STADI 18
SINGSING 65 !Yumi Mas Gohed Gud!
Ol Yangfala Brata, Folem Eksampol Blong Mak Mo Timoti
“I gud yu tekem Mak i kam wetem yu, from we hem i save givhan long mi long minista wok ya.”—2 TIM. 4:11.
BIGFALA TINGTING
Long stadi ya, bambae yumi tokbaot eksampol blong Mak mo Timoti we i save givhan long ol yangfala brata, blong wokem ol fasin we oli nidim blong mekem moa long wok blong Jehova, mo givhan long ol brata mo sista.
1-2. ?Wanem i save blokem Mak mo Timoti blong mekem moa long wok blong Jehova?
OL YANGFALA brata, ?yufala i wantem mekem moa long wok blong Jehova mo givhan long ol brata mo sista? I sua se yes. !I gud tumas blong luk plante yangfala brata we oli glad nomo blong givhan long ol narafala! (Sam 110:3) Be samtaem, i no isi blong mekem olsem. ?Yu yu fraet blong mekem moa long wok blong prij from yu no save se laef blong yu bambae i olsem wanem? ?Yu yu no agri blong mekem wan wok we oli givim long yu from yu harem se yu no naf blong mekem? Sipos i olsem, i no yu wan nomo we yu harem olsem.
2 Mak mo Timoti tu i gat sem filing olsem. Be tufala i no letem ol samting ya i stopem tufala blong mekem moa long wok blong Jehova. I luk olsem se Mak i stap laef wetem mama blong hem long wan gudfala haos, taem aposol Pol mo Banabas i askem hem blong i folem tufala long faswan misinari trip blong tufala. (Wok 12:12, 13, 25) Mak i lego gudfala laef we hem i gat blong i save mekem moa long wok blong prij. Fastaem, hem i muv i go long Antiok. Biaen, hem i folem Pol mo Banabas blong go long ol narafala ples we i longwe. (Wok 13:1-5) Timoti tu i stap laef wetem perens blong hem, taem Pol i askem hem blong i folem hem long wok blong prij. Be from we Timoti i yang mo i no gat ekspiriens, hem i save gat tingting ya se hem i no naf blong folem Pol. (Skelem wetem 1 Korin 16:10, 11 mo 1 Timoti 4:12.) Nating se i olsem, hem i agri blong folem Pol, mo from samting ya hem i kasem plante blesing.—Wok 16:3-5.
3. (1) ?Wanem i soemaot se Pol i laekem Mak mo Timoti? (2 Timoti 4:6, 9, 11) (Mo tu, yu luk ol pija.) (2) ?Wanem ol kwestin we bambae yumi tokbaot long stadi ya?
3 Nating se Mak mo Timoti i yangfala nomo, be tufala i lanem blong mekem ol defdefren wok insaed long kongregesen. Pol i glad tumas long tufala yang man ya, taswe hem i wantem se tufala i stap klosap long hem, taem hem i save se i no longtaem bambae hem i ded. (Ridim 2 Timoti 4:6, 9, 11.) ?Wanem ol gudfala fasin we Mak mo Timoti i gat we i mekem se Pol i laekem tufala? ?Olsem wanem ol yangfala brata oli save folem fasin blong tufala? ?Mo olsem wanem ol advaes blong Pol i save givhan long ol yangfala brata tede?
Pol i laekem Mak mo Timoti from we tufala i mekem gud ol wok blong tufala, nating se tufala i yangfala (Haf 3)b
FOLEM EKSAMPOL BLONG MAK WE I GLAD BLONG MEKEM WOK
4-5. ?Olsem wanem Mak i soemaot se hem i glad blong givhan long ol narafala?
4 Taem yumi mekem wok blong givhan long ol narafala, hemia i min se yumi wok had blong halpem olgeta mo gohed blong mekem olsem nating se samtaem i had. Mak i soemaot wan gudfala eksampol long saed ya. Taem Pol i no wantem tekem Mak blong i folem hem long seken misinari trip blong hem, i sua se Mak i harem nogud tumas. (Wok 15:37, 38) Be hemia i no stopem Mak blong givhan long ol brata mo sista.
5 Mak i agri blong folem kasen blong hem Banabas blong mekem wok blong Jehova long wan narafala ples. Samwe 11 yia afta, Mak i wan long olgeta we i givhan long Pol taem hem i kalabus faswan taem long Rom. (Flm. 23, 24) Pol i glad tumas long Mak, taswe hem i talem se Mak i “givhan bigwan” long hem.—Kol. 4:10, 11.
6. Taem Mak i joen wetem olgeta we oli bigman long Kristin fasin, ?olsem wanem hemia i givhan long hem? (Yu luk futnot.)
6 Mak i lanem plante samting taem hem i joen wetem olgeta we oli bigman long Kristin fasin. Afta we Mak i spenem sam taem wetem Pol long Rom, hem i go long Babilon blong wok wetem aposol Pita. Tufala i fren gud, taswe Pita i singaot Mak se “pikinini blong mi.” (1 Pita 5:13) Taem tufala i spenem taem tugeta, i sua se Pita i tokbaot plante nambawan samting long saed blong laef blong Jisas mo wok blong prij we hem i mekem, we biaen Mak i raetemdaon long Gospel blong hem.a
7. ?Olsem wanem Seung-Woo i folem eksampol blong Mak? (Mo tu, yu luk pija.)
7 Mak i gohed blong stap bisi long wok blong Jehova, mo hem i spenem plante taem wetem olgeta we oli bigman long Kristin fasin. ?Olsem wanem yu save folem eksampol blong Mak? Sipos yu no kasem wan wok insaed blong kongregesen, i gud yu gat longfala tingting mo yu gohed blong lukaot rod blong yu save mekem moa long wok blong Jehova, mo givhan long kongregesen. Traem tingbaot eksampol blong Seung-Woo, we naoia hem i wan elda. Taem hem i yangfala, oltaem hem i stap skelem hem wan wetem ol narafala brata. Sam long ol yangfala brata ya oli kasem ol wok long kongregesen fastaem long hem. Seung-Woo i harem nogud tumas, taswe hem i tokbaot samting ya long ol elda. Ale, wan elda i talem long hem blong i gohed blong mekem wanem we hem i naf blong mekem blong givhan long kongregesen, nating se oli no luksave ol samting we hem i stap mekem. Seung-Woo i folem advaes ya, mo hem i stat blong halpem ol olfala mo olgeta we oli nidim help blong go long ol miting. Taem hem tingtingbak, hem i talem se: “Naoia mi kasemsave se i minim wanem blong givhan moa long ol narafala. Mi kasem bigfala glad taem mi mekem sam samting blong givhan long ol narafala.”
?From wanem i gud we ol yangfala brata oli spenem taem wetem olgeta we oli bigman long Kristin fasin? (Haf 7)
FOLEM EKSAMPOL BLONG TIMOTI WE I SOEMAOT LAV LONG OL NARAFALA
8. ?From wanem Pol i jusum Timoti blong i folem hem? (Filipae 2:19-22)
8 Pol i nidim ol brata we oli gat strong tingting blong oli folem hem, taem hem i gobak long ol taon we ol man oli bin agensem hem. Fastaem, hem i jusum wan brata we i mekem wok blong Jehova plante yia finis blong i folem hem, hemia Saelas. (Wok 15:22, 40) Biaen, hem i jusum Timoti tu blong i folem hem. ?From wanem Pol i jusum Timoti blong i folem hem? Wan risen, hemia se Timoti i gat gudnem. (Wok 16:1, 2) Mo tu, Timoti i tingbaot ol narafala.—Ridim Filipae 2:19-22.
9. ?Olsem wanem Timoti i soemaot se hem i tingbaot ol brata mo sista?
9 Stat taem Timoti i folem Pol, hem i soemaot se hem i tingbaot moa ol narafala i bitim hem wan. From samting ya, Pol i trastem Timoti mo hem i letem hem i stap long Berea blong leftemap tingting blong ol niufala brata mo sista long ples ya. (Wok 17:13, 14) Long taem ya, i sua se Timoti i lanem plante samting long Saelas, from we hem tu i stap long Berea. Samtaem biaen, Pol i sanem Timoti i go hem wan long Tesalonaeka blong i mekem ol brata mo sista long ples ya oli kam strong. (1 Tes. 3:2, fut.) Long ol nekiswan 15 yia, Timoti i lanem blong kasemsave filing blong olgeta we oli stap safa, mo hem i “krae wetem olgeta” we oli krae. (Rom 12:15; 2 Tim. 1:4) ?Olsem wanem ol yangfala brata oli save folem eksampol blong Timoti?
10. ?Olsem wanem Woo Jae i lanem blong soemaot se hem i tingbaot ol narafala?
10 Wan brata we nem blong hem Woo Jae i lanem blong soemaot se hem i tingbaot ol narafala. Taem Woo Jae i yangfala, hem i faenem i had blong storian wetem ol brata mo sista we oli olfala moa long hem. Taswe taem hem i mitim olgeta long Haos Kingdom, hem i talem halo long olgeta nomo mo i wokbaot i go. Ale, wan elda i talem long hem se hem i save statem storian wetem ol narafala, sipos hem i tokbaot wan samting we hem i laekem long saed blong olgeta. Elda ya i talem long hem tu blong i tingbaot samting we ol narafala oli laekem blong tokbaot. Woo Jae i folem ol advaes ya. Mo naoia we hem i kam wan elda, hem i talem se: “Naoia mi luk se mi save storian gud wetem olgeta we oli gat ol defdefren yia. Mi glad se mi naf blong kasemsave ol samting we ol narafala oli stap fesem. Mo hemia i mekem se mi naf blong givhan moa long ol brata mo sista.”
11. ?Ol yangfala brata oli save mekem wanem blong soemaot se oli tingbaot ol narafala long kongregesen? (Mo tu, yu luk pija.)
11 Ol yangfala brata, yufala tu i save lanem blong tingbaot ol narafala. Taem yufala i go long ol miting, i gud yufala i toktok long evriwan, hemia i minim ol olfala mo ol yangfala tu. Askem sipos oli oraet, mo lesin gud long olgeta. Hemia bambae i givhan long yu blong save olsem wanem blong halpem olgeta. Maet bambae yu luksave se wan olfala kapol i nidim help blong yusum JW Library® app. O maet yu faenemaot se i no gat wan blong prij wetem olgeta. ?Olsem wanem? ?Yu save givhan long olgeta blong yusum JW Library o mekem plan blong prij wetem olgeta? Taem yu tekem faswan step blong halpem ol narafala, yu stap soemaot wan gudfala eksampol long kongregesen.
Ol yangfala brata oli save halpem kongregesen long plante defren rod (Haf 11)
OL ADVAES BLONG POL OLI SAVE HALPEM YU
12. ?Ol yangfala brata oli save mekem wanem blong ol advaes blong Pol i givhan long olgeta?
12 Pol i givim ol gudfala advaes long Timoti blong halpem hem blong i glad long laef blong hem, mo blong finisim gud minista wok blong hem. (1 Tim. 1:18; 2 Tim. 4:5) Ol advaes blong Pol oli save givhan tu long yufala ol yangfala brata tede. ?Be yufala i save mekem wanem blong ol advaes ya i givhan long yufala? I gud yufala i ridim tufala leta we Pol i raetem i go long Timoti olsem se hem i raetem i kam long yufala, mo traem luk ol advaes we yufala i save folem long laef blong yufala. Naoia bambae yumi tokbaot sam long ol advaes ya we hem i givim.
13. ?Yumi mas mekem wanem blong fasgud long Jehova?
13 “Yu mas trenem yu blong yu kasem mak ya, hemia blong yu fasgud long God.” (1 Tim. 4:7b) ?I minim wanem blong fasgud long God? Hemia i min se yu gat wan spesel frensip wetem God mo yu wantem mekem samting we hem i glad long hem. From we yumi no bon wetem fasin ya, yumi mas traehad blong wokem. Yumi luksave samting ya long tok we Pol i talem. Grik tok we oli tanem i kam “trenem yu,” plante taem oli yusum blong tokbaot trening we ol man blong resis oli mas mekem blong rere from wan resis. Ol man blong resis ya oli mas blokem ol samting we oli wantem blong oli save winim resis. Long sem fasin, yumi tu yumi mas blokem ol samting we yumi nomo i wantem, blong yumi save wokem ol fasin we bambae i pulum yumi i kam klosap long Jehova.
14. ?Wanem mak blong yumi taem yumi ridim Baebol? Talem wan eksampol.
14 Taem yu stap traehad blong ridim Baebol evri dei, i gud yu tingbaot se mak blong yu i blong kam klosap long Jehova. Eksampol, ?yu yu lanem wanem long saed blong Jehova taem yu ridim stori blong Jisas we i toktok long wan yangfala rijman? (Mak 10:17-22) Yang man ya i bilif se Jisas i Mesaea, be hem i no gat strong tingting blong folem hem. Nating se i olsem, Jisas “i lavem hem tumas” mo i toktok kaen long hem. Jisas i mekem olsem from hem i wantem se yang man ya i mekem wan waes desisen. Mo tu, Jisas i stap soemaot se Jehova i lavem yang man ya. (Jon 14:9) Taem yu stap ridim stori ya, askem yu wan se: ‘?Mi mas mekem wanem blong mi save kam klosap long Jehova mo givhan moa long ol narafala?’
15. ?From wanem wan yangfala brata i mas soemaot gudfala eksampol? Talem wan eksampol. (1 Timoti 4:12, 13)
15 “Long fes blong ol man we oli holemstrong long God, yu mas soemaot gudfala eksampol.” (Ridim 1 Timoti 4:12, 13.) Pol i talem long Timoti se i no naf nomo blong hem i gat gudhan blong rid mo tij, be hem i mas wokem tu ol fasin olsem lav, bilif, mo gat klin fasin. ?From wanem? Hemia from we eksampol blong yumi i gat bigfala paoa i bitim ol toktok blong yumi. Traem tingbaot sipos oli askem yu blong mekem wan tok, blong tokbaot olsem wanem yumi save gat strong tingting long wok blong prij. Ating bambae i isi moa long yu blong tokbaot topik ya, sipos yu stap mekem bes blong yu long wok blong prij. Yes, ol man bambae oli glad moa blong folem wanem we yu talem long tok blong yu, sipos oli luk se yu yu stap mekem samting we yu talem.—1 Tim. 3:13.
16. (1) ?Wanem ol faef samting we wan yangfala Kristin i save mekem blong soemaot wan gudfala eksampol? (2) ?Olsem wanem wan yangfala brata i save soemaot gudfala eksampol “long ol toktok” blong hem?
16 Long 1 Timoti 4:12, Pol i tokbaot faef samting we wan yangfala brata i save mekem blong hem i save soemaot wan gudfala eksampol long ol narafala. Long prapa stadi blong yu, i gud yu tekem taem blong stadi long ol wanwan samting ya. Sipos yu wantem soemaot gudfala eksampol “long ol toktok blong yu,” i gud yu tingbaot olsem wanem yu save yusum ol toktok blong yu blong givhan long ol narafala. Eksampol, sipos yu stap yet long haos wetem perens blong yu, i gud we oltaem yu talem tangkiu long tufala from samting we tufala i mekem blong yu. Afta long ol miting, yu save talem long olgeta we oli gat ol haf long taem ya, ol samting we yu laekem long ol tok blong olgeta. Mo tu, long taem blong ol miting, i gud yu traehad blong givim ol ansa long prapa toktok blong yu. Taem yu stap traehad blong soemaot gudfala eksampol long ol toktok blong yu, ol narafala bambae oli luksave se yu stap kam bigman long Kristin fasin.—1 Tim. 4:15.
17. ?Wanem i save halpem wan yangfala brata blong i kasem ol mak long saed blong spirit? (2 Timoti 2:22)
17 “Yu mas ronwe long ol samting we ol yangfala oli stap wantem tumas. Be yu mas traehad blong gat stret fasin.” (Ridim 2 Timoti 2:22.) Pol i talem long Timoti blong stap longwe long eni samting we i save stopem hem blong kasem ol mak long saed blong spirit, mo mekem se hem i no moa fren gud wetem Jehova. Maet yu luksave se yu stap spenem tumas taem long ol samting blong spel mo pleplei, nao yu no moa gat taem blong mekem moa long wok blong Jehova. Eksampol, traem tingbaot hamas taem yu stap spenem long spot, intenet, o blong plei ol video gem. ?Olsem wanem? ?Yu save yusum sam long ol taem we yu stap spenem blong mekem ol samting ya, blong mekem moa long wok blong Jehova? Maet yu save askem blong givhan blong fiksim Haos Kingdom o joen long wok blong prij long troli. Sipos yu joen long ol wok olsem, yu save gat plante fren we bambae oli halpem yu blong putum ol mak long saed blong spirit, mo wok had blong kasem olgeta.
YU SAVE KASEM PLANTE BLESING TAEM YU GIVHAN LONG OL NARAFALA
18. ?From wanem yumi save talem se Mak mo Timoti i glad long laef blong tufala?
18 Mak mo Timoti i lego plante samting blong tufala i save givhan moa long ol narafala. From samting ya, tufala i glad long laef blong tufala. (Wok 20:35) Mak i travel i go long plante ples blong i save givhan long ol brata mo sista. Mo tu, hem i raetemdaon ol nambawan samting we i hapen long laef blong Jisas mo wok blong prij we hem i mekem. Timoti i givhan long Pol blong stanemap ol kongregesen mo mekem ol brata mo sista oli kam strong. I sua se Jehova i luk ol samting we Mak mo Timoti i lego, blong tufala i save mekem moa long wok blong Jehova. Mo hemia i mekem Hem i glad tumas.
19. ?From wanem ol yangfala brata oli mas folemgud ol advaes ya we Pol i givim long Timoti, mo wanem i save kamaot from?
19 Long leta we Pol i raetem i go long Timoti, yumi luksave se hem i lavem Timoti tumas. Mo long tufala leta ya blong Pol, Jehova i soemaot tu se hem i lavem yufala ol yangfala brata, mo hem i wantem se yufala i glad long laef blong yufala. Taswe i gud yu folem ol advaes blong Pol mo yu traehad blong givhan moa long ol narafala. Sipos yu mekem olsem, bambae yu gat wan gudfala laef naoia, mo bambae yu save “holemtaet laef ya we i prapa wan,” we bambae i kamtru long fiuja.—1 Tim. 6:18, 19.
SINGSING 80 God i Gud Tumas, Yu Traem Trastem Hem
a Pita i wan man we i no fraet blong soemaot ol filing blong hem. Taswe, i isi blong hem i eksplenem long Mak ol samting we Jisas i talem mo i mekem, mo ol filing blong hem tu. Maet hemia nao from wanem taem Mak i raetem stori blong Jisas, oltaem hem i tokbaot ol filing blong Jisas mo ol samting we hem i mekem.—Mak 3:5; 7:34; 8:12.
b PIJA: Mak i mekem sam samting blong givhan long Pol mo Banabas long misinari trip blong tufala. Timoti i glad nomo blong visitim wan kongregesen, blong leftemap tingting blong ol brata mo sista mo mekem oli strong.