Ples i Drae Bitim Mak ?Baebol i Talem Wanem?

• “Ol ripot long Jaena oli talem se yia ya i ‘hot moa’ i bitim olgeta yia bifo, mo i gat tu yia nomo we ples i drae moa i bitim yia ya.”—The Guardian, 7 Septemba 2022.

• “Hemia namba faef yia we Bigfala Hon blong Afrika i no moa kasem ren.”—UN News, 26 Ogis 2022.

• “Bighaf blong Yurop i kasem woning se ples bambae i drae bitim mak. Maet bambae i drae moa i bitim ol 500 yia we i pas.”—BBC News, 23 Ogis 2022.

Plante man we oli stadi long weta, oli talem se ol draetaem ya bambae oli gohed mo bambae oli kam mowas. ?I gat hop se samting ya bambae i kamgud long fiuja? ?Baebol i talem wanem?

Ol draetaem mo profet tok blong Baebol

Baebol i talem long saed blong taem blong yumi se:

• “Olbaot long wol bambae kakae i sot.”—Luk 21:11.

Taem ples i drae bitim mak, plante taem kakae i sot tu. Profet tok blong Baebol i talem se bambae kakae i sot, mo plante man bambae oli safa mo ded from.—Revelesen 6:6, 8.

?From wanem ol draetaem oli stap kam mowas?

Baebol i talem stamba risen blong samting ya, i se:

• “Man we i stap wokbaot, hem tu i no naf blong lidim step blong hem.”—Jeremaea 10:23.

Yes, ol man oli no naf blong “lidim step blong [olgeta],” hemia i min se oli no naf blong rulum olgeta bakegen. Plante taem, ol nogud desisen blong olgeta i mekem se ples i kam drae bitim mak mo ol man oli sot long wota.

• Plante saentis oli agri se ol man nao oli stamba blong problem ya we wol i stap kam hot tumas, mo hemia i mekem se i gat plante moa ples long wol we oli drae bitim mak.

• Griri fasin mo desisen blong ol man blong katemdaon plante tumas tri, mo letem ol doti i spolem win mo wol, mo no yusum gud ol samting we i sapotem laef long wol, i mekem se olbaot long wol plante man oli sot long wota.

Be Baebol i givim hop.

?I gat hop se samting ya bambae i kamgud long fiuja?

Baebol i promes se God bambae i fiksimap problem ya we plante man oli no gat naf wota. ?Olsem wanem bambae hem i mekem?

1. 1. God bambae i “spolem ol man ya we oli stap spolem wol.” (Revelesen 11:18) Wan risen from wanem i no gat naf wota, hemia ol aksen blong ol griri, rabis man we oli stap spolem envaeronmen. God bambae i spolem olgeta.—2 Timoti 3:1, 2.

2. 2. “Ol graon long ples we i hot mo i drae, bambae oli fulap long ol pul blong wota we i gat ol longlongfala gras long hem.” (Aesea 35:1, 6, 7) God bambae i fiksimap ol trabol we draetaem i mekem, mo wol bambae i kam wan paradaes we i gat plante wota.

3. 3. “Yu yu lukaot gud long wol ya, yu mekem i karem plante frut mo i rij gud.” (Ol Sam 65:9) God bambae i blesem graon ya, nao wol bambae i fulap long ol gudfala kakae, mo bambae i gat klin wota blong evriwan.