Lusum Wok—Advaes Blong Baebol We i Save Givhan
Taem yu lusum wok blong yu, yu sot long mane, be i no hemia nomo. Trabol ya i save afektem famle, filing, mo tingting blong yu tu. Traem luk ol advaes ya we oli kamaot long Baebol, mo oli save givhan long yu.
Talemaot filing blong yu long narafala.
Samting we Baebol i talem: “Wan tru fren i soemaot lav oltaem.”—Ol Proveb 17:17.
Afta we yu lusum wok blong yu, maet yu harem nogud, yu kros, tingting blong yu i fasfas, o yu harem se yu gud blong nating nomo. Be taem yu talemaot ol filing blong yu long ol famle mo long ol gudfala fren blong yu, oli save halpem yu blong harem gud bakegen. Mo tu, maet oli givim ol gudfala advaes we i save givhan long yu blong faenem wan narafala wok.
No wari bitim mak.
Samting we Baebol i talem: “Yufala i no mas wari tumas from ol samting blong tumoro. Ol wari blong tumoro oli blong tumoro.”—Matiu 6:34.
Baebol i pulum yumi blong mekem plan. (Ol Proveb 21:5) Be i talem tu se yumi no mas wari bitim mak long samting we i save hapen long fiuja. Plante taem, yumi wari from samting we maet i neva hapen. I moa gud blong tingbaot tede nomo.
Yu save faenem sam moa gudfala advaes long Baebol blong halpem yu blong winim wari. Blong lanem moa, luk atikol ya “?Yu Save Mekem Wanem Taem Yu Wari?”
Mekem sam jenis long fasin blong spenem mane.
Samting we Baebol i talem: ‘Mi mi lanem finis blong harem gud, nomata se mi gat plante samting o mi no gat samting nating.’—Filipae 4:12.
Mekem sam jenis folem situesen blong yu. I gud yu jenisim fasin blong yu blong spenem mane mo yu no westem olbaot. Yu no mas gat plante kaon.—Ol Proveb 22:7.
Blong save moa olsem wanem blong mekem jenis long laef blong yu folem mane we yu gat, yu luk atikol ya “Laef Wetem Smol Mane Nomo.”
Yusum gud taem blong yu.
Samting we Baebol i talem: “Yufala i mas gohed blong wokbaot long fasin we i waes . . . , mo yufala i mas yusum gud taem blong yufala.”—Kolosi 4:5.
Naoia we yu no moa go long wok, i gud yu yusum taem ya we i fri long waes fasin. Sipos yu mekem wan program mo folem, bambae laef blong yu i no olbaot mo yu harem gud.
Glad blong mekem enikaen wok.
Samting we Baebol i talem: “Taem man i wok had long enikaen wok, gudfala samting i kamaot from.”—Ol Proveb 14:23.
Yu mas glad blong mekem wok we i defren long hemia we yu mekem bifo. Maet yu mas jusum wan wok we i no impoten o i no givim bigfala mane olsem wok we yu gat fastaem.
Gat strong tingting.
Samting we Baebol i talem: “Yu saksakem ol sid long moning mo yu no letem han blong yu i spel go kasem long sapa, from we yu no save se weswan bambae i gru.”—Prija 11:6.
Gohed blong lukaotem wok. Talemaot long ol narafala se yu stap lukaotem wok. Toktok long ol famle blong yu, ol man we yu save, ol man we yu wok wetem bifo, mo ol neba. Jekem ol ofis we oli stap askem wok, ol advetaesmen long niuspepa, mo ol websaet blong ol bisnes we oli gat wok. Yu mas rere blong go long plante intaviu blong wok, mo fulumap plante aplikesen bifo we yu faenem wan wok.