?Baebol i Talem Wanem Long Saed Blong Laef Tugeta Bifo Mared?

Ansa we Baebol i givim

Baebol i tokbaot se God i no wantem we ol man oli “mekem enikaen doti fasin blong seks.” (1 Tesalonaeka 4:3) Long Baebol, tok ya “enikaen doti fasin blong seks” i save minim ol fasin olsem adaltri, homoseksuol, mo wan man mo woman i mekem seks be oli no mared.

?From wanem God i intres blong save sipos wan kapol i mared o nogat?

Arenjmen blong mared i kam long God. Hem i stanemap faswan mared taem hem i joenem fas man mo fas woman. (Jenesis 2:22-24) Hem i no gat tingting ya se wan man mo wan woman i save laef tugeta we oli no mared.
God i save samting we i gud long yumi ol man. Hem i wokem mared olsem wan samting we i joenem wan man mo wan woman blong olwe, we oli save haremgud long hem mo i protektem evri memba blong famle. Traem tingbaot eksampol ya. Yu go pem wan tebol we oli no joenjoenem yet, be insaed long hem i gat ol instraksen we oli soem long yu olsem wanem blong joenem ol wanwan pis blong tebol ya. Long sem fasin, ol instraksen blong God oli soem long yumi olsem wanem blong gat wan gudfala famle we i joen gud. Mo oltaem ol rul ya blong God oli givhan long olgeta we oli stap folem.—Aesea 48:17, 18.

Wan kampani i givim ol instraksen blong soem long yu olsem wanem blong joenem wan pis tebol. Ol instraksen blong God oli talem long yumi olsem wanem blong gat wan hapi famle
Nogud frut i kamaot taem man i mekem seks bifo long mared. Eksampol, gel i gat bel nating se hem i no wantem, seksuol transmited disis (STD), mo harem nogud bitimak.
God i mekem man mo woman long wan fasin we oli save gat pikinini taem oli mekem seks. God i luk laef olsem wan samting we i tabu, mo fasin ya blong gat pikinini i olsem wan sas presen. God i wantem se yumi gat respek long presen ya taem yumi soem ona long arenjmen blong mared we hem i stanemap.—Hibrus 13:4.

?Olsem wanem long fasin ya blong laef tugeta bifo mared blong luk sipos tufala i save stap tugeta?

Blong gat wan gudfala mared, i no nid blong man mo woman i laef tugeta blong sam taem blong luk sipos tufala i naf blong laef tugeta o nogat. Defren olgeta, tufala i save gat wan strong fasin fren sipos tufala i rili lavlavem tufala mo tufala i wok wanples blong winim ol problem.a Mared i mekem lav blong tufala i kam strong moa.—Matiu 19:6.

?Olsem wanem ol kapol oli save gat wan strong mared?

I no gat wan mared we i stret gud olgeta. Nating se i olsem, ol kapol oli save gat wan strong mared taem oli folem ol advaes blong Baebol. Hemia sam eksampol:

Yu mas kea moa long ol nid blong patna blong yu i bitim blong yu wan.—1 Korin 7:3-5; Filipae 2:3, 4.
Soemaot lav mo respek long yutufala.—Efesas 5:25, 33.
Lanem blong kontrolem ol toktok blong yu.—Ol Proveb 12:18.
Gat longfala tingting mo kwik blong fogiv.—Kolosi 3:13, 14.

a Yu luk haf ya “Wokhad Blong Holem Promes.”