?Olsem Wanem Blong Kam Gud Moa Long Ol Prea Blong Yu?

1-2. (1) Taem yumi prea, ?wanem i save blokem yumi blong talemaot samting we i stap long hat blong yumi? (2) ?Olsem wanem yumi save se Jehova i glad blong lesin long ol prea blong yumi?

?SAMTAEM yu harem se yu stap talem ol sem samting nomo evritaem long ol prea blong yu? Sipos yes, i no yu wan nomo. From we laef i bisi, plante taem yumi prea kwiktaem nomo. O maet yumi faenem i had blong talemaot samting we i stap long hat blong yumi, from we yumi harem se yumi nogud, mo i no stret we Jehova i lesin long prea blong yumi.

² Baebol i talem se samting we i impoten long Jehova, hemia se ol prea blong yumi oli kamaot long hat blong yumi, be i no se yumi yusum ol flas toktok. Jehova i “lesin long ol man we oli gat tingting daon, taem oli askem samting” long hem. (Sam 10:17) Hem i glad blong lesin long evri toktok we yumi talem, from we hem i intres long yumi wanwan.—Sam 139:​1-3.

3. ?Wanem ol kwestin we bambae yumi tokbaot long stadi ya?

³ Long stadi ya, bambae yumi tokbaot ol kwestin ya: ?From wanem yumi no mas fraet blong talemaot ol filing blong yumi long Jehova? ?Olsem wanem yumi save kam gud moa long ol prea blong yumi? Taem yumi tingting dip long prea blong ol gudfala man long Baebol, ?olsem wanem hemia i save givhan long yumi blong kam gud moa long ol prea blong yumi? ?Mo yumi save mekem wanem sipos yumi harem nogud tumas, nao i had blong yumi talemaot ol filing blong yumi?

NO FRAET BLONG TALEMAOT OL FILING BLONG YU LONG JEHOVA

4. ?Wanem bambae i halpem yumi blong yumi no fraet blong talemaot ol filing blong yumi long Jehova? (Ol Sam 119:145)

⁴ Taem yumi tingbaot se Jehova i wan gudfala fren we i wantem se yumi glad, bambae yumi no fraet blong talemaot ol filing blong yumi long hem. Man we i raetem Ol Sam 119, i luk Jehova olsem wan gudfala fren blong hem taem hem i prea. Hem i fesem plante trabol long laef blong hem, mo ol man oli talem ol giaman tok long saed blong hem. (Sam 119:​23, 69, 78) Mo tu, hem i harem nogud from ol slak fasin blong hem. (Sam 119:5) Nating se i olsem, hem i no fraet blong talemaot hat blong hem long Jehova.—Ridim Ol Sam 119:145.

5. ?From wanem yumi no mas letem tingting ya se yumi nogud i blokem yumi blong prea? Talem wan pijatok.

⁵ Jehova i wantem se olgeta we oli mekem ol bigfala sin tu oli prea long hem. (Aes. 55:​6, 7) Taswe, yumi no mas letem tingting ya se yumi nogud i blokem yumi blong prea long hem. Traem tingbaot pijatok ya: Wan paelot blong plen i save se hem i save toktok enitaem wetem ol man we oli wok long epot blong daerektem ol plen, blong askem help long olgeta. ?Bambae hem i sem blong askem help long olgeta sipos hem i no save wanem blong mekem, o i mekem wan mastik? !Nogat! Long sem fasin, yumi no mas fraet blong toktok long Jehova, sipos yumi harem se yumi no save wanem blong mekem o yumi mekem wan sin.—Sam 119:​25, 176.

?OLSEM WANEM YU SAVE KAM GUD MOA LONG OL PREA BLONG YU?

6-7. ?Wanem i save halpem yumi blong talemaot ol filing blong yumi long Jehova? Talem wan eksampol. (Mo tu, yu luk futnot.)

⁶ Ol prea blong yumi oli save givhan long yumi blong kam klosap moa long Jehova, sipos yumi talemaot ol tingting mo ol filing we oli stap dip insaed long hat blong yumi. ?Be olsem wanem yumi save kam gud moa long ol prea blong yumi?

⁷ Tingting dip long ol gudfala fasin blong Jehova.a Hemia bambae i mekem se yumi no fraet blong talemaot ol filing blong yumi long hem. (Sam 145:​8, 9, 18) Traem tingbaot eksampol blong wan sista we nem blong hem Kristine. Taem hem i stap gruap, papa blong hem i stap kilim olgeta. Taswe i no isi blong hem i toktok long Jehova, mo luk hem olsem wan Papa we i lavem hem. Mo tu, hem i harem se hem i nogud, mo se Jehova bambae i no moa lavem hem from ol mastik blong hem. ?Wanem i givhan long hem? Hem i talem se: “Mi tingting dip long fasin blong Jehova blong lavem man oltaem, nao mi sua se Jehova i lavem mi. Mo nating sipos mi mestem, bambae hem i neva lego mi, be bambae hem i gohed blong givhan long mi. Taswe, mi no fraet blong talemaot ol filing blong mi long hem, nating se mi glad o mi harem nogud.”

8-9. Bifo we yu prea, ?from wanem i gud blong tingbaot samting we bambae yu talem? Talem wan eksampol.

⁸ Tingbaot samting we bambae yu talem. Bifo we yu prea, i gud yu tingting long ol kwestin olsem: ‘?Wanem sam problem we mi stap fesem naoia? ?I gat sam man we mi mas fogivim olgeta? ?I gat sam jenis long laef blong mi we mi mas askem help blong Jehova from?’ (2 King 19:​15-19) Mo tu, yumi save folem eksampol blong Jisas blong prea, taem yumi tingbaot samting we yumi save talem long saed blong nem blong Jehova, Kingdom blong Hem, mo wil blong Hem.—Mat. 6:​9, 10.

⁹ Wan sista we nem blong hem Aliska i faenem i had blong prea taem hem i faenemaot se hasban blong hem i kasem kansa long bren, mo bambae i no laef longtaem. Hem i talem se: “Mi harem nogud bitim mak, nao i had blong mi tingbaot samting we bambae mi talem long prea.” ?Wanem i givhan long hem? Hem i se: “Bifo we mi prea, mi tekem smol taem blong tingbaot samting we bambae mi talem. Hemia i givhan long mi blong no tingbaot mi wan nomo. Long rod ya, mi no wari tumas mo mi gat stret tingting taem mi prea.”

10. ?From wanem i gud blong tekem taem blong prea? (Mo tu, yu luk ol pija.)

¹⁰ Tekem taem blong prea. I tru se ol sot prea tu oli save mekem yumi kam klosap long Jehova. Be sipos yumi tekem taem blong prea, bambae yumi naf blong talemaot moa ol tingting mo filing we i stap dip insaed long hat blong yumi.b Hasban blong Aliska, hemia Elijah, i talem se: “Mi traem blong prea plante taem evri dei, mo mi kam klosap long Jehova from we mi tekem taem blong prea. Jehova i no talem se yumi mas finisim ol prea blong yumi kwiktaem, taswe mi save tekem taem blong mi blong prea.” Traem hemia: Faenem wan stret taem mo wan stret ples we yu save prea, maet long bigfala voes we i no gat wan samting i save pulum tingting blong yu, mo tekem taem blong prea long ples ya oltaem.

TINGTING DIP LONG PREA BLONG OL GUDFALA MAN LONG BAEBOL

11. ?From wanem i gud blong tingting dip long prea blong ol gudfala man long Baebol? (Mo tu, yu luk bokis ya “?Yu Yu Gat Sem Filing Olsem Olgeta?”)

¹¹ Wan narafala samting we i save givhan long yu, hemia taem yu tingting dip long ol prea mo ol singsing, o ol sam, we i stap long Baebol. Taem yu luk olsem wanem ol gudfala man blong God bifo oli talemaot ol filing we i stap dip insaed long hat blong olgeta, hemia bambae i pulum yu tu blong mekem sem mak. Mo maet bambae yu faenem sam gudfala toktok we oli talem long ol prea blong olgeta, we yu tu yu save talem long ol prea blong yu. Ating bambae yu luk se samting we sam man blong God bifo oli askem long prea blong olgeta, i sem mak long samting we yu tu yu wantem askem.

12. ?Wanem sam kwestin we yumi save tingbaot taem yumi stap tingting dip long wan prea long Baebol?

¹² Taem yu stap tingting dip long wan prea long Baebol, i gud yu tingbaot se: ‘?Hu i talem ol tok ya mo from wanem hem i prea olsem? ?Ol tingting we hem i talem oli sem mak long tingting we mi gat? ?Mi save lanem wanem long prea ya?’ Maet yu mas mekem sam moa risej blong faenem ansa blong ol kwestin ya, be hemia bambae i givhan long yu. Naoia bambae yumi tokbaot fo prea long Baebol.

13. ?Yumi lanem wanem long prea blong Hana? (1 Samuel 1:​10, 11) (Mo tu, yu luk pija.)

¹³ Ridim 1 Samuel 1:​10, 11. Taem Hana i talem prea ya, hem i stap fesem tu bigfala problem. Hem i no save gat pikinini, mo narafala waef blong hasban blong hem i stap jikim hem. (1 Saml. 1:​4-7) Sipos yu tu yu stap fesem wan problem, ?yu save lanem wanem long prea blong Hana? Hana i harem gud bakegen taem hem i tekem taem blong talemaot evri filing blong hem long God. (1 Saml. 1:​12, 18) Yumi tu yumi save harem gud bakegen sipos yumi “sakem ol hevi baden blong [yumi] long Jehova,” hemia taem yumi talemaot ol problem blong yumi mo ol filing we yumi gat.—Sam 55:22.

14. (1) ?Wanem narafala samting we yumi lanem long eksampol blong Hana? (2) Taem yumi tingting dip long ol tok blong Baebol, ?olsem wanem hemia i save givhan long yumi blong kam gud moa long ol prea blong yumi? (Yu luk futnot.)

¹⁴ Sam yia afta we Hana i bonem Samuel, hem i tekem hem i go long Hae Pris Ilae. (1 Saml. 1:​24-28) Long taem ya, hem i mekem wan prea we i soemaot se hem i trastem fulwan se Jehova i stap lukaot gud long olgeta we oli holemstrong long hem.c (1 Saml. 2:​1, 8, 9) Nating se maet hem i stap fesem yet ol problem long laef blong hem, be hem i tingbaot moa ol blesing we Jehova i givim long hem. ?Yumi lanem wanem? Yumi save gohed blong stanap strong long ol trabol we yumi fesem, sipos yumi tingbaot olsem wanem Jehova i givhan long yumi kasem naoia.

15. ?Yumi lanem wanem long prea blong profet Jeremaea? (Jeremaea 12:1)

¹⁵ Ridim Jeremaea 12:1. I gat wan taem we profet Jeremaea i harem nogud from hem i luk se laef blong ol rabis man i stap rongud. Mo tu, tingting blong hem i foldaon from we ol man Isrel oli stap jikim hem. (Jer. 20:​7, 8) Maet samtaem yumi tu yumi harem nogud taem yumi luk we ol rabis man oli stap win long laef blong olgeta, o ol narafala oli stap jikim yumi. Nating se Jeremaea i talemaot ol filing blong hem long Jehova, be hem i neva talem se Jehova i stap mekem samting we i no stret. Mo taem hem i luk we Jehova i stretem ol man blong Hem we oli no obei, i sua se hem i trastem moa se oltaem God i mekem samting we i stret. (Jer. 32:19) Yumi tu yumi save talemaot ol filing blong yumi long Jehova, mo trastem se long stret taem bambae hem i stretem ol trabol we yumi stap fesem.

16. ?Yumi lanem wanem long prea blong wan Livaet? (Ol Sam 42:​1-4) (Mo tu, yu luk ol pija.)

¹⁶ Ridim Ol Sam 42:​1-4. Hemia singsing blong wan Livaet we i no save go long tempol blong wosip wetem ol narafala man Isrel. Singsing ya i soemaot ol filing blong hem. Maet yumi tu yumi gat sem filing olsem. Sipos yumi no save aot long haos o yumi kalabus from bilif blong yumi, maet samtaem yumi glad mo samtaem yumi harem nogud. Be i gud yumi talemaot olgeta filing blong yumi long Jehova. Hemia bambae i givhan long yumi blong kasemsave long ol tingting blong yumi wan, mo gat stret tingting. Eksampol, Livaet ya i luksave se hem i gat janis yet blong presem Jehova. (Sam 42:5) Mo tu, hem i tingbaot olsem wanem Jehova i stap lukaot gud long hem. (Sam 42:8) Taem yumi prea long God wetem fulhat, bambae yumi save kasemsave long ol filing blong yumi wan, yumi gat stret tingting, mo gat paoa blong stanap strong.

17. (1) ?Yumi lanem wanem long prea blong profet Jona? (Jona 2:​1, 2) (2) ?Olsem wanem ol tok blong Ol Sam i save givhan long yumi taem yumi fesem ol hadtaem? (Yu luk futnot.)

¹⁷ Ridim Jona 2:​1, 2. Hemia prea blong profet Jona taem hem i stap long bel blong wan bigfala fis. Nating se Jona i no obei long Jehova, be hem i bilif strong se God bambae i harem voes blong hem. Long prea ya, Jona i yusum plante toktok we i kamaot long Ol Sam.d I luk olsem se hem i save gud ol vas ya. Taem hem i tingting dip long ol vas ya, hem i sua se Jehova bambae i givhan long hem. Long sem fasin, sipos yumi traehad blong lanem sam vas blong Baebol baehat, bambae yumi save tingbaot ol vas ya bakegen taem yumi stap prea long Jehova long ol hadtaem.

GOHED BLONG KAM KLOSAP MOA LONG JEHOVA TAEM YU PREA

18-19. ?Olsem wanem Rom 8:​26, 27 i leftemap tingting blong yumi taem yumi no naf blong talemaot ol filing blong yumi long prea? Talem wan eksampol.

¹⁸ Ridim Rom 8:​26, 27. Maet samtaem yumi wari bitim mak, nao yumi no save olsem wanem blong talemaot ol filing blong yumi long Jehova. Be long taem olsem, tabu spirit blong God i “toktok” long bihaf blong yumi. ?Hemia i minim wanem? Jehova i yusum tabu spirit blong pulum ol man blong oli raetem plante prea long Tok blong hem. Nating se samtaem yumi no naf blong talemaot ol filing blong yumi, be tru long ol toktok we ol man ya bifo oli talem, Jehova i kasem save long ol tok we yumi wantem talem, mo bambae hem i save ansa.

¹⁹ Ol vas ya i givhan long wan sista blong Rasia we nem blong hem Yelena. Taem oli arestem hem from we hem i stap prea mo ridim Baebol, hem i harem nogud tumas, nao hem i faenem i had blong prea. Hem i talem se: “Be biaen, mi tingbaot se taem mi harem nogud bitim mak mo mi no save wanem blong talem long prea blong mi, Jehova bambae i tingbaot prea blong ol gudfala man blong hem bifo . . . olsem ol prea we mi mi wantem blong mekem. . . . Hemia i leftemap tingting blong mi bigwan long taem ya we mi harem nogud tumas.”

20. Taem yumi wari, ?olsem wanem yumi save rerem tingting blong yumi bifo we yumi prea?

²⁰ Taem yumi wari tumas, maet i had blong tingting gud taem yumi stap prea. Taswe yumi save lesin long ol odio rikoding blong Ol Sam, blong rerem tingting blong yumi. Mo tu, yumi save raetemdaon ol filing blong yumi olsem we King Deved i mekem. (Sam 18, 34, 142; ol supaskripsen.) I no gat ol stret rul we yumi mas folem blong rerem tingting blong yumi bifo we yumi prea. (Sam 141:2) Be yu save mekem samting we yu luk se i stret long yu.

21. ?From wanem i gud we yumi prea long fulhat blong yumi?

²¹ Yumi glad tumas blong save se Jehova i kasemsave long ol filing blong yumi, nating se yumi no talem wan samting. (Sam 139:4) Be hem i glad taem yumi talemaot ol filing blong yumi long hem mo yumi soemaot se yumi trastem hem. Taswe, yu no mas fraet blong talemaot ol filing blong yu long Papa blong yu long heven. Yu save yusum ol toktok we ol gudfala man blong God bifo oli talem long prea blong olgeta. Prea long fulhat blong yu, mo talemaot evri filing blong yu long Jehova, nating se yu glad o yu harem nogud. Jehova i wan trufala fren. !Oltaem bambae hem i glad blong lesin long yu!