Long Ful Laef Blong Mitufala, Bigfala Tija i Tijim Mitufala Long Ol Impoten Lesen

EKSAMPOL BLONG PERENS BLONG MI

Long 1957, perens blong mi oli muvaot long Itali mo oli go stap long taon ya Kindersley, we i stap long Saskatchewan, Kanada. I no longtaem afta, tufala i lanem trutok mo hemia i kam impoten samting long laef blong mifala. Mi tingbaot se taem mi smol, samtaem famle blong mifala i spenem klosap fuldei long wok blong prij. From samting ya, samtaem mi stap tok plei se: “!Mi statem wok blong haftaem paenia taem mi gat eit yia!”

Nating se perens blong mi oli pua, be oli soemaot gudfala eksampol long mifala, from oli rere blong lego ol samting we oli gat blong mekem moa long wok blong Jehova. Eksampol, long 1963 tufala i salemaot plante samting blong mifala, blong mifala i save gat naf mane blong go long intenasnal asembli long taon ya Pasadena, long California, Yunaeted Stet. Long 1972, mifala i travel samwe 1,000 kilometa blong go stap long taon ya Trail, we i stap long British Columbia, long Kanada, blong prij long ol man Itali. Wok blong papa blong mifala i blong klinap mo mekem mentenens long wan stoa. Nating se hem i save mekem sam wok we i gud moa, be hem i jusum blong mekem wok ya, blong hem i save gat moa taem blong mekem wok blong Jehova.

Mi talem tangkiu long perens blong mi from we tufala i soemaot gudfala eksampol long mifala ol fo pikinini. Hemia faswan trening we i rerem mi blong mekem wok blong Jehova. Tufala i tijim mi long wan impoten lesen, hemia se: Sipos mi lukaot Kingdom fastaem, bambae Jehova i lukaot gud long mi.—Mat. 6:33.

MITUFALA I STATEM WOK BLONG JEHOVA FULTAEM

Long 1980, mi mared long Debbie, wan naesfala sista we i wantem tumas blong mekem moa long wok blong Jehova. Mitufala i wantem mekem wok blong Jehova fultaem, taswe tri manis afta we mitufala i mared, Debbie i stat blong paenia. Wan yia afta we mitufala i mared, mitufala i muv i go long wan smol kongregesen we i gat nid, mo mi tu mi stat blong paenia.

Afta we sam taem i pas, tingting blong mitufala i foldaon, mo mitufala i plan blong aot long ples ya. Ale, mitufala i storian wetem eria elda. Hem i soemaot se hem i lavem mitufala be i talem stret long mitufala se: “Yutufala tu i stap mekem se tingting blong yutufala i foldaon moa, from we yutufala i stap tingbaot nomo ol nogud samting we i hapen. I moa gud yutufala i traem faenem sam gudfala samting long ol brata mo sista long kongregesen, mo i sua se bambae yutufala i faenem.” Hemia stret advaes we mitufala i nidim. (Sam 141:5) Mitufala i kwik blong folem advaes ya, mo mitufala i luksave se i gat plante gudfala samting long kongregesen blong mitufala. Plante brata mo sista oli wantem mekem moa long wok blong Jehova, mo hemia i minim tu ol yangfala mo olgeta we hasban o waef blong olgeta i no stap long trutok. Mitufala i lanem wan impoten lesen, hemia se i impoten blong gat gudfala tingting oltaem, mo wet long Jehova blong i stretem ol problem we yumi fesem. (Maeka 7:7) Mitufala i glad bakegen mo ol samting oli kam gud moa.

Ol tija blong mifala long faswan paenia skul blong mitufala, oli bin mekem wok blong Jehova long ol narafala kantri bifo. Taem oli soem ol pija mo oli tokbaot ol hadtaem mo ol blesing we oli kasem long wok ya, hemia i pulum mitufala blong putum mak ya blong kam misinari.

Blong rerem mitufala blong kasem mak ya, long 1984 mitufala i muv i go long Quebec, we i stap bitim 4,000 kilometa longwe long British Columbia. Hemia i min se mitufala i mas lan long wan niufala kalja mo lanem wan niufala lanwis, hemia Franis. Mo long ples ya, plante taem mitufala i sot long mane. Wan taem, mitufala i no gat kakae. Ale, wan fama i letem mitufala i go pikimap ol haf poteto long garen blong hem. !Debbie i traem blong kukum ol poteto ya long defdefren stael! Nating se i no isi, be mitufala i traehad blong stap glad mo gohed blong wok strong. Mo mitufala i luk se Jehova i lukaot gud long mitufala.—Sam 64:10.

Wan dei, mitufala i sek se ol brata long Betel long Kanada oli ring mo oli askem mitufala blong go wok long ples ya. Long taem ya, mitufala i gat tu tingting from we mitufala i bin aplae finis blong go long Skul Blong Gilead. Nating se i olsem, mitufala i agri blong go. Taem mitufala i kasem Betel, mitufala i askem long Brata Kenneth Little, we i wan memba blong Branj Komiti, se: “?Olsem wanem long fom we mitufala i bin fulumap blong go long Gilead?” Hem i ansa se: “Yutufala i no wari long samting ya, bae yumi jes luk.”

Wan wik afta, mi mo Debbie i mas mekem wan desisen from we mitufala i kasem invetesen blong go long Gilead. Brata Little i talem long mitufala se: “Nomata wanem desisen we yutufala i mekem, samtaem bambae yutufala i tingtingbak se yutufala i sud jusum narawan. Be tufala wok ya tugeta i gud, mo Jehova i save blesem yutufala from.” Ale mitufala i jusum blong go long Gilead. Mo long ol yia we i pas, mitufala i luk se advaes blong Brata Little i tru. Plante taem, mitufala i serem advaes ya tu long ol narafala we oli mas jusum se weswan wok bambae oli mekem long wok blong Jehova.

MITUFALA I KAM MISINARI

Mitufala i glad tumas blong joen long namba 83 klas blong Gilead we oli mekem long Brooklyn, Niu Yok, long Eprel 1987. Long klas ya, mifala 24, mo Brata Ulysses Glass mo Brata Jack Redford, tufala nao i tij plante long klas blong mifala. Faef manis i flae kwiktaem nomo, mo mifala i graduet long 6 Septemba 1987. Ale, oli sanem mitufala wetem John mo Marie Goode i go long Haiti.

Long 1962, gavman i sanemaot ol laswan misinari long Haiti. Stat long taem ya, Gilead i no moa sanem ol misinari i go long ples ya. Be tri wik afta we mifala i graduet, mifala i go long Haiti blong prij wetem ol 35 pablisa long wan smol kongregesen we i stap long medel blong ol bigfala hil. Mitufala i yang mo mitufala i no gat plante ekspiriens, mo mitufala i stap mitufala nomo long haos blong misinari. Ol man long ples ya oli rili pua mo plante oli no save rid. Long taem ya we mifala i jes statem wok blong misinari, i gat ol trabol olsem ol man oli girap agensem gavman, oli faet, oli bonem ol samting we oli putum blokem rod, mo i gat ol saeklon.

Eksampol blong ol brata mo sista long Haiti we oli stanap strong mo oli gohed blong stap glad, i givhan bigwan long mitufala. Plante long olgeta, laef blong olgeta i no isi, be oli lavem Jehova mo wok blong prij. Wan olfala sista long ples ya i no save rid, be hem i save samwe 150 vas baehat. Ol trabol we i stap hapen evri dei, i mekem tingting blong mifala i strong blong talemaot se Kingdom nomo i save stretem ol trabol ya. Mitufala i glad tumas blong luk se sam long ol faswan Baebol stadi blong mitufala, oli kam ol fultaem paenia, ol spesel paenia, mo ol elda.

Taem mi stap long Haiti, mi mitim wan yangfala misinari blong Momon, we nem blong hem Trevor. Mi gat janis blong storian samtaem wetem hem long Baebol. Sam yia afta, mi sapraes se hem i raetem wan leta i kam long mi. Hem i talem se: “!Long nekis asembli bambae mi tekem baptaes! Mi wantem kambak long Haiti, mo mekem wok blong spesel paenia long sem ples we mi bin wok olsem misinari blong Momon.” Hemia nao samting we hem mo waef blong hem i mekem blong plante yia.

LONG YUROP MO LONG AFRIKA

Oganaesesen i sanem mitufala i go long Yurop, long wan ples we sloslo ol brata mo sista oli fri moa blong prij. Long 1992, mitufala i go stap long taon ya Ljubljana long Slovenia. Hemia i klosap long ples we perens blong mi i gruap long hem bifo we oli muv i go long Itali. Faet i stap gohed yet long ol ples we bifo oli singaotem se Yugoslavia. Fastaem, branj ofis long Vienna, Ostria, mo ol ofis long Zagreb, Kroesia, mo long Belgrade, Sebia, oli stap lukaot long wok blong prij long Yugoslavia. Be naoia oli wantem se ol kantri ya wanwan oli mas gat wan Betel.

Hemia i min se mitufala i mas lanem wan narafala lanwis mo lan long wan niufala kalja bakegen. Ol manples oli stap talem long mitufala se, “Jezik je težek,” we i min se “Lanwis ya i had.” !Mo i tru se i had! Be eksampol blong ol brata mo sista long ples ya we oli holemstrong long Jehova, mo oli rere blong folem ol jenis long oganaesesen, i leftemap tingting blong mitufala, mo mitufala i luk se Jehova i blesem olgeta from. Long taem ya, mitufala i luk bakegen se Jehova i stap stretem ol problem long stret taem. Ol lesen we mitufala i lanem bifo, oli givhan long mitufala taem mitufala i stap long Slovenia. Mo mitufala i lanem plante moa impoten lesen long ples ya.

Be biaen, i gat wan narafala jenis long laef blong mitufala. Long yia 2000 oli sanem mitufala i go long Aevori Kos, long Wes Afrika. Be long Novemba 2002, i gat faet long kantri ya, ale mitufala i aot long ples ya mo go stap long Sera Leon. Be long Sera Leon tu i gat wan faet we i gohed blong 11 yia, mo i jes finis bifo we mitufala i go. Mitufala i harem nogud from we mitufala i bin stap sot taem nomo long Aevori Kos. Be ol lesen we mitufala i lanem bifo, oli givhan long mitufala blong stap glad.

Long Sera Leon, plante man oli wantem save trutok. Taswe mitufala i tingbaot nomo wok blong prij, mo ol brata mo sista we oli bin stanap strong blong plante yia long taem we i gat faet. Olgeta oli no gat plante samting, be oli glad blong serem ol samting we oli gat. Wan sista i wantem givim sam klos long Debbie. Be taem hem i luk we Debbie i no wantem tekem ol klos ya, hem i talem se: “Long taem blong faet, ol brata mo sista long ol narafala kantri oli givhan long mifala. Naoia i taem blong mifala i givhan long yutufala.” Gudfala fasin blong ol brata mo sista long Sera Leon, i mekem mitufala tu i gat strong tingting blong givhan long ol narafala.

Sam taem afta, mitufala i gobak long Aevori Kos, be biaen i gat faet bakegen long ples ya. Taswe long Novemba 2004, mitufala i mas aot long ples ya long wan helikopta, we mitufala i karem wanwan basket nomo we hevi blong hem i kasem 10 kilo. Long naet ya, mitufala i mas slip nomo long floa long kamp blong ol soldia blong Franis, mo long nekis dei mitufala i flae i go long Swiselan. Mitufala i kasem branj ofis long samwe 12 klok long naet. Taem mitufala i kamtru, ol brata blong Branj Komiti, ol tija blong Ministeriol Trening Skul, mo ol waef blong olgeta oli welkamem gud mitufala. Oli hagem mitufala, mo oli givim kakae mo plante joklet blong Swiselan long mitufala. Samting we oli mekem i tajem hat blong mitufala.

Biaen, oli sanem mitufala i go smoltaem long Gana, mo taem faet i godaon long Aevori Kos, mitufala i gobak bakegen. Evritaem we i gat faet mo mitufala i mas ronwe, mitufala i fraet, mo i no isi taem i gat plante jenis olsem. Be kaen fasin blong ol brata mo sista, i givhan long mitufala blong gohed long wok blong mitufala. Nating se i nomol we ol brata mo sista oli soemaot lav, be mi mo Debbie i tinghae long evri smosmol samting we oli mekem blong mitufala. Biaen, mitufala i luksave se ol hadtaem we mitufala i bin fesem tu, oli olsem wan trening long mitufala.

LONG MEDEL IS

Long 2006, mitufala i kasem wan leta long wol hedkwota se bambae oli sanem mitufala i go long Medel Is. Long ples ya, mitufala i gat plante moa gudfala eksperiens, mitufala i fesem sam moa hadtaem, mo mitufala i mas lanem sam moa niufala lanwis mo kalja bakegen. I gat plante problem blong politik mo long ol relijen, mo mitufala i mas lan long samting ya. I naes blong joen wetem ol brata mo sista we oli kamaot long ol defdefren kalja mo oli toktok ol defdefren lanwis. Mitufala i luk se taem yumi folem ol advaes blong oganaesesen, yumi evriwan i joen gud. Mitufala i tinghae long ol brata mo sista long ples ya, from we plante long olgeta oli bin stanap strong nating se ol famle, ol yangfala long skul, ol man long ples blong wok, mo ol neba, oli agensem olgeta.

Long 2012, mitufala i go long spesel asembli long Tel Aviv, long Isrel. Afta long Lafet Blong Pentekos long yia 33 K.T., hemia faswan taem we ol man blong Jehova long ples ya oli mekem wan bigfala asembli olsem. !Mitufala i glad tumas blong joen long spesel taem ya!

Taem mitufala i stap long Medel Is, oganaesesen i sanem mitufala blong go visitim wan kantri we gavman long ples ya i putum tabu long wok blong yumi. Mitufala i tekem ol buk blong yumi i go, mitufala i joen long wok blong prij, mo long ol smol asembli we oli mekem. Nating se mifala i pas long ol ples we plante soldia oli holem ol tul blong faet mo oli stap jekem ol man, be mitufala i harem se mitufala i sef taem mitufala i stap wokbaot wetem sam pablisa long ples ya.

MITUFALA I GOBAK LONG AFRIKA

Long 2013, mitufala i kasem wan niufala wok bakegen, hemia blong wok long branj ofis long Kinshasa, long Kongo. Kongo i wan bigfala kantri we i gat ol naesfala ples, be i gat plante faet mo ol man oli rili pua. Fastaem mitufala i tingting se: “Mitufala i save gud Afrika. Bambae i no had tumas.” Be i gat plante samting yet we mitufala i mas lanem. Eksampol, samtaem mitufala i mas go long ol ples we i no gat ol rod o ol brij. Be mitufala i traem blong tingbaot nomo ol gudfala samting long ples ya, olsem gudfala fasin blong ol brata mo sista blong wok strong mo blong glad, nating se oli pua. Oli laekem tumas blong prij, mo oli traehad bigwan blong go long ol miting mo ol asembli. Mitufala i luk se Jehova i blesem wok blong Kingdom long ples ya. Mitufala i lanem plante impoten lesen long Kongo, mo mitufala i faenem plante moa gudfala fren we oli kam olsem ol famle blong mitufala.

Long en blong 2017, oli sanem mitufala i go long Saot Afrika. Branj ofis long ples ya i bigwan moa long ol narafala branj ofis we mitufala i bin stap long hem, mo ol wok we mitufala i kasem tu i niu long mitufala. Mitufala i mas lanem plante samting bakegen, be ol lesen we mitufala i lanem bifo i givhan long mitufala. Mitufala i lavem ol brata mo sista long ples ya we oli bin mekem wok blong Jehova blong plante yia finis. Mo i nambawan blong luk se ol brata mo sista long Betel oli wok gud tugeta, nating se kala blong skin blong olgeta i defdefren mo oli kamaot long ol defdefren kalja. I klia se Jehova i stap blesem ol man blong hem mo mekem se oli gat pis, from we oli stap traehad blong werem niufala fasin mo folem ol advaes blong Baebol.

Long ol yia we i pas, mi mo Debbie i gat janis blong mekem ol defdefren wok, lan long ol defdefren kalja, mo lanem ol niufala lanwis. I tru se samtaem i no isi, be oltaem Jehova i yusum oganaesesen blong hem mo ol brata mo sista blong mekem mitufala i haremsave se hem i lavem mitufala. (Sam 144:2) Mitufala i lanem plante samting taem mitufala i mekem wok blong Jehova fultaem, mo hemia i givhan long mitufala blong kam gud moa long ol Kristin fasin.

Mi glad tumas long perens blong mi we oli tijim gud mi, long gudfala waef blong mi Debbie we i sapotem gud mi, mo long ol brata mo sista raon long wol we oli soemaot nambawan eksampol long mi. Mi mo Debbie i gat strong tingting blong gohed nomo blong lanem ol impoten lesen long Bigfala Tija blong yumi.