Tu Niufala Memba Blong Hed Kampani
LONG 5 Oktoba 2024, oli talemaot wan spesel mesej long anuel miting, hemia se Brata Jody Jedele mo Brata Jacob Rumph i kam ol memba blong Hed Kampani blong ol Witnes blong Jehova. Tufala brata ya i mekem wok blong Jehova blong plante yia.
Jody Jedele mo waef blong hem Damaris
Brata Jedele i bon long Missouri, long Yunaeted Stet, mo hem i gruap long trutok. Famle blong hem i laef long wan eria we i no gat plante Witnes blong Jehova. From samting ya, hem i gat janis blong mitim plante brata mo sista blong ol defdefren ples we oli kam blong givhan long wok blong prij. Fasin blong olgeta blong soemaot lav mo joen gud i gat bigfala paoa long hem. Ale, hem i tekem baptaes long 15 Oktoba 1983. Hem i laekem tumas wok blong prij, mo hem i statem wok blong fultaem paenia long Septemba 1989, taem we hem i finis skul.
Taem Brata Jedele i yang, papa mo mama blong hem i stap tekem hem mo sista blong hem blong oli go visitim Betel. Hemia i pulum tufala blong wantem kasem mak ya blong wok long Betel, mo tufala tugeta i kasem mak ya. Brata Jedele i stat blong wok long Betel long Wallkill long Septemba 1990. Fastaem hem i wok long Dipatmen Blong Klinap, mo biaen long Medical Services.
Long taem ya, ol kongregesen we oli toktok lanwis blong Spen oli stap kam bigwan moa mo i nidim moa brata blong givhan. Taswe, Brata Jedele i joen long wan long ol kongregesen ya mo i stat blong lanem lanwis blong Spen. Smoltaem afta, hem i mitim Damaris, wan sista we i paenia long eria ya. Biaen tufala i mared, mo Damaris i joenem hem blong wok long Betel.
Long 2005, tufala i aot long Betel blong lukaot long ol perens blong tufala. Long taem ya, tufala i mekem wok blong fultaem paenia. Brata Jedele i givhan blong tij long Skul Blong Paenia, mo hem i wok tu long Komiti Blong Toktok Wetem Dokta mo Komiti Blong Bildim Ol Haos Wosip.
Long 2013, oli askem Brata mo Sista Jedele blong tufala i kambak long Betel blong wok long konstraksen projek blong Warwick. Biaen tufala i wok tu long Betel long Patterson mo Wallkill. Brata Jedele i wok long Dipatmen Blong Lokol Disaen/Konstraksen mo Hospital Information Services. Long Maj 2023, hem i kam wan helpa blong Sevis Komiti. Taem hem i tingbaot ol defdefren wok we hem i mekem long ol yia we i pas, hem i se: “Taem yumi kasem wan niufala wok, maet yumi harem se yumi no naf blong mekem. Be yumi mas trastem Jehova, from we hem nao i stap mekem ol man oli kam olsem we hem i wantem.”
Jacob Rumph mo waef blong hem Inga
Brata Rumph i bon long California, long Yunaeted Stet. Taem hem i pikinini, mama blong hem we i wan Witnes i no moa stap go long ol miting mo prij, be hem i traehad blong tijim Brata Rumph long ol trutok blong Baebol. Mo tu, evri yia hem i stap go visitim abu woman blong hem we i wan Witnes we i wok strong long wok blong Jehova. Abu woman blong hem i givhan long hem blong i intres long trutok, mo taem hem i gat 13 yia, hem i askem blong stadi Baebol. Long 27 Septemba 1992, hem i baptaes. Biaen mama blong hem i gohed gud bakegen, mo papa blong hem wetem brata mo sista hem tu oli baptaes.
Taem Brata Rumph i yang, hem i luk se ol paenia oli glad. Taswe hem tu i stat blong paenia long Septemba 1995, afta we hem i finisim skul. Long yia 2000, hem i muv i go long Ekwado blong givhan long ples we i gat moa nid. Long ples ya, hem i mitim wan paenia sista blong Kanada we nem blong hem Inga, mo biaen tufala i mared. Ale, tufala i joen long wan smol grup blong ol pablisa we oli stap long wan taon long Ekwado. Tede, grup ya i kam wan bigfala kongregesen.
Biaen, Brata mo Sista Rumph i mekem wok blong spesel paenia, mo afta tufala i mekem wok blong eria elda. Long 2011, oli invaetem tufala blong joen long namba 132 klas blong Skul Blong Gilead. Afta we tufala i graduet, tufala i mekem ol defdefren wok blong Jehova long plante ples raon long wol. Tufala i wok long Betel, mo tufala i mekem wok blong misinari mo eria elda. Brata Rumph i gat blesing ya tu blong tij long Skul Blong Kingdom Ivanjelis.
From we i gat COVID-19 pandemik, Brata mo Sista Rumph i mas gobak long Yunaeted Stet. Oli askem tufala blong go wok long Betel long Wallkill, mo Brata Rumph i kasem trening blong wok long Sevis Dipatmen. Smoltaem afta, oli askem tufala blong gobak long branj blong Ekwado, mo Brata Rumph i kam wan memba blong Branj Komiti. Long 2023, tufala i go stap long Betel long Warwick. Long Jenuware 2024, Brata Rumph i kam wan helpa blong Sevis Komiti. Taem hem i tingbaot ol defdefren wok blong Jehova we hem i mekem, hem i se: “Samting we i mekem se wan wok i spesel, i no ples we yu stap long hem, be hemia ol man we yu wok wetem olgeta.”
Yumi glad tumas long bigfala wok we ol brata ya oli stap mekem, mo yumi “gohed blong tinghae long ol man olsem.”—Fil. 2:29.