?Yu Save Lanem Samting Yet Long Ol Stamba Tijing Blong Baebol?

1. Taem yu stat blong lanem ol stamba tijing blong Baebol, ?olsem wanem hemia i gat paoa long yu?

OL STAMBA tijing blong Baebol oli jenisim laef blong yumi. Eksampol, taem yumi lanem se nem blong God hemia Jehova, yumi tekem faswan step blong kam fren blong hem. (Aes. 42:8) Taem yumi lanem trutok long saed blong ol man we oli ded, yumi no moa wari se ol fren o famle blong yumi we oli ded, oli stap safa. (Pri. 9:10) Mo taem yumi kasem save se God i promes blong mekem wol ya i kam Paradaes, yumi no moa wari long saed blong fiuja. Yumi sua fulwan se bambae yumi no laef sot taem nomo olsem 70 o 80 yia, be bambae yumi laef olwe.—Sam 37:29; 90:10.

2. ?Olsem wanem 2 Pita 1:​12, 13 i soemaot se ol Kristin we oli bigman long spirit oli save lanem samting yet long ol stamba tijing blong Baebol?

² Yumi neva mas ting nating long ol stamba tijing blong Baebol we yumi lanem. Aposol Pita i raetem seken leta blong hem i go long ol Kristin we oli “stap strong long trutok.” (Ridim 2 Pita 1:​12, 13.) Long taem ya, i gat sam man long kongregesen we oli wantem pulum ol brata mo sista blong oli gowe long trutok. (2 Pita 2:​1-3) Pita i wantem mekem ol brata mo sista oli kam strong, blong oli save blokem ol giaman tingting blong ol man ya. Taswe, hem i mekem oli tingbaot bakegen sam long ol stamba tijing blong Baebol we oli lanem finis. Ol stamba tijing ya bambae oli halpem olgeta blong oli gohed blong holemstrong long Jehova gogo kasem en.

3. ?From wanem evri Kristin oli mas gohed blong tingting dip long ol stamba tijing blong Baebol?

³ Nating sipos yumi stap long trutok longtaem finis, be yumi save lanem samting yet long ol stamba tijing blong Baebol. Eksampol, wan jif kuk we i save kuk gud mo wan man we i jes lanem olsem wanem blong kuk, maet tufala i yusum sem samting blong rerem wan kakae. Be taem ol yia oli pas, jif kuk ya we i gat moa ekspiriens i lanem olsem wanem blong yusum ol sem samting ya, blong rerem plante defdefren kakae we oli tesgud. Long sem fasin, wan man we i wosipim Jehova longtaem finis mo wan man we i jes stadi Baebol, tufala i save ridim sem vas. Be hemia we i stap longtaem long trutok, hem i save lanem plante defren lesen long vas ya. Stat long taem we yumi jes baptaes, maet ol samting long laef blong yumi o ol wok we yumi mekem blong Jehova i jenis. Sipos yumi tingbaot ol stamba tijing blong Baebol we yumi lanem finis, bambae yumi lanem plante niufala samting we i save givhan long yumi tede. Naoia bambae yumi luk tri stamba tijing blong Baebol we olgeta we oli bigman long spirit oli save lanem samting from.

JEHOVA I WOKEM OLGETA SAMTING

4. Taem yumi lanem se Jehova i wokem olgeta samting, ?hemia i mekem wanem long yumi?

⁴ Yumi save se wan Man we i waes mo i gat bigfala paoa i wokem wol ya mo evri samting we i stap long hem. Baebol i talem se: “God i wokem olgeta samting we i stap.” (Hib. 3:4) Be i gat plante moa samting we yumi save lanem long trutok ya. From we Jehova i wokem yumi, hem i save evri samting long saed blong yumi. Mo tu, hem i kea long yumi mo i save samting we i gud long yumi. Taswe, taem yumi save se Jehova i wokem olgeta samting, hemia i jenisim laef blong yumi long plante rod, mo i mekem se laef blong yumi i gat mining.

5. ?Wanem trutok blong Baebol we i save halpem yumi blong gat tingting daon? (Aesea 45:​9-12)

⁵ Trutok ya se Jehova i wokem olgeta samting, i tijim yumi se yumi mas gat tingting daon. Traem tingbaot eksampol blong Job. Hem i tingbaot hem wan tumas mo ol narafala man, taswe Jehova i mekem hem i tingbaot bakegen se Hem nao i God Ya We i Wokem Olgeta Samting. (Job 38:​1-4) Samting ya i mekem Job i luksave se evri samting we Jehova i mekem oli stret oltaem. Hemia nao from wanem samtaem biaen, profet Aesea i raetem se: “?I stret blong klei i tok long Man Blong Wokem Graonpot se: ‘Yu stap mekem wanem ya?’”—Ridim Aesea 45:​9-12.

6. ?Wetaem yumi mas tingting dip long bigfala waes mo paoa blong Jehova? (Mo tu, yu luk ol pija.)

⁶ Taem wan man i mekem wok blong Jehova blong plante yia, maet bambae hem i stat blong dipen long prapa save blong hem, be hem i no lukluk i go long Jehova o long Tok blong Hem blong kasem advaes we i save lidim hem. (Job 37:​23, 24) ?Be wanem i save kamaot sipos wan man i tingting dip long bigfala waes mo paoa blong Jehova? (Aes. 40:22; 55:​8, 9) Hemia bambae i halpem hem blong i gohed blong gat tingting daon, mo luksave se ol tingting blong Jehova oli gud moa.

7. ?Rahela i mekem wanem blong i save folem niufala jenis we oganaesesen i mekem?

⁷ Rahela, wan sista we i laef long Slovenia, i luksave se taem hem i tingbaot Jehova we i wokem olgeta samting, hemia i givhan long hem blong folem ol jenis we oganaesesen i mekem. Hem i talem se: “Samtaem i no isi long mi blong folem ol desisen we oganaesesen i mekem. Eksampol, nating se mi wajem 2023 Hed Kampani Apdet #8, be mi sek taem mi luk wan brata we i mekem tok i gat mustas. Taswe mi prea long Jehova blong i halpem mi blong lan long niufala jenis ya.” Rahela i luksave se from we Jehova i wokem olgeta samting, oltaem hem i save beswan rod blong lidim oganaesesen blong hem. Sipos yu faenem i had blong folem wan niufala save o jenis we oganaesesen i mekem, i gud yu tingting dip long bigfala waes mo paoa blong Jehova, God Ya We i Wokem Olgeta Samting.—Rom 11:​33-36.

?FROM WANEM GOD I LETEM OL MAN OLI SAFA?

8. Taem yumi kasem save from wanem God i letem ol man oli safa, ?hemia i mekem i gud long yumi olsem wanem?

⁸ ?From wanem God i letem ol man oli safa? Sam man we oli no save ansa blong kwestin ya, oli kros long God o oli talem se i no gat wan God. (Prov. 19:3) Be yu yu lanem se ol man oli stap safa from we oli kasem sin long Adam mo Iv, mo oli no stret gud olgeta. Be i no Jehova we i stap mekem ol man oli safa. Mo tu, yu lanem se Jehova i gat longfala tingting mo i letem ol man oli gohed blong safa, blong mekem se plante milian man oli gat janis blong save hem, mo luksave olsem wanem Jehova bambae i finisim fulwan ol samting we i mekem ol man oli safa. (2 Pita 3:​9, 15) Ol trutok ya oli mekem tingting blong yu i kwaet mo oli pulum yu i kam klosap long Jehova.

9. ?Wetaem i gud we yumi tingbaot from wanem Jehova i letem ol stret man oli safa?

⁹ Yumi kasemsave se yumi mas gat longfala tingting taem yumi stap wet blong Jehova i finisim ol samting we i mekem man i safa. Nating se i olsem, taem yumi o wan famle blong yumi i harem nogud, yumi kasem trabol, o yumi lusum wan we yumi lavem long ded, maet yumi save stat blong gat tingting ya se from wanem Jehova i no tekem aksen kwiktaem. (Hab. 1:​2, 3) Long taem olsem, i gud yumi tingbaot from wanem Jehova i letem ol stret man oli kasem hadtaem.a (Sam 34:19) Mo tu, yumi save tingbaot promes we Jehova i mekem blong finisim fulwan ol samting we i mekem man i safa.

10. ?Wanem i givhan long Anne blong i harem gud bakegen?

¹⁰ Taem yumi kasemsave from wanem God i letem yumi safa, hemia i save givhan long yumi blong stanap strong. Anne, we i laef long aelan blong Mayot long solwota blong India, i talem se: “Sam yia i pas, mi mi harem nogud tumas taem mi lusum mama blong mi long ded. Nating se i olsem, oltaem mi tingbaot se i no Jehova we i stap mekem ol man oli safa. Be hem i wantem tumas blong finisim olgeta samting we i mekem man i safa, mo mekem ol dedman oli laef bakegen. Taem mi tingting dip long ol trutok ya, hemia i mekem se mi gat pis long tingting, mo mi harem gud bakegen.”

11. Taem yumi kasemsave from wanem Jehova i letem ol man oli safa, ?hemia i pulum yumi blong mekem wanem?

¹¹ Pita i eksplenem se Jehova i gat longfala tingting from we hem i wantem se ol man we oli tanem tingting blong olgeta oli kasem laef. Afta we hem i eksplenem samting ya, hem talem se: “!Yufala i mas jekemgud se yufala i wanem kaen man! Yufala i mas man we fasin blong laef blong yufala i tabu, mo yufala i mas soemaot long ol wok blong yufala se yufala i stap fasgud long God.” (2 Pita 3:11) Wok blong prij we yumi mekem, i wan long “ol wok” we i soemaot se yumi “stap fasgud long God.” Yumi tu yumi lavem ol man, sem mak olsem Papa blong yumi Jehova. Yumi wantem se olgeta tu oli laef long niufala wol. Yes, Jehova i gat longfala tingting mo i givim janis long ol man long ples blong yu blong oli save wosipim hem. !Yumi gat nambawan janis ya blong wok wetem God mo halpem plante moa man blong oli save hem bifo we en i kam!—1 Kor. 3:9.

YUMI STAP LAEF LONG “OL LAS DEI”

12. Taem yumi kasemsave se yumi stap laef long “ol las dei,” ?hemia i mekem i gud long yumi olsem wanem?

¹² Baebol i talemaot klia ol fasin we ol man bambae oli gat long “ol las dei.” (2 Tim. 3:​1-5) Yumi luksave klia nomo olsem wanem profet tok ya i stap kamtru tede. Taem yumi luk we fasin blong ol man i stap kam mowas, yumi trastem fulwan se Tok blong God i tru.—2 Tim. 3:​13-15.

13. Folem parabol blong Jisas long Luk 12:​15-21, ?wanem ol kwestin we yumi save askem yumi wan?

¹³ Taem yumi kasemsave se yumi stap laef long ol las dei, hemia i givhan long yumi blong yusum gud taem blong yumi. Parabol we Jisas i talem long Luk 12:​15-21 (Ridim), i makemgud from wanem i impoten we yumi yusum gud taem blong yumi. ?From wanem God i talem se rijman ya i “no gat hed”? Hem i talem olsem, i no from we man ya i rij, be from we hem i stap yusum taem blong hem blong mekem ol samting we oli no impoten. Hem i stap “hivimap ol gudgudfala samting blong hem, be long fes blong God, hem i no rij nating.” ?From wanem hemia i no waes? God talem long man ya se: “Long naet ya nomo, bambae ol man oli tekemaot laef blong yu.” Naoia we en blong sistem blong wol ya i stap kam klosap moa, i gud yumi askem yumi wan se: ‘?Ol samting we mi stap traehad blong kasem, oli soemaot se mi stap yusum gud taem blong mi? ?Mi mi stap pulum ol pikinini blong mi blong oli mekem wanem long laef blong olgeta? ?Mi mi stap yusum paoa, taem, mo ol samting we mi gat blong hivimap ol gudgudfala samting we mi nomo mi wantem, o blong hivimap ol gudgudfala samting long heven?’

14. ?Olsem wanem ekspiriens blong Miki i soemaot se i impoten blong tingbaot se yumi stap laef long ol las dei?

¹⁴ Taem yumi tingbaot se yumi stap laef long ol las dei, hemia i save givhan long yumi blong mekem ol waes desisen. Hemia nao samting we i hapen long wan sista we nem blong hem Miki. Hem i talem se: “Taem mi graduet long skul, mi wantem tumas blong mekem wan wok we i blong stadi long ol animol. Be mi wantem tu blong mekem wok blong fultaem paenia mo go long ples we i gat moa nid. Ol brata mo sista long kongregesen oli talem long mi se i gud mi tingting gud fastaem, blong luk sipos mi save mekem wok ya we mi wantem, mo long semtaem mi mekem wok blong paenia mo go long ples we i gat moa nid, o nogat. Olgeta oli mekem mi tingbaot se i no longtaem, en bambae i kam. Antap moa, long niufala wol bambae mi gat plante janis blong stadi long ol defdefren kaen animol olsem we mi wantem. Taswe, mi mekem desisen blong tekem wan sot kos nomo. Hemia i mekem se mi faenem wan wok we i save sapotem mi long wok blong fultaem paenia, mo blong muv i go long ples we i gat moa nid, hemia long Ekwado.” Naoia Miki mo hasban blong hem i stap mekem wok blong eria elda long kantri ya.

15. ?Eksampol blong Jemes i tijim yumi long wanem? (Mo tu, yu luk ol pija.)

¹⁵ Yumi no mas harem nogud taem ol man oli no wantem lesin long gud nius. Ol man oli save jenis. Traem tingbaot eksampol blong Jemes we i haf brata blong Jisas. Hem i luk we Jisas i gruap, i kam Mesaea, mo i tijim gud ol man i bitim eni narafala man. Nating se i olsem, blong plante yia Jemes i no kam wan disaepol blong Jisas. Be afta we Jisas i laef bakegen, hem i jes kam wan disaepol blong hem we i wok strong long wok blong prij.b (Jon 7:5; Gal. 2:9) Yu no mas stop blong serem trutok long ol famle blong yu we oli no soem intres, mo long olgeta we oli no wantem lesin long mesej blong Kingdom. Tingbaot se yumi stap laef long ol las dei, taswe wok blong prij i impoten. Samting we yu talem long olgeta i save gat paoa long olgeta long fiuja, maet afta long taem we bigfala trabol i stat.c

GOHED BLONG TINGHAE LONG OL STAMBA TIJING BLONG BAEBOL

16. ?Olsem wanem ol stamba tijing blong Baebol oli givhan long yu? (Mo tu, yu luk bokis ya “Yusum Ol Trutok Ya Blong Halpem Ol Narafala.”)

¹⁶ Sam long ol samting we oganaesesen i givim, i blong givhan moa long olgeta we oli gat smol save nomo long Baebol. Eksampol, ol pablik tok we yumi stap gat evri wik, sam atikol mo video long jw.org, mo ol magasin we yumi stap givimaot long wok blong prij, i blong givhan long olgeta we oli no Witnes. Nating se i olsem, oli save givhan tu long yumi. Oli mekem yumi lavem moa Jehova, yumi bilif strong moa long Tok blong God, mo yumi kam gud moa long fasin blong yumi blong tijim narafala long ol trutok blong Baebol.—Sam 19:7.

17. ?Wetaem i gud blong tingbaot bakegen ol stamba tijing blong Baebol?

¹⁷ Yumi ol Witnes blong Jehova, yumi glad tumas taem yumi kasemsave moa long wan trutok blong Baebol. Be yumi glad tu long ol stamba tijing blong Baebol we oli bin pulum yumi i kam long trutok. Sipos sam samtaem yumi wantem folem prapa tingting blong yumi, be yumi no folem advaes we i kam long oganaesesen blong Jehova, yumi mas gat tingting daon mo tingbaot se Jehova we i waes mo i wokem olgeta samting, hem nao i stap lidim oganaesesen blong hem. Sipos yumi o wan famle blong yumi i stap fesem wan hadtaem, yumi mas gat longfala tingting mo tingbaot from wanem nao Jehova i letem ol man oli safa. Mo taem yumi stap tingbaot olsem wanem blong yusum gud taem mo ol samting we yumi gat, yumi mas tingbaot se yumi stap laef long ol las dei. I gud yumi gohed blong tingbaot ol stamba tijing blong Baebol, olsem nao yumi save kam waes mo gohed blong mekem wok blong hem.