanem samting ya? Jon Baptaes mo Jisas i ansa long kwestin ya, se: “Yufala i mas tanem tingting blong yufala, from we Kingdom blong heven i kam klosap finis.” (Mat. 3:​1, 2; 4:17) Taswe, sipos yumi wantem se God i fogivim yumi mo yumi kam klosap long Papa blong yumi, yumi mas tanem tingting blong yumi. ?Be i minim wanem blong tanem tingting? ?Mo olsem wanem fasin blong tanem tingting i halpem yumi blong mekem Jehova i glad, nating se yumi sinman? Nekis stadi bambae i ansa long ol kwestin ya.