“Faet Ya i Blong Jehova”

Long 1999, gavman blong Franis i talem se branj ofis blong Franis i mas pem takis blong ol presen mane we oli kasem long yia 1993 kasem 1996. Mifala i traem plante taem blong stretem bisnes ya long ol kot long Franis, be mifala i no win. Afta we mifala i lus bakegen long kot, gavman i tekemaot samwe 550 milian vatu long bang akaon blong branj ofis. Be mifala i hop se sipos mifala i putum kes ya i go long Kot Blong Yurop We i Lukaot Long Raet Blong Ol Man, bambae mifala i save kasembak mane ya. Be bifo we Kot Blong Yurop i lesin long kes blong mifala, oli askem blong holem wan miting wetem mifala mo sam loea blong gavman blong Franis, blong luk sipos mifala i save agri long wan tingting bifo we mifala i pas long kot.

Mifala i ting se woman ya we i holem miting wetem mifala long bihaf blong Kot Blong Yurop, bambae i askem mifala blong pem wan smol haf blong mane ya i go long gavman blong Franis. Be mifala i kasemsave se sipos mifala i givim smol haf nomo blong mane ya i go long gavman, hemia bambae i agensem rul blong Baebol. Hemia from we ol brata mo sista oli givim ol presen mane ya blong sapotem wok blong Kingdom. Taswe mane ya i no blong gavman. (Mat. 22:21) Nating se i olsem, mifala i go long miting ya blong soemaot se mifala i respektem ol rul blong Kot Blong Yurop.

Mifala i mekem miting ya long wan naesfala konfrens rum. Long stat, miting ya i no go gud olsem we mifala i tingbaot, from we woman ya i talem se ol Witnes blong Jehova oli sud pem sam takis we gavman blong Franis i askem. Be kwiktaem nomo, mifala i askem long hem se: “?Yu yu save se gavman i tekemaot finis samwe 550 milian vatu long bang akaon blong mifala?”

Taem woman ya i harem samting ya, hem i sapraes tumas. Mo taem ol loea blong Franis oli talemaot se oli bin tekem mane ya, tingting we woman ya i gat long kes ya i jenis. Hem i tok strong long olgeta mo i stopem miting ya. Long taem ya, mi luksave se Jehova i yusum wan rod we mifala i no tingbaot nating, blong mekem se bambae mifala i save winim kes ya. Mifala i aot long miting ya we mifala i glad tumas, mo mifala i sapraes bigwan long samting we i hapen.

Long 30 Jun 2011, Kot Blong Yurop i talemaot wan desisen we i mekem mifala i glad tumas. Hem i talemaot se gavman blong Franis i mas givimbak evri mane we oli bin tekemaot, mo oli mas givim wetem intres blong hem tu. Samting we i hapen long taem ya, i protektem tru wosip long Franis kam kasem tede. Kwestin ya we mifala i bin askem long taem blong miting ya, i olsem ston we i fas long hed blong Golaeat, we i mekem se evri samting jenis, nao mifala i win. ?Be from wanem mifala i win? Olsem we Deved i talem long Golaeat, “faet ya i blong Jehova.”—1 Saml. 17:​45-47.

I gat plante narafala kot kes tu we mifala i winim. Nating se ol gavman mo ol relijen oli agensem mifala, be mifala i winim 1,225 kes long ol hae kot blong 70 defren kantri mo long sam intenasnal kot. Ol desisen we i kamaot long ol kot ya, i protektem raet we yumi gat blong wosip, joen long wok blong prij, no joen long sam seremoni blong kantri, mo no tekem blad.

?From wanem mi joen long kot kes ya long Yurop, nating se mi stap wok long Wol Hedkwota Blong Ol Witnes Blong Jehova long New York, U.S.A.?

PERENS BLONG MI OLI GAT STRONG TINGTING BLONG PRIJ

Perens blong mi, hemia George mo Lucille, tufala i graduet long namba 12 klas blong Gilead, nao oli sanem tufala i go long Itiopia olsem ol misinari. Mi mi bon taem tufala i stap yet long Itiopia, hemia long 1956. Tufala i putum nem blong mi se Philip, olsem ivanjelis ya Filip long taem blong ol fas Kristin. (Wok 21:8) Long nekis yia blong hem, gavman i putum tabu long wosip blong yumi. Mi mi smol long taem ya, be mi tingbaot se famle blong mifala i stap mekem wosip haed nomo. !Long taem ya, mi harem se hemia i taf we! Be sore tumas, long 1960, ol polis oli kam fosem mifala blong aot long kantri.

Taem famle blong mifala i muv i go long Wichita, Kansas, U.S.A., papa mo mama blong mi tufala i gohed blong gat strong tingting blong prij, olsem long taem we tufala i misinari. Tufala i tijim mi, bigfala sista blong mi Judy, mo smol brata mi Leslie, we tufala tu i bon long Itiopia, blong mifala evriwan i lavem Jehova. Mi mi baptaes taem mi gat 13 yia. Mo tri yia afta, famle blong mi i muv i go long ples we i gat moa nid, hemia long Arequipa, Peru.

Long 1974, taem mi gat 18 yia, branj blong Peru i sanem mi wetem fo narafala brata, blong go mekem wok blong spesel paenia long ol teritori we ol Witnes oli neva prij long hem bifo, hemia long ol bigfala hil blong Andes. Long ples ya i gat ol komuniti blong ol man we oli toktok lanwis Quechua mo Aymara. Mifala i yusum wan bigfala trak we mifala i save slip long hem. Mifala i singaot trak ya se The Ark, from we sep blong hem i luk olsem wan bokis, olsem sip blong Noa. Mi laekem tumas blong tingbaot ol gudfala taem ya we mifala i gat, blong prij long ol man long ples ya mo tokbaot se wan dei Jehova bambae i mekem se ol man oli no moa pua, sik, mo ded. (Rev. 21:​3, 4) Plante man oli glad blong lesin long mesej blong Kingdom.

MI GO WOK LONG WOL HEDKWOTA

Long 1977, Brata Albert Schroeder we i wan memba blong Hed Kampani Blong Ol Witnes Blong Jehova, i kam visitim Peru. Hem i leftemap tingting blong mi, blong mi aplae from wok blong Betel long wol hedkwota. Ale mi mekem olsem. Smoltaem afta, hemia long 17 Jun 1977, mi stat blong wok long Betel long Brooklyn. Blong fo yia, mi wok long dipatmen blong klinim mo mekem mentenens long ol bilding blong Betel.

Long Jun 1978, mi mitim Elizabeth Avallone long wan intenasnal asembli long New Orleans, Louisiana. Perens blong hem tu oli mekem wok blong Jehova long fulhat blong tufala, sem mak olsem perens blong mi. Elizabeth i bin mekem wok blong fultaem paenia blong fo yia finis, mo hem i wantem tumas blong gohed blong mekem wok blong Jehova fultaem long ful laef blong hem. Nating se mitufala i gobak long ples blong mitufala wanwan, be mitufala i gohed yet blong toktok. Sloslo mitufala i save gud mitufala, mo mitufala i lavlavem mitufala moa. Mitufala i mared long 20 Oktoba 1979, mo mitufala i stat blong wok long Betel olsem wan kapol.

Ol brata mo sista long faswan kongregesen blong mitufala, hemia Brooklyn Spanish, oli kaen tumas long mitufala. Mo ol brata mo sista long ol tri narafala kongregesen we mitufala i joen long hem afta, olgeta tu oli welkamem gud mitufala mo sapotem mitufala long wok we mitufala i mekem long Betel. Mitufala i glad tumas we oli halpem mitufala, mo mitufala i glad tu long ol fren mo famle we oli givhan blong lukaot long ol perens blong mitufala we oli kam olfala.

WOK WE MI MEKEM LONG LIGOL DIPATMEN

Mi mi sapraes se long Jenuware 1982, oli talem long mi blong wok long Ligol Dipatmen long Betel. Mo tri yia afta, oli askem mi blong joen long wan skul we i tijim loa, blong mi save kam wan loea. Mi mi sapraes blong lanem se ol man long Yunaeted Stet mo plante narafala kantri oli fri blong mekem plante samting, from ol kot kes we ol Witnes blong Jehova oli winim. Long skul ya, oli tokbaot plante long ol kot kes ya.

Long 1986, taem mi gat 30 yia, oli putumap mi mi kam ovasia blong Ligol Dipatmen. Mi glad tumas we Betel i trastem mi mo i givim wok ya long mi, nating se mi yangfala nomo. Be long semtaem mi wari tu, from i gat plante samting we mi no save. Mo tu, mi save se hemia bambae i no wan isi wok.

Mi kam wan loea long 1988, be mi no bin luksave se skul ya i spolem ol gudfala fasin blong mi, mo fasin blong mi blong fren gud wetem Jehova. Sloslo, hae edukesen i mekem se mi stat blong tinghae long mi wan, mo mi gat tingting ya se mi gud moa long ol narafala from mi gat moa save. Be mi glad tumas we Elizabeth i halpem mi. Hem i givhan long mi blong mekem bakegen ol samting we mi bin mekem bifo we mi joen long skul ya blong loa, blong mi save fren gud bakegen wetem Jehova. I tekem taem, be sloslo mi kam klosap long Jehova bakegen. Samting we i hapen, i mekem mi luksave se nomata se yumi gat plante save, be hemia i no impoten. Samting we i moa impoten long laef, hemia blong lavem Jehova mo ol man blong hem.

YUSUM LOA BLONG SOEMAOT RAET WE YUMI GAT BLONG TALEMAOT GUD NIUS

Taem mi finis long skul blong loa, mi wok wetem Ligol Dipatmen long Betel blong yusum loa blong soemaot raet we yumi gat blong mekem ol wok blong Kingdom. Mi laekem tumas wok ya be samtaem i no isi, from we oltaem i gat plante jenis long oganaesesen blong yumi. Eksampol, fastaem yumi stap askem ol man blong oli givim smol mane long yumi from ol buk blong yumi. Be long yia 1990, Ligol Dipatmen i kasem wok ya blong faenemaot samting we oganaesesen i mas mekem folem loa, blong yumi no moa askem mane. Jenis ya i mekem se ol wok blong yumi long Betel mo wok blong prij i kam gud moa. Mo tu, i mekem se gavman i no gat raet blong askem takis long oganaesesen. Samfala oli ting se jenis ya bambae i mekem se yumi no moa gat mane blong printim ol buk, nao bambae yumi no moa save halpem plante man blong oli save Jehova. Be defren olgeta, jenis ya i mekem se stat long 1990, namba blong ol man we oli wosipim Jehova i go antap bigwan, mo naoia yumi save givimaot ol buk we i fri nomo, we i givhan long ol man blong oli save Jehova. Ol samting we i hapen i mekem mi luksave se yumi naf blong mekem ol bigfala jenis olsem, from we Jehova nomo i stap givim advaes long yumi tru long gudfala slef.—Eks. 15:2; Mat. 24:45.

Yumi winim ol kot kes, i no from we yumi gat ol gudfala loea nomo. Plante taem, ol gudfala fasin blong ol man blong Jehova nao i pulum ol jaj mo ol haeman blong oli givhan long yumi. Mi luk samting ya long 1998, taem tri memba blong Hed Kampani wetem waef blong olgeta oli kam long wan spesel asembli long Kuba. Olgeta oli kaen mo oli gat respek, mo hemia i gat moa paoa i bitim ol samting we mifala i talem long ol miting blong pruvum long ol haeman se ol Witnes blong Jehova oli no stap joen long politik.

Be samtaem, yumi mas go long kot mo ‘yusum loa blong soemaot raet blong yumi blong talemaot gud nius.’ (Fil. 1:7) Eksampol, blong plante yia ol gavman long Yurop mo Saot Koria, oli no luksave raet we yumi gat blong no joen long wok blong ol ami. From samting ya, long Yurop oli putum samwe 18,000 brata long kalabus, mo long Saot Koria oli putum samwe 19,000 brata long kalabus, from we oli no wantem joen long ami.

Be long 7 Julae 2011, Kot Blong Yurop i mekem wan impoten desisen long kot kes ya Bayatyan v. Armenia. Kot i mekem i klia se ol gavman long Yurop oli mas letem ol man oli mekem sam narafala wok blong komuniti, sipos oli jusum blong no joen long ami from bilif blong olgeta. Mo long 28 Jun 2018, Kot Blong Konstitusen Blong Saot Koria i mekem wan desisen we i klosap sem mak. Sipos sam long ol brata blong yumi long ol ples ya oli no bin holemstrong long bilif blong olgeta, bambae kot i no save mekem ol desisen ya.

Ligol Dipatmen long wol hedkwota mo long ol branj ofis blong yumi raon long wol, i stap wok had blong difendem raet we yumi gat blong wosipim Jehova, mo talemaot mesej blong Kingdom. Mifala i tinghae long wok ya we mifala i gat blong toktok long bihaf blong ol brata mo sista blong yumi we gavman i stap agensem olgeta. Nating se yumi winim ol kot kes o nogat, be ol tok we yumi talem i givim wan gudfala witnes long ol hed gavman, mo ol king, mo ol nesen. (Mat. 10:18) Hemia from we ol jaj, ol haeman blong gavman, ol man long media, mo ol narafala man, oli mas tingting long ol vas blong Baebol we yumi tokbaot, o we yumi raetem blong sapotem ol kes blong yumi. Ale, ol man we hat blong olgeta i stret oli save kasemsave moa long yumi ol Witnes blong Jehova mo ol bilif blong yumi. From samting ya, samfala oli kam ol brata mo sista blong yumi.

!TANGKIU JEHOVA!

Long ol 40 yia we i pas, mi mi gat blesing ya blong wok wetem ol defdefren branj ofis raon long wol, blong mekem ol wok we i joen wetem Ligol Dipatmen, mo stanap long fored blong ol hae kot mo plante haeman. Mi lavem ol brata mo sista we mi wok wetem olgeta long Ligol Dipatmen long wol hedkwota, mo long ol narafala ples raon long wol. Laef blong mi i fulap long ol blesing mo ol samting we i mekem mi mi glad.

Elizabeth i gohed blong sapotem mi mo i lavem mi long ol 45 yia we i pas, long ol gudtaem mo long ol hadtaem tu. Mi tinghae long hem from we hem i mekem olsem, nating se hem i gat wan sik we i mekem se hem i no strong.

Mitufala i luksave se ol wok we mitufala i mekem, mitufala i no naf blong mekem long prapa paoa mo save blong mitufala. Be olsem we Deved i talem, “Jehova i paoa blong ol man blong hem.” (Sam 28:8) Yes, “faet ya i blong Jehova.”