?Bambae i No Moa Gat Problem Blong Ekonomi Samtaem?

Long plante kantri, ol man oli protes long rod from we ol problem blong ekonomi oli stap kam antap tumas. COVID-19 pandemik i mekem ol problem ya oli kam mowas, ol man oli kros moa from ol lokdaon, oli sot long sam samting, mo oli no save kasem gudfala tritmen long saed blong helt. Ol samting ya i soemaot klia se laef blong ol rijman i defren olgeta long laef blong ol puaman.

?Olsem wanem? ?Problem blong ekonomi we i mekem ol man oli safa, bambae i finis samtaem? Yes. Baebol i tokbaot samting we God bambae i mekem blong stretem problem ya.

Ol problem blong ekonomi we God bambae i stretem

Problem: Ol man oli no save mekem se ekonomi i naf blong givim ol samting we ol man oli nidim.

Rod blong stretem: God bambae i mekem se Kingdom blong hem i tekem ples blong ol gavman blong man. Kingdom ya we i stap long heven, bambae i rulum fulwol.—Daniel 2:44; Matiu 6:10.

Risal: From we Kingdom blong God bambae i rulum fulwol, hem i naf blong stretem evri problem long wol. Ol man bambae oli no moa pua o wari se oli no gat naf samting blong stap laef. (Ol Sam 9:7-9, 18) Be bambae oli harem gud long frut blong wok blong olgeta, mo oli gat wan gudfala laef wetem famle blong olgeta. Baebol i promes se: “Bambae oli bildim ol haos mo oli stap long olgeta, mo bambae oli planem ol plantesen blong grep mo oli kakae ol frut blong olgeta. Bambae oli no bildim haos blong wan narafala man i stap long hem, no oli planem kakae blong ol narafala man oli kakae.”—Aesea 65:21, 22.

Problem: Ol man oli no save blokem ol trabol we i mekem olgeta oli safa, mo i mekem se oli sot long plante samting.

Rod blong stretem: God bambae i yusum Kingdom blong hem blong tekemaot ol trabol we i mekem man i fraet mo i harem se hem i no sef.

Risal: Aninit long rul blong God, ol man bambae oli no moa kasem ol trabol we i mekem olgeta mo ol famle blong olgeta oli sot long samting we oli nidim. Olsem nao, ol faet, kakae i sot, mo ol pandemik, bambae oli finis blong olwe. (Ol Sam 46:9; 72:16; Aesea 33:24) God i talem se: “Ol man blong mi bambae oli laef long wan ples we i gat pis olwe, bambae oli laef long wan ples we i sefgud, mo long wan kwaet ples blong spel.”—Aesea 32:18.

Problem: Plante taem ol man we oli tingbaot olgeta nomo mo oli griri, oli spolem ol narafala man.

Rod blong stretem: Aninit long Kingdom blong God, ol man bambae oli lanem blong lavem ol narafala mo tingbaot narafala fastaem long olgeta.—Matiu 22:37-39.

Risal: Taem Kingdom blong God i rul, evri man bambae i folem fasin blong God blong soemaot lav, mo man we i gat lav i “no tingbaot hem wan nomo.” (1 Korin 13:4, 5) Baebol i talem se: “Bambae oli no mekem eni trabol no oli spolem eni samting long olgeta ples long bigfala hil blong mi we i tabu, from we bambae wol ya i mas fulap gud long save blong Jehovaa olsem we wota i kavremapgud solwota.”—Aesea 11:9.

Baebol i soemaot se yumi stap naoia long ol las dei, mo i no longtaem God bambae i mekem promes blong hem i kamtru, blong finisim ol problem blong ekonomi.b (Ol Sam 12:5) Go kasem taem ya, ol advaes blong Baebol i save givhan long yu blong winim problem blong ekonomi we yu fesem. Yu save luk tufala atikol ya, “Laef Wetem Smol Mane Nomo” mo “?Mane i Gud No i Nogud?”

Rong tingting long saed blong Baebol mo ekonomi

Rong tingting: Fasin pua bambae i neva finis, from we Jisas i talem se: “Ol puaman oli stap oltaem wetem yufala.”—Matiu 26:11.

Trutok: Jisas i talem nomo samting we i stap hapen oltaem long wol ya. Go kasem taem we rabis sistem blong wol ya i finis, bambae i gat ol puaman i stap. Be Jisas i talemaot “gud nius long ol puaman,” hemia promes blong God tu se Kingdom blong hem bambae i finisim fasin pua blong olwe.—Luk 4:18, 43.

Rong tingting: Ol man we oli wantem mekem God i glad oli mas pua, from we Jisas i talem se: “Go salemaot olgeta samting blong yu mo yu givim long ol puaman.”—Matiu 19:21.

Trutok: Jisas i no stap talem wan rul we ol man blong hem oli mas folem. Hem i stap givim advaes long wan yangfala man we i laekem mane tumas. Jisas i pulum man ya blong mekem laef blong hem i simpol mo folem hem.

Rong tingting: Taem God i blesem man, hem i mekem man ya i kam rij, from we Baebol i talem se: “Blesing blong Jehova, hemia nao samting we i mekem man i rij.”—Ol Proveb 10:22.

Trutok: Long Baebol, klosap oltaem “blesing blong Jehova” i no minim ol sas samting blong wol ya, be i minim ol samting olsem laef we i gat mining, gudfala fasin fren wetem God, mo wan gudfala hop blong fiuja. (Ol Sam 25:14; Jon 17:3) I tru se God i bin givim ol sas samting long sam man blong hem blong blesem olgeta, be bighaf blong ol man we oli bin kam Kristin oli no rij. (Jenesis 24:34, 35; Jemes 2:5) Jisas tu i no gat plante samting.—Matiu 8:20.

Rong tingting: Baebol i tijim sem tingting we ol komunis oli gat, from we i tokbaot ol fas Kristin se oli “serem olting blong olgeta long ol narawan. Mo oli salem olting mo graon blong olgeta.”—Ol Wok 2:44, 45.

Trutok: Ol vas ya oli tokbaot wan plan we i blong smoltaem nomo, blong givhan long samfala we oli jes kam Kristin. Olgeta ya oli aot long ol narafala ples oli kam long Jerusalem blong joen long lafet blong Pentekos we ol man Jiu oli mekem. (Ol Wok 2:5) Be taem oli kam Kristin, oli stap long Jerusalem longtaem moa, blong oli save lanem moa long saed blong niufala bilif blong olgeta. From samting ya, ol narafala Kristin oli glad nomo blong givim samting we oli gat, blong halpem olgeta long saed blong kakae mo ples blong slip.—Ol Wok 2:41, 42, 46, 47.

a Jehova i nem blong God long Baebol.—Ol Sam 83:18.

b Blong luk se yu save trastem Baebol, ridim atikol ya “Baebol—Buk Blong Trutok.”