Ol Bigfala Flad—?Baebol i Talem Wanem?

Raon long wol, ol bigfala flad oli spolem plante man. Luk sam long ol ripot ya:

• “Long sam dei we i pas, kapital blong Jaena i kasem wan hevi ren long Sarede kasem Wenesde, we i 744.8 milimita. Kaen hevi ren ya i bin hapen 140 yia bifo, mo naoia i hapen bakegen.”—AP News, 2 Ogis 2023.

• “Bigfala hariken ya Khanun, i mekem se i gat hevi ren mo strong win long saot blong Japan. Mo long seken dei blong bigfala hariken ya, hemia long Tasde, hem i kilim tu man i ded. . . . Antap long ol hil blong sentrol Taewan, bigfala ren ya i kasem klosap 0.6 meta.”—Deutsche Welle, 3 Ogis 2023.

• “Flad we i hapen long wiken [long Nova Skotia] i kamaot from wan hevi ren we i stap go from ol rijen blong Atlantik Kanada, mo hemia wan ren we i bin hapen olsem bitim 50 yia finis.”—BBC News, 24 Julae 2023.

?Baebol i talem wanem long saed blong ol trabol ya?

Wan saen blong “ol las dei”

Baebol i talem se yumi laef long wan taem we oli singaot se “ol las dei.” (2 Timoti 3:1) Jisas i bin talemaot se long taem blong yumi, bambae yumi luk ‘plante samting we i mekem man i fraet.’ (Luk 21:11) Klaemet jenis i mekem se ol weta oli narakaen, yumi no save talem se bambae i olsem wanem, i hapen oltaem, mo i kam moa nogud.

Wan risen we i givim hop

Baebol i talem se ol samting blong mekem man i fraet we yumi stap luk tede, oli olsem ol pruf we i soemaot se yumi gat wan hop. ?From wanem yumi talem olsem? From we Jisas i talem se: “Taem yufala i luk ol samting ya oli stap kamtru, yufala i mas save se Kingdom blong God i klosap.”—Luk 21:31; Matiu 24:3.

Ol samting we yumi luk oli stap hapen, oli soemaot se i no longtaem Kingdom blong God bambae i finisim fulwan ol trabol blong weta, inkludum wota saekol.—Job 36:27, 28; Ol Sam 107:29.

Blong save moa olsem wanem Kingdom blong God bambae i mekem wol ya i kam gud, yu luk atikol ya “?Hu Bambae i Sevem Wol?”