Lanem Blong Gat Sem Tingting Olsem Jehova Mo Jisas

1-2. ?Lavem Jehova i minim wanem? ?Mo olsem wanem Jisas i soemaot se hem i lavem Jehova?

JISAS i tokbaot loa ya we i impoten moa long olgeta loa blong God, taem hem i talem se: “Yu mas lavem Jehova we i God blong yu, long olgeta hat blong yu mo long olgeta sol blong yu mo long olgeta paoa blong yu mo long olgeta tingting blong yu.” (Luk 10:27) Taswe yumi mas soemaot se yumi lavem Jehova long evri samting we yumi mekem long laef blong yumi, hemia i minim ol samting we yumi wantem, ol filing blong yumi, mo paoa blong yumi. Mo hemia i minim tu fasin blong yumi blong tingting. I tru, yumi no naf blong kasemsave fulwan long tingting blong Jehova. Be sipos yumi stadi long “tingting blong Kraes,” bambae yumi kasemsave moa long tingting blong God, from we Jisas i gat sem tingting olsem Papa blong hem.—1 Kor. 2:16.

² Jisas i soemaot se hem i lavem Jehova long olgeta tingting blong hem. Hem i save samting we God i wantem se hem i mekem mo hem i gat strong tingting blong folem, nating se hem i mas safa. Oltaem hem i putum tingting blong hem i stap long samting we Papa blong hem i wantem, taswe hem i neva letem wan narafala samting i pulum tingting blong hem i gowe long samting ya.

3. ?Aposol Pita i lanem wanem long Jisas? ?Mo hem i leftemap tingting blong ol narafala Kristin blong mekem wanem? (1 Pita 4:1)

³ Pita mo ol narafala aposol oli gat nambawan janis ya blong spenem taem wetem Jisas mo save gud ol tingting blong hem. Taem Pita i raetem faswan leta blong hem, hem i leftemap tingting blong ol Kristin blong oli rerem olgeta blong oli tekem sem tingting olsem Kraes. (Ridim 1 Pita 4:1.) Taem Pita i yusum toktok ya “rerem yufala,” hem i yusum wan tok we i blong tokbaot ol soldia we oli rerem ol tul blong faet blong olgeta blong oli go faet. Taswe sipos ol Kristin oli traehad blong gat sem tingting olsem Kraes, bambae oli naf blong faet agensem tingting ya blong wantem mekem samting we i no stret, mo agensem wol blong Setan.—2 Kor. 10:​3-5; Efes. 6:12.

4. ?Olsem wanem stadi ya bambae i givhan long yumi blong folem advaes blong Pita?

⁴ Bambae yumi tokbaot fasin blong Jisas blong tingting mo olsem wanem yumi save gat sem tingting olsem hem. Bambae yumi faenemaot olsem wanem yumi save (1) gat sem tingting olsem Jehova, we bambae i givhan long yumi evriwan blong gat wan tingting nomo, (2) gat tingting daon, mo (3) gat stret tingting, taem yumi dipen long Jehova tru long prea.

GAT SEM TINGTING OLSEM JEHOVA

5. Tokbaot wan taem we Pita i no gat sem tingting olsem Jehova.

⁵ Traem tingbaot wan taem we Pita i no gat sem tingting olsem Jehova. Long taem ya, Jisas i bin talem long ol aposol blong hem se bambae hem i mas go long Jerusalem, mo long ples ya ol lida blong skul bambae oli arestem hem, oli mekem i nogud long hem, mo oli kilim hem i ded. (Mat. 16:21) Maet Pita i faenem i had blong bilivim se Jehova bambae i letem Jisas i ded, from we Jisas nao hem i Mesaea we God i promes blong sanem. (Mat. 16:16) Taswe Pita i pulum Jisas i go longwe lelebet long ol narafala, mo i talem long hem se: “Masta, yu mas lukaot gud long yu, samting ya i no mas hapen long yu.” (Mat. 16:22) Pita i no agri long tingting blong Jisas, from we Pita i no gat sem tingting olsem Jehova.

6. ?Olsem wanem Jisas i soemaot se hem i gat sem tingting olsem Jehova?

⁶ Jisas i save gud ol tingting blong Papa blong hem, mo oltaem hem i gat sem tingting olsem Jehova. Taswe, Jisas i talem long Pita se: “!Yu go biaen long mi, Setan! Yu yu wan ston blong mekem mi stambol, from we tingting blong yu i no tingting blong God, i tingting blong man nomo.” (Mat. 16:23) Jisas i save se blong mekem samting we Jehova i wantem, hem i mas safa mo ded. Taswe hem i sakemaot advaes blong Pita, nating se Pita i stap traem blong givhan long hem. Long taem ya, Pita i luksave se hem i mas lanem blong gat sem tingting olsem God. Mo hemia i wan impoten lesen tu long yumi.

7. ?Olsem wanem Pita i soemaot se hem i stap traehad blong gat sem tingting olsem Jehova? (Mo tu, yu luk pija.)

⁷ Biaen, Pita i soemaot se hem i stap traehad blong gat sem tingting olsem Jehova. Long taem ya we ol man blong ol narafala nesen we oli no sakomsaes oli stat blong kam Kristin, Pita i kasem wok ya blong prij long Konilias, we hem nao i wan long ol faswan man blong narafala nesen we i kam Kristin. Ol man Jiu oli no stap joen wetem ol man blong ol narafala nesen, taswe Pita i mas jenisim tingting blong hem blong hem i save mekem wok ya. Taem Pita i kasem save long tingting blong Jehova, hem i rere blong jenisim tingting blong hem. From samting ya, taem Konilias i askem Pita blong i kam long haos blong hem, Pita i “no talem wan samting,” be hem i go nomo. (Wok 10:​28, 29) Ale, hem i prij long Konilias mo olgeta long haos blong hem, mo oli tekem baptaes.—Wok 10:​21-23, 34, 35, 44-48.

8. ?Olsem wanem yumi save soemaot se yumi gat sem tingting olsem Jehova? (1 Pita 3:8 mo futnot)

⁸ Sam yia afta, Pita i leftemap tingting blong ol narafala Kristin blong olgeta evriwan oli “agri long wan tingting nomo.” (Ridim 1 Pita 3:8 mo futnot.) Sipos yumi ol man blong Jehova yumi traehad blong folem tingting blong Jehova long Baebol, bambae yumi naf blong agri long wan tingting nomo. Eksampol, Jisas i talem long ol man blong hem se oli mas putum Kingdom i stap fasples long laef blong olgeta. (Mat. 6:33) Traem tingbaot sipos wan pablisa long kongregesen blong yu i wantem mekem wok blong Jehova fultaem. Sipos yu gat sem tingting olsem Jehova, bambae yu no traem blong pulum hem blong gat wan gudfala laef long wol ya, be bambae yu leftemap tingting blong hem mo yu traem givhan long hem blong i kasem mak ya.

GAT TINGTING DAON

9-10. ?Olsem wanem Jisas i soemaot se hem i gat tingting daon?

⁹ Long naet bifo we Jisas i ded, hem i tijim Pita mo ol narafala aposol long wan impoten lesen, hemia blong gat tingting daon. Be bifo long taem ya, Jisas i bin sanem Pita mo Jon blong tufala i go rerem ples we bambae olgeta evriwan oli joen wanples long hem, blong mekem laswan kakae wetem Jisas. Bambae oli mas rerem tu wan besin mo ol tawel we bambae wan long olgeta i yusum blong wasem leg blong olgeta bifo we oli kakae. ?Be hu nao bambae i gat tingting daon blong mekem wok ya?

¹⁰ Jisas i soemaot se hem i gat tingting daon taem hem i glad nomo blong mekem wok ya. Ol aposol blong hem oli sek se hem i rere blong mekem wan wok we plante taem ol slef nao oli stap mekem. Jisas i tekemaot kot blong hem, i fasem wan tawel raon long weist blong hem, i putum wota long besin, mo i stat blong wasem leg blong olgeta. (Jon 13:​4, 5) Hem i wasem leg blong ol 12 aposol ya evriwan, wetem Judas tu, we biaen hem nao i salem Jisas. Ating wok ya i tekem plante taem, be Jisas i glad nomo blong mekem from we hem i gat tingting daon. Biaen Jisas i eksplenem long olgeta se: “?Yufala i kasem save samting ya we mi jes mekem? Yufala i singaot mi se ‘Tija’ mo ‘Masta,’ mo hemia i stret, from we mi mi Tija mo mi mi Masta. Taswe, sipos mi mi Masta mo mi Tija, be mi wasem leg blong yufala, yufala tu i mas stap waswasem leg blong yufala.”—Jon 13:​12-14.

11. ?Olsem wanem Pita i soemaot se hem i lanem blong gat tingting daon? (1 Pita 5:5) (Mo tu, yu luk pija.)

¹¹ Pita i soemaot se hem i lanem blong gat tingting daon olsem Jisas. Afta we Jisas i gobak long heven, Pita i mekem wan merikel taem hem i hilim wan man we leg blong hem i nogud stat taem hem i bon. (Wok 1:​8, 9; 3:​2, 6-8) Plante man oli kam blong luk samting we Pita i mekem. (Wok 3:11) ?Olsem wanem? ?Pita i letem ol narafala oli leftemap hem, from we hem i kamaot long wan kalja we ol man oli laekem se narafala i leftemap olgeta? Nogat. Pita i gat tingting daon mo i pulum ol narafala blong presem Jehova mo Jisas, taem hem i talem se: “Man ya we leg blong hem i nogud, yufala i luk hem mo yufala i save hem, be naoia hem i kam strong from nem blong Jisas, mo from we mitufala i bilif long nem ya.” (Wok 3:​12-16) Biaen, Pita i raetem wan leta we i pulum ol Kristin blong gat tingting daon. Ol tok we hem i yusum long leta ya, i mekem yumi tingbaot taem ya we Jisas i bin fasem wan tawel raon long weist blong hem mo i wasem leg blong ol aposol.—Ridim 1 Pita 5:5.

12. ?Yumi mas mekem wanem blong yumi save gohed blong gat tingting daon olsem Pita?

¹² Yumi tu yumi save lanem blong gat tingting daon olsem Pita. Wan man we i gat tingting daon, i no soemaot samting ya nomo long ol toktok blong hem. Tok ya we Pita i yusum blong tokbaot tingting daon, i joen tu wetem fasin blong yumi blong tingbaot yumi wan mo ol narafala. Taswe taem yumi mekem wan gudfala samting, yumi mekem from we yumi lavem Jehova mo ol man, be i no from we yumi wantem se narafala i leftemap yumi. Sipos yumi gat tingting daon, bambae yumi glad nomo blong mekem wok blong Jehova mo givhan long ol narafala, nating sipos oli no luk samting we yumi mekem.—Mat. 6:​1-4.

GAT “STRET TINGTING”

13. ?I minim wanem blong gat “stret tingting”?

¹³ ?I minim wanem blong gat “stret tingting”? (1 Pita 4:7) Wan Kristin we i gat stret tingting i traehad blong mekem ol desisen we oli laenap wetem tingting blong Jehova. Mo tu, hem i save se samting we i moa impoten, hemia blong fren gud oltaem wetem Jehova. Hem i no tinghae tumas long hem wan, mo hem i save se i gat plante samting we hem i no save. Mo hem i soemaot se hem i dipen long Jehova, taem hem i prea oltaem long hem mo i askem hem blong i lidim hem.a

14. ?Pita i mekem wanem we i soemaot se hem i no dipen long Jehova?

¹⁴ Long naet bifo we Jisas i ded, hem i givim woning long ol disaepol blong hem se: “Long naet ya, bambae yufala evriwan i stambol from samting we bambae i hapen long mi.” Be Pita i trastem hem wan tumas, mo i talem se: “Maet ol narafala ya bambae oli stambol from samting we i hapen long yu. !Be mi, bambae mi neva stambol!” Long sem naet ya, Jisas i givim advaes long sam long ol disaepol blong hem se: “Yufala i mas gohed blong lukaot gud oltaem mo yufala i mas prea oltaem.” (Mat. 26:​31, 33, 41) Sipos Pita i bin folem advaes ya, bambae hem i gat strong tingting blong talemaot se hem i wan disaepol blong Jisas. Be defren olgeta, Pita i talem se hem i no save Jisas, mo biaen hem i harem nogud tumas from.—Mat. 26:​69-75.

15. Long naet bifo we Jisas i ded, ?hem i mekem wanem blong gohed blong gat stret tingting?

¹⁵ Jisas i dipen fulwan long Jehova. Nating se hem i stret gud olgeta, be long naet bifo we hem i ded, hem i prea plante taem. Hemia i mekem se hem i gat strong tingting blong mekem samting we Jehova i wantem. (Mat. 26:​39, 42, 44; Jon 18:​4, 5) I sua se gudfala eksampol blong Jisas blong prea plante taem long naet ya i givhan bigwan long Pita.

16. ?Olsem wanem Pita i soemaot se hem i gat stret tingting? (1 Pita 4:7)

¹⁶ Sloslo, Pita i lanem blong dipen moa long Jehova tru long prea. Taem Jisas i laef bakegen, hem i talem long Pita mo ol narafala aposol se bambae oli kasem tabu spirit, nao bambae oli naf blong talemaot gud nius. Be Jisas i askem olgeta blong wet long Jerusalem, go kasem taem we hem i givim tabu spirit long olgeta. (Luk 24:49; Wok 1:​4, 5) ?Pita i mekem wanem taem hem i stap wet? Pita mo ol narafala Kristin “oli stap joen oltaem blong prea.” (Wok 1:​13, 14) Biaen, long faswan leta we Pita i raetem, hem i leftemap tingting blong ol narafala Kristin blong oli gat stret tingting, mo dipen long Jehova tru long prea. (Ridim 1 Pita 4:7.) Yes, Pita i lanem blong dipen long Jehova, mo hem i kam olsem wan bigfala pos long kongregesen.—Gal. 2:9.

17. Nating sipos yumi gat save o gudhan long sam samting, ?be yumi mas gohed blong mekem wanem? (Mo tu, yu luk pija.)

¹⁷ Sipos yumi wantem gat stret tingting, yumi mas prea long Jehova oltaem. Yumi mas mekem olsem nating sipos yumi gat save o gudhan long sam samting. Taswe taem yumi mas mekem sam impoten desisen, yumi mas prea long Jehova mo trastem se hem nao i save lidim yumi long rod we i beswan.

18. ?Yumi gat strong tingting blong mekem wanem?

¹⁸ Yumi glad tumas se Jehova i wokem yumi we yumi naf blong folem ol fasin blong hem. (Jen. 1:26) I tru, yumi no naf blong mekem olsem long fasin we i stret gud olgeta. (Aes. 55:9) Be olsem Pita, yumi wantem gohed blong gat sem tingting olsem Jehova, gat tingting daon, mo gat stret tingting.