?Yu Yu “Lanem Finis Sikret Ya” Blong Glad Long Samting We Yu Gat?

1. ?I minim wanem blong glad long samting we yumi gat? ?Mo hemia i no minim wanem?

?YU YU glad long samting we yu gat? Wan man we i glad long samting we hem i gat, i tinghae long ol blesing we hem i gat finis, mo hemia i mekem se hem i harem gud mo i gat pis long tingting. Hem i no harem nogud o kros from ol samting we hem i no gat. Be hemia i no minim se wan man we i glad long samting we hem i gat, hem i no wok had. I stret nomo we wan Kristin i lukaot janis blong mekem moa long wok blong Jehova. (Rom 12:1; 1 Tim. 3:1) Be sipos hem i no kasem wan wok kwiktaem olsem we hem i tingbaot, bambae hem i gohed yet blong stap glad.

2. ?Wanem nogud samting i save kamaot taem wan man i no glad long samting we hem i gat?

² Sipos wan man i no glad long samting we hem i gat, hem i save mekem ol nogud desisen. Maet bambae hem i wok plante aoa blong winim mane blong pem ol samting we hem i no rili nidim. Mo sore tumas, i gat sam Kristin we oli stilim mane o ol narafala samting we oli wantem tumas. Maet oli gat tingting ya se: ‘I stret nomo we mi kasem samting ya,’ o ‘mi wet longtaem finis blong kasem samting ya,’ o ‘bambae mi givimbak mane ya yet.’ Be yumi save se Jehova i no laekem nating fasin blong stil, mo hemia i sakem doti long nem blong hem. (Prov. 30:9) Sam narafala oli harem nogud tumas from we oli no kasem wan spesel wok long wok blong Jehova, nao oli no moa gohed blong wosipim hem. (Gal. 6:9) ?From wanem wan man we i wosipim Jehova i save mekem wan samting olsem? Maet hem i mekem olsem from we hem i no moa glad long samting we hem i gat.

3. ?Yumi save lanem wanem long Filipae 4:​11, 12?

³ Yumi evriwan i save lanem blong glad long samting we yumi gat. Aposol Pol i raetem se hem i ‘lanem finis blong harem gud nomo long wanem samting we hem i gat, nomata se laef blong hem i olsem wanem.’ (Ridim Filipae 4:​11, 12.) Long taem we hem i raetem ol tok ya, hem i stap long kalabus. Nating se i olsem, hem i gohed nomo blong stap glad, from we hem i “lanem finis sikret ya” blong glad long samting we hem i gat. Sipos yumi faenem i had blong glad long samting we yumi gat, ol tok blong Pol mo ekspiriens blong hem i pruvum se yumi tu yumi save lanem blong glad long samting we yumi gat. Yumi no mas ting se oltaem bambae i isi blong glad long ol samting we i hapen long laef blong yumi. Be yumi mas lanem blong stap glad. ?Yumi save mekem samting ya olsem wanem? Naoia bambae yumi tokbaot sam samting we bambae oli halpem yumi blong glad long samting we yumi gat.

GAT FASIN YA BLONG TALEM TANGKIU

4. ?Olsem wanem fasin ya blong talem tangkiu i save halpem yumi blong glad long samting we yumi gat? (1 Tesalonaeka 5:18)

⁴ Taem wan man i gat fasin ya blong talem tangkiu, hemia i save halpem hem blong glad long samting we hem i gat. (Ridim 1 Tesalonaeka 5:18.) Eksampol, taem yumi glad se yumi gat ol samting we yumi nidim blong laef, bambae yumi no wari tumas from ol samting we yumi no gat. Mo taem yumi tinghae long ol wok we yumi stap mekem finis long wok blong Jehova, bambae yumi mekem bes blong yumi long ol wok ya, i bitim we yumi wantem tumas blong kasem wan narafala wok. Taswe, Baebol i leftemap tingting blong yumi blong yumi gat fasin ya blong talem tangkiu oltaem long Jehova long ol prea blong yumi. Taem yumi gat fasin ya blong talem tangkiu, hemia bambae i halpem yumi blong gat “pis ya blong God we i bigwan tumas i bitim olgeta save blong yumi.”—Fil. 4:​6, 7.

5. ?From wanem ol man Isrel oli sud talem tangkiu long Jehova? (Mo tu, yu luk pija.)

⁵ Traem tingbaot samting we i hapen long ol man Isrel. Plante taem oli komplen long Jehova, from we oli stap tingbaot ol kakae we oli bin harem gud long hem long Ijip. (Nam. 11:​4-6) I tru se laef blong olgeta long draeples i no isi. ?Be oli sud mekem wanem blong oli save glad long samting we oli gat? Oli sud tingbaot ol samting we Jehova i mekem finis blong olgeta, mo talem tangkiu long hem from. Bifo, oli stap wok slef long Ijip, be Jehova i sevem olgeta mo i mekem ol Ten Panis i kasem ol man Ijip. Mo taem ol man Isrel oli go fri, Jehova i mekem se oli “tekemaot ol gudgudfala samting blong ol man Ijip” we oli wokem long silva mo gol, wetem ol klos. (Eks. 12:​35, 36) Biaen, Jehova i seraotem Red Si blong ol man Isrel oli save wokbaot i gokros. Mo taem oli stap wokbaot long draeples, Jehova i givim mana long olgeta evri dei, blong oli save gat kakae we oli nidim. Taswe, ?from wanem ol man Isrel oli komplen? Hemia from we oli no gat fasin ya blong talem tangkiu long Jehova from ol samting we hem i mekem finis blong olgeta.

6. ?Wanem i save halpem yumi blong gat fasin ya blong talem tangkiu?

⁶ ?Wanem i save halpem yu blong yu gat fasin ya blong talem tangkiu? Faswan samting we yu save mekem, hemia blong tekem taem evri dei blong tingbaot ol gudfala samting we yu stap harem gud long hem. Maet yu save raetemdaon tu o tri samting we yu save talem tangkiu long Jehova from. (Krae 3:​22, 23) Nambatu, no fogetem blong talem tangkiu long ol narafala from ol samting we oli mekem blong yu. Mo antap moa, talem tangkiu long Jehova oltaem. (Sam 75:1) Nambatri, jusum ol fren we oli gat fasin ya blong talem tangkiu oltaem. Sipos yu joen wetem ol man we oli stap komplen, bambae yu tu yu gat fasin ya. Be sipos yu joen wetem ol man we oli stap talem tangkiu oltaem, bambae yu tu yu save lanem blong gat fasin ya blong talem tangkiu. (Dut. 1:​26-28; 2 Tim. 3:​1, 2, 5) Sipos oltaem yumi gat fasin ya blong talem tangkiu, bambae yumi no harem nogud tumas from ol samting we yumi no gat.

7. ?Wanem i halpem Aci blong i glad long samting we hem i gat?

⁷ Traem tingbaot samting we i hapen long Aci, wan sista we i laef long Indonesia. Hem i talem se: “Long taem blong COVID-19 pandemik, mi stat blong skelem laef blong mi wetem laef blong ol narafala Witnes. Hemia i mekem se mi no moa glad long samting we mi gat.” (Gal. 6:4) ?Wanem i halpem Aci blong i glad bakegen? Hem i talem se: “Mi stat blong tekem taem blong tingbaot ol gudfala samting we Jehova i stap givim long mi evri dei, mo ol blesing we mi kasem from we mi joen long oganaesesen blong hem. Biaen, mi talem tangkiu long Jehova from ol samting ya. Hemia i halpem mi blong glad long samting we mi gat.” Sipos yu tu yu harem se yu no glad long laef blong yu, i gud yu mekem sem samting we Aci i mekem, blong yu save lanem blong gat fasin ya blong talem tangkiu.

GAT TINGTING DAON

8. ?Wanem i hapen long Baruk?

⁸ I gat wan taem we Baruk we i sekretari blong profet Jeremaea, i no moa glad long samting we hem i gat. Wok we Baruk i mekem i no isi. Hem i stap givhan long Jeremaea blong talemaot ol strong tok long ol man Isrel from we oli no obei long Jehova. Be Baruk i no moa tingbaot samting we Jehova i wantem hem blong i mekem, be i stat blong tingbaot samting we hem nomo i wantem. Taswe Jehova i yusum Jeremaea blong i talem long Baruk se: “Yu yu stap traehad blong kasem ol gudfala samting blong givhan long yu nomo. Yu stop blong lukaot ol samting olsem.” (Jer. 45:​3-5) Hemia i olsem we Jehova i stap talem long hem se: “Yu mas glad long samting we yu gat.” Baruk i lesin long advaes ya mo i gohed blong stap olsem wan fren blong Jehova.

9. ?Yumi lanem wanem long 1 Korin 4:​6, 7? (Mo tu, yu luk ol pija.)

⁹ Samtaem, wan Kristin i save gat tingting ya se i stret we hem i kasem wan spesel wok long wok blong Jehova. Maet hem i gat tingting ya from we hem i gat gudhan o save long wan wok, i wok had, o i mekem wok blong Jehova blong plante yia. Be maet wan narafala i kasem wok ya we hem i wantem kasem. Long taem olsem, ?wanem i save givhan long hem blong i no harem nogud? Hem i save tingbaot ol tok blong aposol Pol long 1 Korin 4:​6, 7. (Ridim.) Evri wok we yumi kasem mo save we yumi gat i kamaot long Jehova nomo. Hem i givim ol samting ya long yumi, i no from we yumi spesel, be from we hem i kaen tumas long yumi.—Rom 12:​3, 6; Efes. 2:​8, 9.

10. ?Olsem wanem yumi save lanem blong gat tingting daon?

¹⁰ Yumi save lanem blong gat tingting daon, sipos yumi tingting dip long eksampol blong Jisas. Traem tingbaot samting we i hapen long naet ya we Jisas i wasem leg blong ol aposol blong hem. Aposol Jon i talem se: “Jisas i save se [1] Papa i putum olgeta samting long han blong hem finis, mo [2] hem i save se God i sanem hem i kam, mo [3] bambae hem i gobak long God.” Nating se i olsem, hem i “stat blong wasem leg blong ol disaepol.” (Jon 13:​3-5) Jisas i save gat tingting ya se ol aposol blong hem nao oli sud wasem leg blong hem. Be long olgeta taem we Jisas i stap long wol, hem i neva gat tingting ya se hem i sud gat plante samting mo gat wan laef we i gud moa i bitim ol narafala. (Luk 9:58) Oltaem Jisas i gat tingting daon mo i glad long samting we hem i gat. Hem i soemaot wan gudfala eksampol we yumi save folem.—Jon 13:15.

11. ?Wanem i halpem Dennis blong i glad long samting we hem i gat?

¹¹ Wan brata long Netalan we nem blong hem Dennis, i traehad blong folem eksampol blong Jisas blong gat tingting daon, be samtaem i no isi. Hem i talem se: “Taem narafala i kasem wan wok we mi mi wantem kasem, samtaem hemia i mekem mi mi harem nogud. Long taem olsem, mi stap stadi long fasin ya blong gat tingting daon. Long JW Library^® app, mi makem sam vas we i tokbaot tingting daon blong mi save faenem olgeta kwiktaem, mo ridim olgeta bakegen. Mo tu, mi daonlodem sam tok long fon blong mi we i tokbaot tingting daon, mo mi stap lesin long olgeta oltaem.a Mi lanem se evri samting we yumi mekem blong Jehova, i blong leftemap hem be i no blong leftemap yumi wan. Yumi glad tumas se yumi gat janis ya blong mekem wan smol samting blong sapotem wok blong Jehova.” Sipos samtaem yu harem se yu no glad from we yu no kasem wan wok we yu wantem mekem long wok blong Jehova, i gud yu traehad blong gat tingting daon. Hemia bambae i mekem se yu fren gud moa wetem Jehova, mo bambae i givhan long yu blong glad long samting we yu gat.—Jem. 4:​6, 8.

TINGTING DIP LONG OL PROMES BLONG FIUJA

12. ?Wanem ol promes blong fiuja we oli save halpem yumi blong glad long samting we yumi gat? (Aesea 65:​21-25)

¹² Wan narafala samting we i save halpem yumi blong glad long samting we yumi gat, hemia taem yumi tingting dip long ol nambawan promes blong fiuja. Long buk blong Aesea, Jehova i soemaot se hem i kasemsave long ol hadtaem we yumi stap fesem tede, mo i promes se bambae hem i finisim ol trabol ya. (Ridim Aesea 65:​21-25.) Long fiuja, bambae yumi save gat ol gudfala haos, mekem ol gudfala wok, mo kakae ol naesfala kakae. Bambae yumi no moa wari se bambae wan nogud samting i hapen long yumi o long ol pikinini blong yumi. (Aes. 32:​17, 18; Esik. 34:25) Fiuja blong yumi i nambawan, mo yumi save trastem ol promes ya.

13. ?Wanem sam trabol we maet yumi stap fesem? ?Mo olsem wanem ol promes blong fiuja oli save halpem yumi?

¹³ Naoia yumi mas tingting dip moa long ol promes blong fiuja i bitim bifo. ?From wanem? From we yumi stap laef long “ol las dei,” mo yumi stap fesem ol trabol we oli “had blong winim.” (2 Tim. 3:1) Evri dei, Jehova i stap givim ol advaes, paoa, mo help we yumi nidim blong yumi stanap strong long ol trabol ya. (Sam 145:14) Mo tu, ol promes blong fiuja oli save givhan long yumi blong stanap strong. Maet tede, yu yu faenem i had blong givim ol samting we famle blong yu i nidim. ?Be hemia i minim se oltaem bambae yu sot long samting? !Nogat! Jehova i promes blong givim ol samting we yu nidim mo plante moa samting long Paradaes. (Sam 9:18; 72:​12-14) Maet naoia yu gat wan sik we i mekem se oltaem bodi blong yu i soa, o maet yu gat sik ya dipresen, o wan narafala strong sik olsem. ?Be olsem wanem? ?Bambae yu mas safa olsem blong olwe? Nogat. Long niufala wol, bambae God i finisim sik mo ded. (Rev. 21:​3, 4) Ol promes ya blong fiuja oli save halpem yumi blong yumi no kros, o harem nogud tumas from ol trabol we yumi stap fesem naoia. Yumi save glad long laef blong yumi, nating se narafala i mekem i no stret long yumi, yumi kasem wan sik, o yumi fesem wan narafala trabol. ?From wanem? From we nating se laef blong yumi naoia i had, be yumi save se ol trabol ya “oli no save stap longtaem,” mo long niufala wol bambae yumi no moa safa.—2 Kor. 4:​17, 18.

14. ?Wanem i save halpem yumi blong mekem bilif blong yumi i strong moa long ol promes blong fiuja?

¹⁴ Olsem we yumi tokbaot finis, ol promes blong fiuja oli save halpem yumi blong glad long laef blong yumi naoia. Taswe, ?olsem wanem yumi save mekem bilif blong yumi i kam strong moa long ol promes ya? Traem tingbaot pijatok ya: Samtaem wan man i mas werem glas, blong hem i save lukluk klia ol samting we oli stap longwe. Long sem fasin, yumi save pijarem laef we bambae yumi gat long Paradaes, blong yumi save bilif strong moa long ol promes blong fiuja. Eksampol, sipos yumi stap wari tumas from ol problem blong mane, yumi save pijarem taem ya we bambae yumi no moa fesem ol problem blong mane. Sipos yumi stap harem nogud from we yumi no kasem sam wok we yumi wantem mekem long wok blong Jehova, yumi save tingbaot se afta we yumi kam stret gud olgeta, mo yumi mekem wok blong Jehova blong plante taosen yia, bambae yumi luk ol wari ya se oli nating nomo. (1 Tim. 6:19) Maet fastaem yumi faenem i had blong tingting dip long ol promes blong fiuja, from we yumi stap wari tumas from ol problem we yumi stap fesem naoia. Be sipos oltaem yumi traehad blong tingting dip long ol promes ya, sloslo yumi save lanem blong no moa wari tumas.

15. ?Yu yu lanem wanem long samting we Christa i talem?

¹⁵ Traem tingbaot olsem wanem ol promes blong fiuja i halpem Christa, we i waef blong Dennis we yumi tokbaot hem finis. Christa i talem se: “Mi mi kasem wan strong sik long ol masel blong mi, we i mekem se mi mas yusum wan wiljea mo klosap ful dei mi stap slip nomo long bed. Evri dei nomo bodi blong mi i stap soa. I no longtaem i pas, dokta i talem se bambae mi no moa save kam gud bakegen. Be long taem ya, mi tingbaot se tingting we hem i gat long fiuja i defren olgeta long tingting blong mi. Mi mi stap tingbaot oltaem ol promes blong fiuja, mo hemia i mekem se mi gat pis long tingting. I tru se naoia laef blong mi i no isi, be i no longtaem bambae mi gat wan nambawan laef long niufala wol.”

“OLGETA WE OLI FRAET LONG HEM, OLI NO SOT LONG WAN SAMTING”

16. ?From wanem King Deved i talem se olgeta we oli fraet long Jehova “oli no sot long wan samting”?

¹⁶ Nating se yumi glad long samting we yumi gat, be yumi save fesem yet ol trabol long laef blong yumi. Traem tingbaot King Deved. Hem i lusum tri pikinini blong hem long ded, ol man oli talem ol giaman tok long saed blong hem, ol fren blong hem oli lego hem, mo blong plante yia wan king i stap ronem hem blong kilim hem i ded. Nating se Deved i fesem ol trabol ya, hem i tokbaot Jehova se: “Olgeta we oli fraet long hem, oli no sot long wan samting.” (Sam 34:​9, 10) ?From wanem hem i talem olsem? Hemia from we nating se yumi save fesem ol trabol, be yumi sua se oltaem bambae yumi gat ol samting we yumi nidim. (Sam 145:16) Mo yumi save se Jehova bambae i givhan long yumi blong stanap strong long eni trabol we yumi fesem. Taswe yumi save gohed blong stap glad long laef blong yumi.

17. ?From wanem yu wantem lanem sikret ya blong glad long samting we yu gat?

¹⁷ Jehova i wantem se yu glad. (Sam 131:​1, 2) Taswe i gud yu traehad blong lanem sikret ya blong glad long samting we yu gat. Sipos yu lanem blong gat fasin ya blong talem tangkiu, yu gat tingting daon, mo yu mekem bilif blong yu i strong long ol promes blong fiuja, bambae yu save talem se: “Yes, mi mi glad.”—Sam 16:​5, 6.