?Yu Yu Save?

?From wanem Jisas i talem se, ol man we oli salem ol anamol long tempol long Jerusalem oli “stilman”?

BUK blong Matiu i talem se: “Jisas i go insaed long haos tempol mo i ronemaot ol man we oli stap salem samting mo oli stap pem samting long haos tempol, mo hem i kafsaedem tebol blong ol man we oli stap jenisim mane mo ol stul blong olgeta we oli stap salem sotleg. Mo hem i talem long olgeta se: ‘Baebol i talem se: “Haos blong mi bambae oli talem se haos blong prea,” be yufala i mekem i kam ples blong haed blong ol stilman.’”—Matiu 21:12, 13.

Ol buk blong histri oli talem se ol man blong salem samting long tempol oli stap spolem ol man, from we oli sasem tumas ol anamol. Traem tingbaot: Oltaem ol sotleg oli jip nomo, taswe ol puaman oli save pem blong mekem sakrefaes long olgeta. Be ol olfala buk blong ol man Jiu oli talem se samwe long ol faswan handred yia, praes blong tu sotleg, hemia wan denarias we oli wokem long gol. Wan man i mas wok 25 dei blong kasem mane ya. Taswe, ol puaman oli no moa save pem ol sotleg from we oli sas tumas. (Levitikas 1:14; 5:7; 12:6-8) Rabae Simeon ben Gamaliel i kros tumas from samting ya, nao i daonem namba blong ol sakrefaes we ol man Jiu oli stap mekem. Taem hem i mekem olsem, wantaem nomo, ol man blong salem samting oli katem praes i godaon we i godaon, i 100 taem moa jip i bitim bifo.

Yumi kasem save se ol man we oli salem ol samting long tempol oli wantem mane tumas mo oli spolem ol man. Taswe, i stret nomo we Jisas i talem se oli “stilman.”