?Setan i Olsem Wanem?

Baebol i ansa

Setan i wan spirit, taswe hem i no gat wan bodi mo yumi no save luk hem.—Efesas 6:11, 12.

Wan pija blong Setan we i holem wan fok. Hem i olsem wan nani we i gat hon mo tel.

Plante man oli droem pija blong Setan olsem wan nani, i gat hon, tel, mo i holem wan bigfala fok. Samfala oli ting se ol man we oli laef bitim 1,000 yia bifo, oli droem ol pija ya fastaem. Ating ol kastom stori mo giaman tingting blong sam narafala man i gat paoa long olgeta.

?Baebol i talem se Setan i olsem wanem?

Baebol i yusum plante pijatok blong soemaot se Setan i olsem wanem. Oli givhan long yumi blong kasem save long fasin blong hem, be i no long bodi blong hem. Baebol i talem se Setan i olsem:

Wan enjel blong laet. Hem i mekem ol man oli ting se bambae oli kasem wan gudfala samting sipos oli folem ol tijing blong hem i bitim we oli folem ol tijing blong God.—2 Korin 11:14.
Wan laeon we i stap singaot bigwan. Hem i agensem strong ol man we oli wosipim God.—1 Pita 5:8.
Bigfala algita. Hem i mekem man i fraet, hem i gat paoa, mo i spolem man.—Revelesen 12:9.

Sam vas blong Baebol long saed blong Setan

2 Korin 11:14: “Setan . . . i stap mekem olsem se hem i wan enjel blong laet.”

Mining: Setan i mekem olsem se hem i gud, blong trikim ol man blong oli folem ol tijing blong hem i bitim we oli folem ol tijing blong God.
Efesas 6:11: “Putum olgeta klos blong faet we God i givim, blong bambae yufala i save stanap strong agensem ol giaman trik blong Setan.”

Mining: Setan i mekem ol rabis plan blong trikim ol man, blong oli no obei long God.
Jemes 4:7: “Yufala i mas putum yufala i stap aninit long God, be yufala i mas agensem Setan, mo hem bambae i ronwe long yufala.”

Mining: Yumi save winim Setan sipos yumi obei long God, be i no long hem.
1 Pita 5:8: “Enemi blong yufala, Setan, i stap goraon long yufala olsem wan laeon we i stap singaot bigwan, i stap lukaot man blong i kakae.”

Mining: Setan i no laekem nating ol man we oli obei long god, mo hem i wantem mekem se oli no moa fren wetem hem.