Halpem Ol Baebol Stadi Blong Oli Tekem Desisen Blong Folem Trutok

1-2. (1) ?From wanem sam Baebol stadi oli fraet blong tekem desisen blong folem trutok? (2) ?Bambae yumi tokbaot wanem long stadi ya?

?I GAT sam samting we i bin mekem se yu fraet blong kam wan Witnes blong Jehova? Maet yu fraet se ol man long ples blong wok, ol fren, o ol famle blong yu bambae oli agensem yu. O maet yu harem se i had tumas blong folem ol loa blong Jehova. Sipos yu bin gat ol filing olsem, bambae yu naf blong kasemsave long filing we ol Baebol stadi blong yu oli gat, we i mekem se oli fraet blong mekem desisen blong folem trutok.

² Jisas i kasemsave se ol filing olsem, oli save blokem wan man blong i no mekem wok blong Jehova. (Mat. 13:​20-22) Nating se i olsem, Jisas i gohed blong givhan long olgeta we oli fraet blong folem hem. Hem i soemaot wan gudfala eksampol long yumi, olsem wanem blong halpem ol man olsem blong oli (1) luksave samting we i blokem olgeta, (2) mekem lav we oli gat long Jehova i kam strong moa, (3) putum Jehova fasples, mo (4) rere from fasin agens. ?Olsem wanem yumi save folem ol fofala samting ya taem yumi yusum buk ya !Enjoem Laef Olwe! blong givhan long ol Baebol stadi blong oli tekem desisen blong folem trutok?

HALPEM BAEBOL STADI BLONG I LUKSAVE SAMTING WE I BLOKEM HEM

3. ?Wanem samting we maet i blokem Nikodimas blong i kam wan disaepol blong Jisas?

³ Nikodimas i wan rula blong ol man Jiu, mo i gat wan samting we i blokem hem blong kam wan disaepol blong Jisas. Sikis manis nomo afta we Jisas i stat blong prij, Nikodimas i luksave se God nao i sanem hem. (Jon 3:​1, 2) Nating se i olsem, Nikodimas i jusum blong go luk Jisas long naet, from we hem i “fraet long ol man Jiu.” (Jon 7:13; 12:42) Maet hem i fraet se bambae hem i save lusum haenem we hem i gat, sipos hem i kam wan disaepol blong Jisas.a

4. ?Olsem wanem Jisas i givhan long Nikodimas blong i kasemsave samting we God i wantem hem blong i mekem?

⁴ Nikodimas i save Loa blong Moses, be hem i nidim yet we narafala i givhan long hem blong i kasemsave samting we Jehova i wantem hem blong i mekem. ?Olsem wanem Jisas i givhan long hem? Jisas i rere nomo blong yusum taem blong hem blong givhan long Nikodimas, nating se hem i kam long naet. Jisas i talemaot klia samting we Nikodimas i mas mekem blong hem i save kam wan disaepol: hem i mas tanem tingting from ol sin blong hem, i baptaes long wota, mo i mas soemaot se hem i bilif long Pikinini blong God.—Jon 3:​5, 14-21.

5. ?Olsem wanem yumi save halpem wan Baebol stadi blong i luksave samting we i stap blokem hem?

⁵ Nating se wan Baebol stadi i save gud ol vas blong Baebol, be maet hem i nidim help blong luksave samting we i stap blokem hem blong mekem wok blong Jehova. Maet hemia wok blong hem o famle i agensem hem. Olsem Jisas, i gud yu spenem taem wetem stadi blong yu. Maet yu save singaotem hem blong i kam kakae wetem yu o blong yufala i go samples tugeta. Olsem nao, bambae i isi moa blong hem i storian, nao yu naf blong luksave samting we i stap blokem hem mo givhan long hem blong i mekem ol jenis, i no blong mekem yu yu glad, be blong soemaot se hem i rili lavem Jehova.

6. ?Olsem wanem yu save halpem stadi blong yu blong i gat strong tingting blong folem trutok? (1 Korin 16:13)

⁶ Taem wan Baebol stadi i trastem se Jehova bambae i halpem hem blong i obei long ol loa blong hem, bambae hem i gat strong tingting blong folem ol samting we hem i stap lanem. (Ridim 1 Korin 16:13.) Wok we yumi mekem blong tijim ol man long Baebol, i olsem wan tija long skul. Taem yu tingtingbak long ol dei we yu stap skul yet, ?yu yu laekem moa weswan tija? Maet yu laekem moa tija we i gat longfala tingting long yu, mo i givhan long yu blong trastem se yu naf blong kam gud moa long ol wok blong yu. Long sem fasin, wan gudfala Baebol tija i no jes tijim stadi blong hem long samting we God i wantem yumi blong mekem, be hem i givhan long hem tu blong i trastem se Jehova i save halpem hem blong mekem ol jenis long laef blong hem. ?Olsem wanem yu save mekem samting ya?

HALPEM BAEBOL STADI BLONG I MEKEM LAV WE HEM I GAT LONG JEHOVA I KAM STRONG

7. ?Olsem wanem Jisas i halpem olgeta we oli lesin long hem blong oli lavem Jehova moa?

⁷ Jisas i save se sipos ol disaepol oli lavem God, bambae i isi blong oli folem ol samting we oli stap lanem. Oltaem hem i tijim olgeta long ol samting we i save givhan long olgeta blong oli lavem Jehova moa. Eksampol, hem i talem se Jehova i olsem wan papa we i stap givim ol gudfala samting long ol pikinini blong hem. (Mat. 7:​9-11) Maet sam long ol man ya we oli stap lesin long Jisas, papa blong olgeta i no soemaot lav long olgeta olsem. Traem tingbaot filing blong olgeta taem Jisas i tokbaot parabol blong wan papa we i gat sore, we i glad blong welkamem bak boe blong hem we i bin mekem plante nogud samting. I sua se oli luksave se Jehova i lavem tumas yumi we yumi olsem ol pikinini blong hem.—Luk 15:​20-24.

8. ?Olsem wanem yu save halpem stadi blong yu blong i lavem Jehova moa?

⁸ Yu tu yu save halpem stadi blong yu blong i lavem Jehova moa, taem yu tijim hem long ol gudfala fasin blong God. Evri taem we yutufala i stadi, givhan long hem blong i luksave se samting we hem i stap lanem, i soemaot se Jehova i lavem hem. Eksampol, taem yutufala i tokbaot ransom, soemaot klia long hem se samting we Jehova i mekem, i blong givhan long hem. (Rom 5:8; 1 Jon 4:10) Taem wan stadi i kasemsave se Jehova i lavem hem, hemia bambae i pulum hem blong i lavem Jehova moa.—Gal. 2:20.

9. ?Wanem i halpem Michael blong i jenisim laef blong hem?

⁹ Traem tingbaot Michael we i blong Indonesia. Hem i gruap long trutok be hem i no baptaes. Taem hem i gat 18 yia, hem i go long wan narafala kantri blong wok olsem wan draeva. Samtaem afta, hem i gobak mo i mared. Biaen, hem i lego famle blong hem i stap, mo i gobak long wok blong hem. Long ol taem ya, waef mo gel blong hem i stat blong stadi Baebol, mo oli gohed gud. Be afta we mama blong Michael i ded, hem i kambak long haos blong lukaot long papa blong hem, mo hem i agri blong stadi Baebol. Taem hem mo tija blong hem i stadi long haf ya “Digim Moa” long lesen 27 blong buk ya !Enjoem Laef Olwe!, hemia i tajem hat blong hem. Mo hem i krae taem hem i tingbaot se Jehova i rili harem nogud taem i luk Boe blong Hem i safa. Hem i luksave se Jehova mo Jisas i lavem hem tumas, nao hemia i pulum hem blong jenisim laef blong hem mo i baptaes.

HALPEM BAEBOL STADI BLONG I PUTUM JEHOVA FASPLES

10. ?Olsem wanem Jisas i givhan long ol faswan disaepol blong oli putum Jehova fasples? (Luk 5:​5-11) (Mo tu, yu luk pija.)

¹⁰ Ol faswan disaepol oli luksave se Jisas nao i Mesaea, be oli nidim yet we narafala i halpem olgeta blong putum wok blong Jehova fasples. Pita mo Andru i kam ol disaepol blong Jisas blong plante manis finis, bifo we Jisas i askem tufala blong tufala i folem hem fultaem. (Mat. 4:​18, 19) Tufala i gat bisnes blong kasem fis, mo i luk olsem se tufala i wok wetem Jemes mo Jon. (Mak 1:​16-20) Taem Pita mo Andru i “livim net blong tufala” blong folem Jisas, i sua se tufala i stap tingbaot yet blong givim samting we famle blong tufala i nidim. ?Wanem i pulum tufala blong putum Jehova fasples? Buk blong Luk i talem se Jisas i bin mekem wan merikel, we i mekem tufala i trastem se Jehova i naf blong givim samting we famle blong olgeta i nidim.—Ridim Luk 5:​5-11.

11. ?Olsem wanem ekspiriens blong yumi i save mekem bilif blong wan Baebol stadi i kam strong?

¹¹ Tede, yumi no save mekem merikel olsem Jisas, be yumi save tokbaot ol ekspiriens we i soemaot se Jehova i stap sapotem olgeta we oli putum Hem fasples long laef blong olgeta. Eksampol, ?yu yu tingbaot olsem wanem Jehova i bin halpem yu taem yu jes stat blong go long ol miting? Maet wok blong yu i blokem yu blong go long ol miting, ale yu bin toktok wetem bos blong yu blong yu no wok ovataem. Taem yu tokbaot ekspiriens blong yu long stadi blong yu, yu save talem long hem se bilif blong yu i kam strong moa, taem yu luk se Jehova i givhan long yu blong putum hem fasples.

12. (1) ?From wanem yumi mas askem ol defren pablisa blong oli folem yumi long wan Baebol stadi? (2) ?Olsem wanem yu save yusum ol video blong tijim gud stadi blong yu? Talem wan eksampol.

¹² Baebol stadi blong yu bambae i glad tu blong harem olsem wanem ol narafala Kristin oli putum Jehova fasples long laef blong olgeta. Taswe, i gud yu singaot ol defdefren brata mo sista oli joenem yu long Baebol stadi. Askem olgeta blong oli tokbaot olsem wanem oli kam long trutok, mo se oli mekem wanem blong putum wok blong Jehova fasples long laef blong olgeta. Mo tu, i gud yu mo Baebol stadi blong yu i tekem taem blong wajem ol video long haf ya “Digim Moa” mo haf ya “Faenemaot” we i stap long buk ya !Enjoem Laef Olwe!. Eksampol, taem yutufala i stadi long lesen 37, yu save tokbaot ol impoten poen long video ya Jehova Bambae i Givim Samting We Yumi Nidim.

HALPEM BAEBOL STADI BLONG I RERE FROM FASIN AGENS

13. ?Olsem wanem Jisas i rerem ol disaepol blong hem from fasin agens?

¹³ Jisas i talem plante taem long ol man blong hem se ol man bambae oli agensem olgeta, hemia i minim ol famle blong olgeta tu. (Mat. 5:11; 10:​22, 36) Klosap long taem we Jisas i ded, hem i givim woning long ol disaepol blong hem se maet ol man bambae oli save kilim olgeta tu i ded. (Mat. 24:9; Jon 15:20; 16:2) Taswe hem i talem long olgeta se oli mas lukaot gud taem oli stap prij. Eksampol, hem i talem long olgeta se oli no mas agiu wetem eni man we i tok agensem olgeta from bilif blong olgeta, mo oli mas lukaot gud long samting we oli talem mo mekem, blong oli save gohed blong prij.

14. ?Olsem wanem yumi save rerem wan Baebol stadi from fasin agens? (2 Timoti 3:12)

¹⁴ Yumi save rerem wan Baebol stadi from fasin agens, taem yumi tokbaot samting we maet olgeta long wok, ol fren, mo ol famle, oli save talem. (Ridim 2 Timoti 3:12.) Maet sam man long wok bambae oli jikim hem from we hem i jenisim laef blong hem. O maet ol famle o ol narafala bambae oli tok nogud long hem from bilif blong hem. Sipos yu kwik blong tokbaot ol samting ya wetem hem, bambae hem i save samting we bambae hem i mas talem o mekem, taem hem i fesem fasin agens.

15. ?Wanem i save halpem wan Baebol stadi taem ol famle oli agensem hem?

¹⁵ Sipos ol famle blong Baebol stadi blong yu oli stap agensem hem, i gud yu givhan long hem blong tingbaot from wanem oli kros. Maet oli no laekem ol Witnes blong Jehova, o oli ting se ol Witnes oli stap giaman long hem. Jisas tu, ol famle blong hem oli agensem hem. (Mak 3:21; Jon 7:5) I gud yu tijim Baebol stadi blong yu blong i gat longfala tingting, mo i toktok kaen long ol narafala mo long ol famle blong hem tu.

16. ?Olsem wanem yumi save halpem wan Baebol stadi, taem hem i wantem eksplenem bilif blong hem?

¹⁶ Nating sipos ol famle blong wan Baebol stadi oli intres long trutok, i nogud hem i traem eksplenem evri samting wantaem, from we maet hemia i blokem olgeta blong lesin long hem nekis taem. Taswe i gud yu leftemap tingting blong hem, blong i talem smol samting nomo long saed blong bilif blong hem, blong mekem se nekis taem bambae oli wantem save moa. (Kol. 4:6) Hem i save talem long ol famle blong hem blong go long jw.org, olsem nao olgeta nomo oli save lanem moa long saed blong ol Witnes blong Jehova.

17. ?Olsem wanem yu save trenem wan Baebol stadi blong i save ansarem ol kwestin we maet ol man oli gat long saed blong ol Witnes blong Jehova? (Mo tu, yu luk pija.)

¹⁷ Maet yu save yusum haf ya “Kwestin We Plante Man Oli Stap Askem” we i stap long jw.org, blong givhan long Baebol stadi blong yu blong i rerem ol isi ansa blong ol kwestin we maet olgeta long wok o ol famle oli save askem. (2 Tim. 2:​24, 25) Long en blong wanwan lesen, tokbaot haf ya “Sam Man Oli Se” we i stap long buk ya !Enjoem Laef Olwe!, mo leftemap tingting blong Baebol stadi blong yu blong i lanem blong ansa long prapa toktok blong hem. Yu no mas fraet blong talem long hem olsem wanem hem i save kam gud moa long fasin blong hem blong eksplenem bilif blong hem. Sipos yutufala i mekem ol samting ya tugeta, bambae hem i naf blong tokbaot bilif blong hem.

18. ?Olsem wanem yu save halpem stadi blong yu blong i joen long wok blong prij? (Matiu 10:27)

¹⁸ Jisas i talem long ol disaepol blong hem blong oli talemaot gud nius. (Ridim Matiu 10:27.) Taem wan Baebol stadi i kwik blong joen long wok blong prij, hemia bambae i givhan long hem tu blong trastem Jehova kwiktaem. ?Olsem wanem yu save givhan long wan Baebol stadi blong i putum mak ya blong prij? Sipos kongregesen i talemaot se i gat wan kampen long wok blong prij, i gud yu leftemap tingting blong Baebol stadi blong i tingbaot samting we hem i mas mekem blong i save kam wan pablisa. I gud yu tokbaot long hem from wanem plante man oli faenem se i isi moa blong oli stat blong prij long ol taem olsem. Wan narafala samting we i save givhan long hem, hemia blong givim ol tok long miting blong medel wik. Sipos hem i kasem mak ya, bambae hem i gat strong tingting blong tokbaot ol bilif blong hem.

SOEMAOT SE YU TRASTEM BAEBOL STADI BLONG YU

19. ?Olsem wanem Jisas i soemaot se hem i trastem ol disaepol blong hem, mo olsem wanem yumi save folem eksampol blong hem?

¹⁹ Bifo we Jisas i go long heven, hem i talem long ol disaepol blong hem se wan dei bambae oli joen wetem hem bakegen. Be olgeta oli no kasemsave se Jisas i stap tokbaot taem ya we bambae oli go long heven. Nating se i olsem, Jisas i tingbaot nomo fasin blong olgeta blong holemstrong long hem. (Jon 14:​1-5, 8) Hem i save se oli nidim taem blong kasemsave long ol samting olsem hop ya blong laef long heven. (Jon 16:12) Yumi tu yumi save soemaot long ol Baebol stadi blong yumi, se yumi trastem se oli wantem mekem samting we i stret.

20. ?Olsem wanem wan sista long Malawi i soemaot se hem i trastem Baebol stadi blong hem?

²⁰ Yumi trastem se ol Baebol stadi blong yumi oli wantem mekem samting we i stret. Tingbaot eksampol blong wan sista long Malawi, we nem blong hem Chifundo. Hem i yusum buk ya !Enjoem Laef Olwe! blong stadi wetem wan yangfala woman we nem blong hem Alinafe. Taem tufala i finis blong tokbaot lesen 14, Chifundo i askem long hem se wanem tingting blong hem long fasin blong yusum ol pija long wosip. Alinafe i kros mo i talem se: “!Hemia i prapa desisen blong mi!” Chifundo i ting se bambae hem i no moa wantem stadi. Be hem i gohed blong stadi wetem Alinafe, from hem i trastem se wan dei bambae hem i kasemsave samting ya. Sam manis afta, Chifundo i askem long hem kwestin we i stap long lesen 34 we i se: “Kam kasem naoia, ?olsem wanem stadi long saed blong Baebol mo Jehova i givhan long yu?” Chifundo i tokbaot samting we Alinafe i talem, i se: “Hem i tokbaot plante nambawan poen. Wan long olgeta hemia se ol Witnes blong Jehova oli no stap mekem ol samting we Baebol i agensem.” Smoltaem afta, Alinafe i stop blong yusum ol pija long wosip, mo hem i kasem mak ya blong baptaes.

21. ?Olsem wanem yumi save givhan long wan Baebol stadi blong i tekem desisen blong folem trutok?

²¹ Nating se Jehova nao i stap mekem sid blong trutok i “gru” long hat blong ol man, be yumi tu yumi gat wan impoten wok blong givhan long ol Baebol stadi blong oli save gohed gud long trutok. (1 Kor. 3:​6, 7) Yumi no jes tijim olgeta blong oli save samting we God i wantem olgeta blong mekem, be yumi givhan long olgeta tu blong oli lavem Jehova moa. Mo tu, yumi givhan long olgeta blong soemaot lav we oli gat long Jehova, taem oli putum hem fasples. Mo yumi tijim olgeta olsem wanem blong dipen long Jehova, taem ol narafala oli agensem olgeta. Taem yumi soemaot se yumi trastem olgeta, yumi stap givhan long olgeta tu blong trastem se oli naf blong mekem samting we Jehova i wantem, mo tekem desisen blong folem trutok.