Jehova i Stap Lidim Yumi Long Rod Blong Laef

1, 2. (1) ?Wanem woning we i sevem laef blong plante man? (Yu luk pija long stat blong stadi.) (2) ?Wanem rod we ol man blong God oli folem blong oli save laef?

“STOP, LUKLUK, LESIN.” Blong bitim 100 yia, ol tok ya oli stap long ol bigfala saen long ol rod we oli krosem rod blong ol tren, long Not Amerika. ?From wanem oli raetem ol tok olsem? Hemia wan woning blong meksua se ol trak we oli stap krosem rod ya oli no sperem ol tren. Ol woning olsem, oli sevem laef blong plante man.

² Jehova i no putum wan bigfala saen blong yumi luk, be hem i mekem wan samting we i gud moa. Hem i lidimgud ol man blong hem blong oli save kasem laef we i no save finis, mo kamaot long ol denja. Jehova i olsem wan man we i keagud long ol sipsip blong hem mo i lidimgud olgeta. Hem i givim woning long ol sipsip blong oli wokbaot, long rod we i stret.—Ridim Aesea 30:20, 21.

OLTAEM JEHOVA I STAP LIDIM OL MAN BLONG HEM

3. ?Wanem i mekem se olgeta man oli stap long rod ya blong ded nomo?

³ Stat long taem blong Adam mo Iv, oltaem Jehova i talem wanem samting i stret blong mekem, mo olsem wanem blong mekem samting ya. Eksampol, long garen blong Iden, Jehova i givim wan loa long Adam mo Iv. Sipos tufala i folem loa ya, bambae olgeta man oli harem gud mo oli gat laef we i no save finis. (Jenesis 2:15-17) Be Adam mo Iv, tufala i no obei long loa blong Jehova. Iv i lesin long advaes we i kamaot long wan snek, mo Adam i lesin long wanem we waef blong hem i talem. ?Wanem i kamaot from? Tufala i harem nogud long laef blong tufala mo tufala i ded blong olwe. Mo tu, from we tufala i no obei, olgeta man we oli kamaot biaen long tufala, oli stap long rod ya we i blong ded nomo.

4. (1) ?From wanem Jehova i talem se ol man bambae oli no kakae blad? (2) ?Loa ya i tijim yumi long wanem?

⁴ God i talem samting we Noa i mas mekem blong sevem laef blong ol man. Afta we bigfala wota i ron, Jehova i talem se ol man bambae oli no kakae blad blong anamol. ?From wanem Jehova i talem olsem? From we hem i wantem letem ol man oli kakae mit. From samting ya, ol man oli nidim wan niufala loa. Baebol i talem se: “Bambae yufala i no save kakae mit we blad blong hem i stap long hem yet.” (Jenesis 9:1-4) Loa ya i tijim yumi se, God nao i stamba blong olgeta laef samting. Hem i mekem olgeta samting we oli gat laef, taswe i stret we hem i putum rul long olgeta. Eksampol, hem i talem se man i no mas kilim i ded narafala man. God i tingbaot laef mo blad olsem wan samting we i tabu, mo bambae hem i panisim man we i no tinghae long samting ya.—Jenesis 9:5, 6.

5. ?Long stadi ya bambae yumi tokbaot wanem, mo from wanem?

⁵ Long stadi ya, bambae yumi tokbaot olsem wanem Jehova i gohed yet blong lidim ol gudfala man blong hem, we oli laef afta long taem blong Noa. Hemia bambae i givhan long yumi blong gat strong tingting blong folem ol advaes blong Jehova blong go long niufala wol.

NIU NESON MO NIU LOA

6. ?From wanem ol man Isrel oli mas folem ol loa we God i givim long Moses? ?Ol man Isrel oli mas gat wanem fasin?

⁶ Long taem blong Moses, Jehova i talem wanem fasin we ol man blong hem oli mas gat mo olsem wanem oli save wosipim hem. ?From wanem Jehova i talem olsem? Hemia from we ol samting oli jenis bakegen. Ol man Isrel oli bin wok slef long Ijip blong bitim tu handred yia. Ol man Ijip oli wosipim ol man we oli ded finis, ol aedol, mo plante narafala samting we God i no laekem. Taswe, taem ol man Isrel oli aot long Ijip, oli nidim ol niufala loa blong folem. Olsem nao, bambae oli kam wan neson we i folem nomo ol Loa blong Jehova. I gat sam buk we oli talem se Hibru tok ya “loa,” i joen wetem wan tok we i minim,“stretem, lidim, mo givim save.” Loa i protektem ol man Isrel long ol rabis fasin, mo ol giaman tijing blong ol kantri we oli stap raonabaot long olgeta. Taem ol man Isrel oli lesin long God, oli kasem blesing. Taem oli lego hem, oli kasem bigfala trabol.—Ridim Dutronome 28:1, 2, 15.

7. (1) Yu eksplenem from wanem Jehova i givim Loa long ol man blong hem. (2) ?Olsem wanem Loa i protektem ol man Isrel?

⁷ I gat wan narafala risen bakegen from wanem Jehova i givim ol niufala loa long ol man Isrel. Loa ya i rerem ol man Isrel from taem ya we Mesaea, we hem i Jisas Kraes, bambae i kam long wol. Hemia wan long ol stamba tingting blong Jehova. Mo tu, loa ya i givhan long olgeta blong oli luksave se oli sinman, mo oli nidim wan man we i stret gud, blong i tekemaot sin blong olgeta. (Galesia 3:19; Hibrus 10: 1-10) Antap moa, Loa ya i protektem famle laen blong Mesaea mo i givhan long ol man Isrel blong oli luksave Jisas taem hem i kam long wol. Yes, Loa ya i pija blong wan narafala samting, no i “olsem we pikinini i stap aninit long man we i lukaot long hem,” mo i lidim hem i go long Kraes.—Galesia 3:23, 24.

8. ?From wanem yumi mas letem ol bigfala tingting we Loa blong Moses i stanap long hem oli lidim yumi?

⁸ Ol Loa we Jehova i givim long ol man Isrel, oli save givhan tu long yumi ol Kristin. ?Oli save givhan olsem wanem? Yumi mas stop mo lukluk ol bigfala tingting we ol Loa ya oli stanap long hem. Nating se yumi no stap aninit long ol loa ya, be oli save lidimgud yumi evri dei mo halpem yumi blong wosipim Jehova. Hem i putum ol loa ya long Baebol blong oli tijim yumi, mo lidim yumi blong mekem samting folem ol bigfala tingting we ol loa ya oli stanap long hem. Mo tu, yumi glad se Jisas i tijim yumi long samting we i hae moa long ol Loa ya. Yu traem lesin long samting we Jisas i talem: “Yufala i harem finis we ol tija oli talem bifo se, ‘Yufala we i mared, bambae yufala i no mas go slip wetem narafala woman.’ Be mi mi talem long yufala, se man we i luk wan woman, nao i wantem hem tumas, i olsem we hem i slip wetem woman ya finis.” Taswe, yumi no blokem nomo rabis fasin blong man wetem woman, be yumi mas sakemaot eni rabis tingting we i save pulum yumi blong mekem nogud fasin ya.—Matiu 5:27, 28.

9. ?From wanem Jehova i givim niufala loa bakegen?

⁹ Afta we Jisas i kam Mesaea, Jehova i givim ol niufala loa mo i talemaot sam moa samting long saed blong stamba tingting blong hem. ?From wanem Jehova i mekem olsem? Hemia from we long yia 33, Jehova i sakemaot neson blong Isrel, mo i jusumaot Kristin kongregesen blong oli kam ol man blong hem. Taswe, hemia wan niufala jenis bakegen we i hapen long ol man blong Jehova.

JEHOVA I LIDIM OL TABU KRISTIN

10. ?From wanem Kristin kongregesen i kasem ol niufala loa? ?Olsem wanem ol loa ya oli defren long loa we ol man Isrel oli kasem?

¹⁰ Loa we Jehova i givim long Moses, i tijim ol man Isrel blong oli gat gudfala laef mo mekem wosip long Jehova. Stat long taem blong ol fas Kristin, ol man oli singaot ol man blong God se, Isrel blong God. Hemia from we oli kamaot long plante defren kantri, mo oli gat ol defren fasin blong laef. Olgeta nao oli statem Kristin kongregesen mo oli stap aninit long wan niufala kontrak. Jehova i givim ol niufala loa long olgeta, blong tijim olgeta blong oli gat gudfala laef mo mekem wosip long hem. I tru nomo se, “God i stap mekem i sem mak nomo long olgeta man. Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan laen blong Isrel, no i kamaot long wan narafala laen olgeta.” (Ol Wok 10:34, 35) Olgeta oli folem “loa blong Kraes,” we i stanap long ol rul we oli no raetem long ston, be i stap long hat blong olgeta. Loa ya i lidim mo i mekem i gud long ol Kristin long olgeta ples we oli stap long hem.—Galesia 6:2.

11. ?Wanem tu impoten samting we ol Kristin oli mas mekem blong folem “loa blong Kraes”?

¹¹ Jehova i yusum Jisas blong givim save long ol tabu Kristin mo lidimgud olgeta. Bifo we Jisas i mekem wan niufala kontrak, hem i tokbaot tu impoten samting. Faswan, hemia wok blong prij. Sekenwan, hemia fasin we ol Kristin oli mas mekem long narafala. Ol tok we Jisas i talem, oli stret long yumi evriwan, nating se bambae yumi laef olwe long heven no long wol ya.

12. ?Olsem wanem wok blong prij i kam bigwan moa?

¹² Long taem bifo, ol man blong narafala kantri oli mas kam long Isrel blong wosipim Jehova. (1 King 8:41-43) Be Jisas i talem wan samting long Matiu 28:19, 20. (Ridim.) Hem i talem long ol disaepol se oli mas “go” luk olgeta man. Jehova i wantem se gud nius i mas kasem olgeta ples long wol. Hem i soemaot samting ya long dei blong Pentekos long yia 33. Long taem ya, tabu spirit i kamdaon long samwe 120 man mo woman we oli blong niufala kongregesen, nao oli stat blong toktok long plante defdefren lanwis. Oli prij long ol man Isrel mo ol man we oli no laen blong Isrel. (Ol Wok 2:4-11) Biaen, oli prij long ol ples long Sameria. Long yia 36, wok blong prij i goaot moa long ol narafala kantri. Hemia i min se ol Kristin oli mas go prij long olgeta man long wol.

13, 14. (1) ?Wanem “niufala loa” we Jisas i talem? (2) ?Yumi lanem wanem long eksampol blong Jisas?

¹³ Jisas i talem wan “niufala loa” bakegen, blong soemaot fasin we yumi mas gat long ol brata mo sista blong yumi. (Ridim Jon 13:34, 35.) Yumi mas lavem olgeta evridei, mo yumi mas rere blong lusum laef blong yumi from olgeta. Hemia wan samting we Loa blong Moses i no talem.—Matiu 22:39; 1 Jon 3:16.

¹⁴ Jisas nao i beswan eksampol we i soemaot se hem i no tingbaot hem nomo, be hem i lavem olgeta man. Hem i lavem ol disaepol blong hem tumas, mo i rere nomo blong ded from olgeta. Mo hem i wantem se olgeta man we oli biaen long hem, oli mas mekem sem mak. Taswe, yumi mas rere blong stanap strong taem yumi kasem trabol, mo tu, yumi mas rere blong lusum laef blong yumi from ol brata mo sista blong yumi.—1 Tesalonaeka 2:8.

OL ADVAES BLONG TEDE MO BLONG FIUJA

15, 16. ?Wanem ol niufala jenis we oli kamaot tede? ?Olsem wanem God i stap lidim yumi?

¹⁵ Jisas i putumap ‘slef we i stret mo waes,’ blong i givimaot ol save blong Baebol long yumi, long “stret taem blong hem.” (Matiu 24:45-47) Sam long ol save ya, oli givhan long yumi blong folem rod we i stret taem i gat ol jenis oli kamaot. ?From wanem tede i gat ol jenis?

¹⁶ Baebol i talem se yumi stap laef long ol “lasdei,” mo i no longtaem bambae yumi luk wan bigfala trabol we neva man i luk bifo. (2 Timoti 3:1; Mak 13:19) Mo tu, God i sakemaot Setan wetem ol rabis enjel blong hem, oli aot long heven oli kamdaon long wol mo oli mekem plante trabol long ol man. (Revelesen 12:9, 12) Antap moa, from we yumi obei long tok blong Jisas, yumi prij long olgeta ples long wol.

17, 18. ?Yumi mas mekem wanem taem yumi kasem ol advaes?

¹⁷ Ogenaesesen blong Jehova i wokem plante buk, magasin, video, mo traket we oli olsem ol tul blong givhan long yumi long wok blong prij. ?Yu yu stap yusumgud ol tul ya? Long ol miting blong yumi, yumi stap kasem advaes olsem wanem yumi save yusumgud ol tul ya. ?Yu yu tingbaot ol advaes ya olsem se Jehova nao i givim?

¹⁸ Sipos yumi wantem kasem blesing blong God, yumi mas lesin gud long evri advaes we Jehova i givim long yumi, long taem blong ol miting. Sipos yumi lanem blong obei naoia, bambae i isi moa blong yumi folem ol advaes we yumi kasem long taem blong “bigfala trabol.” Long taem ya, God bambae i spolem rabis wol ya blong Setan. (Matiu 24:21) Biaen, bambae yumi nidim yet blong folem ol advaes, blong laef long niufala wol we i fri long paoa blong Setan.

19, 20. ?Wanem ol buk we bambae oli open? ?Bambae yumi kasem wanem blesing sipos yumi folem ol advaes long ol buk ya?

¹⁹ Long taem blong Moses, God i givim Loa long ol man Isrel blong i lidim olgeta. Biaen, Kristin kongregesen i folem “loa blong Kraes.” Long sem fasin, Baebol i talem se long niufala wol bambae i gat ol niufala loa blong lidim yumi, we oli stap long ol buk. (Ridim Revelesen 20:12.) Ol buk ya bambae oli tokbaot ol samting we Jehova i wantem yumi blong mekem long taem ya. Taem yumi stadi long ol buk ya, bambae yumi evriwan wetem olgeta we bambae oli laef bakegen, yumi save samting we God i wantem. Ol buk ya bambae oli givhan long yumi blong save ol tingting blong Jehova. Long Paradaes, save blong yumi long Baebol bambae i kamgud moa, nao bambae yumi soemaot ol gudfala fasin olsem, lav, respek, mo ona. (Aesea 26:9) Yu traem tingbaot ol samting we bambae yumi lanem mo tijim ol narafala, aninit long rul blong Jisas Kraes.

²⁰ Sipos yumi folem ol advaes we oli “raetemdaon long ol buk” ya, mo yumi holemstrong long Jehova go kasem taem we Setan i traem ol man laswan, bambae Jehova i raetemdaon nem blong yumi long ‘buk blong laef.’ !Nao, yumi save kasem laef we i no save finis! Taswe, naoia yumi mas STOP mo ridim Baebol, LUKLUK blong kasemsave samting we yumi mas mekem, mo LESIN taem yumi obei long ol advaes blong God. Sipos yumi mekem olsem, yumi naf blong stanap strong kasem en blong bigfala trabol mo bambae yumi glad blong save gud Jehova, God ya we i waes mo i lavem yumi.—Prija 3:11; Rom 11:33.