No Wet Longtaem Tumas Blong Baptaes

1. ?Wanem sam gudfala risen blong baptaes?

?YU YU lavem Jehova God, we hem nao i givim evri gudfala presen mo i givim laef tu long yu? ?Yu yu wantem soemaot long hem se yu lavem hem? Beswan rod blong mekem olsem, hemia blong givim laef blong yu i go long hem mo baptaes. Taem yu mekem olsem, bambae yu kam pat blong famle blong Jehova. Nao Jehova we i Papa mo i Fren blong yu, bambae i lidim yu mo i lukaot gud long yu from we yu yu blong hem. (Sam 73:24; Aes. 43:​1, 2) Mo tu, taem yu givim laef blong yu long Jehova mo yu baptaes, yu save gat janis ya blong harem gud long laef ya we i no save finis.—1 Pita 3:21.

2. ?Bambae yumi tokbaot wanem long stadi ya?

² ?I gat wan samting we i blokem yu blong baptaes? Sipos yes, i no yu wan nomo. Plante milian man bifo tu oli mas jenisim ol fasin mo tingting blong olgeta, blong oli save kasem mak ya blong baptaes. Mo naoia, oli glad blong mekem wok blong Jehova mo oli gat strong tingting. ?Yu save lanem wanem long eksampol blong ol faswan Kristin we oli tekem baptaes? I gud yumi tokbaot sam samting we i bin blokem olgeta blong baptaes, mo luk ol lesen we yumi save lanem long eksampol blong olgeta.

OL MAN SAMERIA OLI BAPTAES

3. ?Wanem sam samting we maet i blokem sam man Sameria blong oli no baptaes?

³ Long taem blong Jisas, ol man Sameria oli gat prapa relijen blong olgeta. Plante long olgeta oli laef klosap long taon blong Sekem mo Sameria we i stap long not long Judia. Bifo we ol man Sameria oli baptaes, oli mas kasem save gud long Tok blong God. Olgeta oli bilif se i gat faef buk nomo blong Baebol we oli kamaot long God, hemia Jenesis kasem Dutronome, mo maet buk blong Josua. Nating se i olsem, oli save se Mesaea i mas kam, folem promes blong God we i stap long Dutronome 18:​18, 19. (Jon 4:25) Be blong oli baptaes, oli mas akseptem se Jisas nao i Mesaea we God i promes blong sanem. Mo hemia nao samting we “plante man Sameria” oli mekem. (Jon 4:39) Mo tu, from we plante faswan Kristin oli man Jiu, sam man Sameria oli mas jenisim fasin ya we oli no laekem ol man Jiu.—Luk 9:​52-54.

4. Folem Ol Wok 8:​5, 6, 14, ?ol man Sameria oli mekem wanem taem Filip i prij long olgeta?

⁴ ?Wanem i halpem ol man Sameria blong oli baptaes? Taem ivanjelis ya Filip i talemaot “Kraes” long ol man Sameria, sam long olgeta oli “akseptem tok blong God.” (Ridim Ol Wok 8:​5, 6, 14.) Mo oli lesin gud long Filip, nating se hem i wan man Jiu. Maet oli tingbaot sam vas we i tokbaot se God i stap mekem i sem mak nomo long olgeta man. (Dut. 10:​17-19) Taswe, oli “lesin gud long samting we Filip i stap talem” blong tokbaot Kraes, mo oli luksave klia pruf se God nao i sanem Filip. Mo tu, Filip i stap mekem plante merikel blong hilim ol sikman mo i ronemaot ol dimon long ol man.—Wok 8:7.

5. ?Yu lanem wanem long eksampol blong ol man Sameria?

⁵ Ol man Sameria ya oli save jusum blong no lesin long Filip from we hem i wan man Jiu, mo from we hem i stap talemaot wan niufala tijing long olgeta. Be oli no mekem olsem. Taem oli sua se Filip i stap talemaot trutok long olgeta, oli no wet longtaem tumas blong baptaes. Baebol i talem se: “Taem ol man mo ol woman oli harem tok blong Filip we i stap talemaot gud nius blong Kingdom blong God mo nem ya blong Jisas Kraes, oli bilif mo oli baptaes.” (Wok 8:12) ?Yu yu sua gud se Tok blong God hem i trutok? ?Mo yu trastem se ol Witnes long Jehova oli sakemaot finis fasin ya blong no laekem narafala, mo oli stap soemaot trufala lav we i makemaot ol tru Kristin? (Jon 13:35) Sipos yes, yu no mas fraet blong baptaes, mo yu save sua se Jehova bambae i blesem yu.

6. ?Eksampol blong Ruben i save givhan long yu olsem wanem?

⁶ Ruben we i blong Jemani, i gruap long wan famle we oli Witnes. Be taem hem i yangfala, hem i no sua sipos i gat wan God. ?Olsem wanem hem i winim tingting ya? Hem i luksave se hem i no gat naf save long saed ya, nao hem i jusum blong mekem moa risej. Hem i talem se: “Long prapa stadi blong mi, mi mas stadi plante taem long topik blong evolusen, blong mi save faenemaot se wanem i tru mo wanem i no tru.” Ruben i ridim buk ya Is There a Creator Who Cares About You? Mo buk ya i givhan bigwan long hem blong i bilif long God. Hem i stap tingting hem wan se: ‘!I tru ya, Jehova i laef i stap!’ Mo taem Ruben i visitim wol hedkwota, mo i luk olsem wanem ol brata mo sista oli soemaot lav long olgeta mo oli joen gud, hemia i mekem hem i tinghae moa long oganaesesen. Ale, taem hem i gobak long Jemani, hem i baptaes. Long taem ya, hem i gat 17 yia. Sipos yu tu yu gat tu tingting long ol samting we yu lanem, i gud yu mekem risej long ol buk blong yumi. Nao taem yu gat “stret save,” bambae yu no moa gat tu tingting. (Efes. 4:​13, 14) Mo taem yu harem ekspiriens blong ol man blong Jehova raon long wol we i soemaot se oli gat lav mo oli joen gud, mo yu luk samting ya long prapa kongregesen blong yu, bambae yu lavem moa oganaesesen blong Jehova.

SOL BLONG TASAS I BAPTAES

7. ?Wanem rong tingting we Sol i mas jenisim?

⁷ Traem tingbaot eksampol blong Sol blong Tasas. Hem i save gud loa blong ol man Jiu, mo ol man Jiu oli tinghae long hem. (Gal. 1:​13, 14; Fil. 3:5) Long taem ya, plante man Jiu oli luk ol Kristin olsem ol man blong apostasi, taswe Sol i mekem i nogud long olgeta. Mo hem i ting se hem i stap mekem samting we God i wantem. (Wok 8:3; 9:​1, 2; 26:​9-11) Sipos Sol i bilif long Jisas mo i baptaes olsem wan Kristin, hem i mas rere blong fesem fasin agens.

8. (1) ?Wanem i halpem Sol blong i baptaes? (2) Folem Ol Wok 22:​12-16, ?olsem wanem Ananaeas i halpem Sol? (Mo tu, yu luk pija.)

⁸ ?Wanem i halpem Sol blong i baptaes? Taem Jisas i stap long heven mo i toktok long Sol, laet we i saenaot long skae i mekem hem i blaen. (Wok 9:​3-9) Blong tri dei, hem i no kakae, mo i sua se hem i tingting dip long samting we i bin hapen long hem. Yes, Sol i stat blong bilif se Jisas nao i Mesaea mo se ol man blong hem nao oli stap mekem tru wosip. !Ating Sol i harem nogud tumas from we hem i agri blong oli kilim i ded Steven! (Wok 22:20) Long en blong trifala dei ya, wan disaepol we nem blong hem Ananaeas i kam luk Sol, i mekem hem i save lukluk bakegen, mo i leftemap tingting blong hem blong i no wet, be i baptaes. (Ridim Ol Wok 22:​12-16.) Sol i gat tingting daon, i lesin long Ananaeas, mo i mekem desisen blong baptaes.—Wok 9:​17, 18.

9. ?Yu lanem wanem long eksampol blong Sol?

⁹ I gat sam lesen we yumi save lanem long eksampol blong Sol. Hem i save letem fasin flas o fraet long man i blokem hem blong baptaes. Be hem i no letem samting ya i hapen. Sol i gat tingting daon mo i rere blong jenisim laef blong hem blong i save biaen long Kraes. (Wok 26:​14, 19) Mo Sol i rere blong kam wan Kristin, nating se hem i save se bambae hem i fesem fasin agens. (Wok 9:​15, 16; 20:​22, 23) Afta we hem i baptaes, hem i gohed blong trastem se Jehova bambae i halpem hem blong stanap strong long plante traem. (2 Kor. 4:​7-10) Sipos yu baptaes mo yu kam wan Witnes blong Jehova, bambae yu fesem plante samting we i traem bilif blong yu. Be yu save sua se Jehova mo Jisas bambae i gohed blong halpem yu blong stanap strong.—Fil. 4:13.

10. ?Olsem wanem eksampol blong Anna i save givhan long yu?

¹⁰ Anna i gruap long Is Yurop. Afta we mama blong hem i baptaes, papa blong Anna i agri blong Anna i stat blong stadi Baebol. Long taem ya, Anna i gat 9 yia. Be taem ol famle blong olgeta we oli laef wetem olgeta long haos oli harem samting ya, oli stat blong agensem hem, from oli gat tingting ya se hem i no gat respek taem hem i lego relijen blong olgeta. Taem Anna i gat 12 yia, hem i askem long papa blong hem sipos hem i save baptaes. Be papa blong hem i wantem save sipos hemia i prapa desisen blong hem, o sipos samfala oli fosem hem blong mekem olsem. Nao Anna i talem se: “Mi mi lavem Jehova.” Ale, papa blong hem i agri blong hem i baptaes. Afta we Anna i baptaes, ol famle blong hem oli gohed blong mekem i nogud long hem. Wan long ol famle blong hem i talem se: “I moa gud sipos yu gat wan rabis laef mo yu smok, i bitim we yu kam wan Witnes blong Jehova.” ?Wanem i givhan long Anna blong i stanap strong? Hem i talem se: “Jehova i halpem mi blong stanap strong. Mo mama mo papa blong mi tu oli sapotem mi bigwan.” Anna i stap raetemdaon ol spesel taem we hem i luk se Jehova i givhan long hem. Mo wanwan taem, hem i luklukbak long ol samting we hem i raetem, blong hem i no fogetem olsem wanem Jehova i bin halpem hem. Sipos yu fraet se bambae yu fesem fasin agens, tingbaot se Jehova bambae i halpem yu tu.—Hib. 13:6.

KONILIAS I BAPTAES

11. ?Wanem i save blokem Konilias blong i no baptaes?

¹¹ Baebol i tokbaot eksampol blong Konilias tu. Hem i “wan ofisa blong ami” we i lukaot long 100 soldia blong Rom. (Wok 10:​1, fut.) From samting ya, maet ol man long komuniti mo ol ami oli tinghae long hem. Mo tu, hem i “stap givim plante presen blong sore long ol man.” (Wok 10:2) Jehova i sanem aposol Pita blong i go talemaot gud nius long hem. ?Olsem wanem? Konilias i letem hae posisen we hem i gat i blokem hem blong baptaes?

12. ?Wanem i halpem Konilias blong i baptaes?

¹² ?Wanem i halpem Konilias blong i baptaes? Yumi ridim se “hem wetem evriwan we oli stap long haos blong hem, oli stap mekem wosip long God.” Mo oltaem Konilias i stap prea long God. (Wok 10:2) Taem Pita i talemaot gud nius long Konilias, hem mo famle blong hem oli bilif long Kraes, mo kwiktaem nomo oli baptaes. (Wok 10:​47, 48) Yes, Konilias i rere blong mekem eni jenis long laef blong hem, blong hem mo famle blong hem i save wosipim Jehova tugeta.—Jos. 24:15; Wok 10:​24, 33.

13. ?Yu lanem wanem long eksampol blong Konilias?

¹³ Olsem Sol, Konilias i save letem hae posisen we hem i gat i blokem hem blong kam wan Kristin. Be hem i no letem samting ya i hapen. ?Olsem wanem? ?Yu mas mekem sam bigfala jenis long laef blong yu blong yu save baptaes? Sipos yes, Jehova bambae i halpem yu. Bambae hem i blesem yu sipos yu gat strong tingting blong folem ol stamba trutok blong Baebol long laef long yu.

14. ?Olsem wanem eksampol blong Tsuyoshi i save givhan long yu?

¹⁴ Tsuyoshi we i blong Japan, i mas jenisim sam samting we hem i stap mekem long wok blong hem, blong hem i save baptaes. Hem i stap givhan long hedmasta blong skul ya Ikenobo, we i stap tijim ol man olsem wanem blong arenjem ol flaoa. Taem hedmasta i no naf blong joen long ol seremoni blong ded, plante taem Tsuyoshi i go long bihaf blong hem, blong mekem ol kastom we i joen wetem bilif blong ol Budis. Be taem Tsuyoshi i lanem trutok long saed blong ded, hem i kasemsave se sipos hem i wantem baptaes, hem i mas lego ol kaen seremoni olsem. (2 Kor. 6:​15, 16) Ale, Tsuyoshi i toktok wetem hedmasta blong skul ya. ?Wanem i kamaot from? Tsuyoshi i gohed long wok blong hem, be hem i no moa joen long ol seremoni olsem. Wan yia afta we Tsuyoshi i stat blong stadi Baebol, hem i tekem baptaes.a Sipos yu mas jenisim sam samting long wok blong yu blong mekem God i glad, yu save sua se hem bambae i givim samting we yu mo famle blong yu i nidim.—Sam 127:2; Mat. 6:33.

OL MAN KORIN OLI BAPTAES

15. ?Wanem sam samting we maet i blokem ol man Korin blong oli no baptaes?

¹⁵ Ol man we oli laef long Korin bifo, oli laekem ol rij samting mo oli gat ol rabis fasin. Plante man we oli laef long ples ya, oli gat wan fasin blong laef we God i no glad long hem. Taswe, bambae i had long ol man we oli laef long wan taon olsem, blong oli akseptem gud nius. Nating se i olsem, taem aposol Pol i kam long taon ya mo i talemaot gud nius blong Kraes long olgeta, “plante man Korin tu we oli harem gud nius, oli bilif mo oli baptaes.” (Wok 18:​7-11) Biaen, Masta Jisas Kraes i kamtru long Pol long wan vison mo i talem se: “I gat plante man blong mi yet long taon ya.” Taswe, Pol i gohed blong prij long ples ya blong wan yia mo sikis manis.

16. ?Wanem i halpem samfala long Korin blong oli baptaes? (2 Korin 10:​4, 5)

¹⁶ ?Wanem i halpem ol man Korin blong oli baptaes? (Ridim 2 Korin 10:​4, 5.) Tok blong God mo tabu spirit i halpem olgeta blong mekem ol bigfala jenis long laef blong olgeta. (Hib. 4:12) Olgeta long Korin we oli akseptem gud nius blong Kraes, oli naf blong lego ol nogud fasin olsem fasin blong dring bitim mak, stil, mo fasin ya we man i mekem seks wetem man bakegen.—1 Kor. 6:​9-11.b

17. ?Yu lanem wanem long eksampol blong ol man Korin?

¹⁷ Nating se sam man long Korin oli mas mekem sam bigfala jenis long laef blong olgeta, be oli no gat tingting ya se i had tumas blong oli kam ol Kristin. Defren olgeta, oli traehad bigwan blong pas long rod ya we i strong we i lidim man i go long laef we i no save finis. (Mat. 7:​13, 14) ?Yu yu stap traehad blong winim wan nogud fasin we i blokem yu blong baptaes? !Sipos i olsem, yu no mas givap! I gud yu plis long Jehova blong i givim tabu spirit blong hem long yu, we i save halpem yu blong blokem tingting ya blong wantem mekem samting we i no stret.

18. ?Olsem wanem eksampol blong Monika i save givhan long yu?

¹⁸ Monika we i blong kantri ya Jojia, i traehad blong no moa yusum ol doti tok, mo no lesin o wajem ol samting we oli no stret, from hem i wantem kasem mak ya blong baptaes. Hem i talem se: “Taem mi yangfala, samting we i givhan long mi blong mekem ol jenis ya, hemia prea. Jehova i save se mi wantem mekem samting we i stret, mo oltaem hem i stap halpem mi mo lidim mi.” Monika i baptaes taem hem i gat 16 yia. ?Yu gat sam nogud fasin we yu mas lego blong Jehova i save glad long yu? Sipos yes, gohed blong askem Jehova blong i givim paoa long yu blong mekem ol jenis ya. Jehova i glad nomo blong givim tabu spirit long ol man blong hem.—Jon 3:34.

BILIF BLONG YU I SAVE MUVUM OL BIGFALA HIL

19. ?Wanem i save halpem yu blong winim ol samting we i blokem yu olsem ol bigfala hil? (Mo tu, yu luk pija.)

¹⁹ Nomata wanem samting i blokem yu blong baptaes, yu save sua se Jehova i lavem yu mo i wantem se yu kam pat blong famle blong hem. Jisas i talem long wan grup blong ol disaepol se: “Sipos bilif blong yufala i smol olsem sid blong mastad, bambae yufala i save talem long bigfala hil ya se: ‘Yu muvaot long ples ya, yu go longwe,’ mo hem bambae i muv i go, mo bambae i no gat wan samting we yufala i no save mekem.” (Mat. 17:20) Olgeta we oli stap long taem ya mo oli harem tok blong Jisas, oli bin folem hem blong sam yia nomo. Taswe oli nidim yet blong mekem bilif blong olgeta i kam strong moa. Be Jisas i talem long olgeta se sipos oli gat naf bilif, bambae Jehova i save halpem olgeta blong winim ol bigfala samting we i blokem olgeta olsem ol bigfala hil. !Mo Jehova bambae i halpem yu tu blong mekem sem mak!

20. ?Eksampol blong ol Kristin bifo mo tede we yumi tokbaot long stadi ya, oli save pulum yu blong mekem wanem?

²⁰ Sipos yu luksave se i gat sam samting we i blokem yu blong baptaes, i gud yu tekem aksen kwiktaem blong winim ol samting ya. I gud yu stadi long eksampol blong ol Kristin bifo mo tede tu, from we eksampol blong olgeta i save leftemap tingting blong yu, mo pulum yu blong givim laef blong yu long Jehova mo baptaes. !Mo hemia nao beswan desisen we yu save mekem!