?Hu Ya Meri Magdala?
Ansa we Baebol i givim
Meri Magdala i wan woman we i folem Jisas Kraes. Magdala (o Magadan) i nem blong wan taon klosap long Lagun blong Galili, we maet Meri i bin stap long hem.
Meri Magdala i wan long plante woman we oli wokbaot wetem Jisas mo ol disaepol blong hem, blong lukaot long olgeta long saed blong kakae mo ol narafala samting olsem. (Luk 8:1-3) Meri i stap taem oli nilim Jisas long pos, mo hem i wan long ol faswan we oli luk Jisas taem hem i laef bakegen.—Mak 15:40; Jon 20:11-18.
?Meri Magdala i wan woman blong rod?
Baebol i no talem se Meri Magdala i wan woman blong rod, be i talem nomo se Jisas i ronemaot seven rabis spirit long hem.—Luk 8:2.
?Tingting ya se hem i wan woman blong rod, i kamaot wea? Plante handred yia afta we Meri i ded, samfala oli talem se hem i sem woman we i wasem leg blong Jisas wetem wota blong ae blong hem mo waepem long hea blong hem. Baebol i no talem nem blong woman ya, maet hem i wan woman blong rod. (Luk 7:36-38) Be Baebol i no sapotem bilif ya se woman ya hem i Meri.
?Meri Magdala i wan “aposol blong ol aposol”?
Nogat. Katolik Jos i singaot Meri se “Sen Meri Magdala” mo “aposol blong ol aposol,” from we Meri i wan long ol faswan blong karem nius i kam long ol aposol se Jisas i laef bakegen. (Jon 20:18) Be hemia i no min se hem i wan aposol. Mo i no gat wan samting long Baebol blong soemaot se hem i wan aposol.—Luk 6:12-16.
Ol man oli finisim wok blong raetem Baebol klosap long 100 K.T. Be jos i jes leftemap Meri long ol yia afta 500 K.T. Long ol yia 100 mo 200 K.T., sam hanraet we oli no stap long Baebol oli talem se sam aposol blong Jisas oli jalus long Meri. Hemia ol stori we ol man nomo oli mekemap be oli no stap long Baebol.
?Meri Magdala i waef blong Jisas Kraes?
Nogat. Baebol i soemaot klia se Jisas i no mared.a
a Yu luk haf ya “?Jisas i Mared? ?Hem i Gat Ol Brata Mo Sista?”