Ol Trabol Long Politik i Mekem Profet Tok Blong Baebol i Kamtru
Tede ol man oli gat defdefren tingting long politik. Oli raorao from ol loa we oli mas folem evri dei, mo oli strong blong talemaot ol defdefren tingting we oli gat long politik. Ol haeman long gavman mo olgeta we oli mekem ol loa oli agiu, oli agensem olgeta bakegen, mo i no gat wan long olgeta we i rere blong lego prapa tingting blong hem. Ol trabol ya i blokem gavman blong i no save mekem wok we hem i mas mekem.
Samting we i gat bigfala mining, hemia trabol long politik we i stap kamaot long Amerika mo Briten (hemia narafala nem blong Yunaeted Kingdom). ?From wanem yumi talem olsem? From we Baebol i talem se trabol ya bambae i kamaot long taem we gavman blong God long heven bambae i mekem ol bigfala jenis long wol ya.
Trabol long politik “long las haf blong ol dei”
Yumi save sapraes bigwan long profet tok blong Daniel long Baebol. Long profet tok ya, God i soemaot “samting we bambae i kamtru long las haf blong ol dei.” Hemia ol samting we oli hapen afta long taem blong Daniel, long wan impoten taem long histri.—Daniel 2:28.
Profet tok ya i stap long wan drim we God i givim long king blong Babilon. Long drim ya, king i luk wan bigfala statiu we oli wokem long ol defren sas ston mo aean. Daniel i eksplenem mining blong statiu ya, stat long hed blong hem i godaon kasem leg blong hem daon, taem i talem ol bigfala politik paoa we bambae oli stanap mo foldaon long ol yia we ol man oli rul.a Biaen, wan bigfala ston, we i minim Kingdom o gavman we God i setemap, bambae i smasem bigfala statiu ya.—Daniel 2:36-45.
Profet tok ya i talem se Kingdom blong God bambae i tekem ples blong ol gavman blong man. Hemia nao Kingdom ya we Jisas i tijim ol man blong hem blong prea from, taem hem i talem se: “Yu mekem Kingdom blong yu i kam.”—Matiu 6:10.
?Be wanem haf blong profet tok ya i soemaot ol trabol we bambae i gat long politik? Makem vas ya we i talem se ol leg blong statiu daon oli “haf aean mo haf klei.” (Daniel 2:33) Hemia i defren long ol strong ston mo aean we oli wokem ol narafala haf blong statiu ya long hem, mo i stap tokbaot wan politik paoa we bambae i defren long ol narawan. ?Bambae hem i defren olsem wanem? Profet tok blong Daniel i eksplenem se:
Folem profet tok ya, leg blong statiu daon i pija blong wan politik paoa we i gat plante trabol insaed long hem. Ol man we oli stap aninit long rul blong hem bambae oli mekem ol samting we i daonem paoa blong hem mo i mekem i had blong politik paoa ya i stanap strong.
Profet tok blong Daniel i kamtru tede
Leg blong statiu daon i pija blong politik paoa we i strong moa tede, hemia Amerika mo Briten we tufala i wok tugeta. ?Olsem wanem ol samting we i hapen long taem blong yumi i pruvum samting ya?
Leg blong statiu daon i “haf aean mo haf klei,” hemia i mekem se leg i no strong. (Daniel 2:42) Tede, ol man long Amerika mo Briten oli seseraot long ol defren tingting, mo hemia i daonem paoa blong tufala kantri ya. Eksampol, ol grup blong man insaed long wanwan kantri ya oli girap agensem olgeta bakegen. Mo tu, ol man blong mekem raf fasin oli protes blong kasem samting we oli ting se oli gat raet blong kasem. Plante taem ol haeman blong gavman oli no save agri long wan desisen. From we ol man oli seseraot olsem, plante taem tufala gavman ya i no naf blong mekem ol desisen blong tufala oli stanap strong.
Daniel japta 2 i talemaot trabol we ol gavman oli fesem
Tingbaot mining blong sam narafala smosmol samting long profet tok blong Daniel, mo olsem wanem oli stap kamtru tede:
Profet tok: “Kingdom ya bambae i seraot, be sam haf blong kingdom ya bambae oli strong olsem aean.”—Daniel 2:41.
Mining: Nating se Amerika mo Briten i gat problem from we ol man long tufala kantri ya oli seseraot long saed blong politik, be tufala kantri ya i gat ol strong ami. Hemia i mekem se tufala i strong olsem aean, from we tufala i save mekem plante samting we i gat paoa long fulwol.
Profet tok ya i kamtru
Long 2023, Amerika mo Briten i spenem moa mane long ol tul blong faet, i bitim ol 12 narafala kantri tugeta we oli spenem bigfala mane long ol tul ya.—Stockholm International Peace Research Institute.
“I no gat tu narafala kantri long wol we oli wok tugeta olsem Amerika mo Briten . . . blong protektem kantri blong olgeta, mo oli yusum ol niufala save mo teknoloji blong mekem olsem. . . . Mitufala i wok tugeta, mitufala i sapotem mitufala, mo mitufala i faet tugeta.”—Strategic Command, U.K. Ministry of Defence, Eprel 2024.
Profet tok: “Olsem we ol tou long leg daon oli haf aean mo haf klei, long sem fasin, haf blong kingdom ya bambae i strong mo haf i no strong.”—Daniel 2:42.
Mining: Nating se Amerika mo Briten i gat ol strong ami mo tul blong faet, oli no save mekem evri samting we oli wantem mekem from we tufala i gat wan demokratik gavman. Hemia i min se, sipos bighaf blong ol man blong vot oli no agri long wan plan blong gavman, i had blong gavman i mekem plan ya i kamtru.
Profet tok ya i kamtru
“Sam man we oli gat bigfala save long politik, oli talem se from we ol man blong politik long Amerika oli no save agri, i had blong [Amerika] i mekem samting we hem i talem long evriwan long wol se i save mekem, eksampol long saed blong sekiuriti mo bisnes.”—“The Wall Street Journal.”
“Ol haeman long politik long Briten oli stap traehad blong winim ol problem long politik we oli neva fesem bifo, mekem se olgeta long sivil sevisb oli no save folem ol jenis we gavman i wantem mekem blong halpem ol man long kantri ya.”—Institute for Government.
Profet tok: “Stret olsem we yu luk aean i miks wetem sofsof klei, bambae [kingdom ya i] miks wetem ol man olbaot, be bambae oli no fas wanples, we wan i fas long narawan.”—Daniel 2:43, futnot.
Mining: Long ol demokratik kantri, ol man we oli no man blong politik oli gat paoa long samting we gavman i mekem, be samting we i kamaot i no mekem ol man blong politik oli glad mo i no mekem ol man blong vot tu oli glad.
Profet tok ya i kamtru
“Tede, bighaf blong ol man Amerika oli no gat gudfala tingting nating long politik mo long ol man long gavman.”—Pew Research Center.
“Tede ol man long Briten oli no moa trastem gavman mo ol man blong politik, tingting blong olgeta long fasin blong ol man ya blong rul i mowas naoia i bitim ol 50 yia we i pas.”—“National Centre for Social Research.”
Profet tok blong Daniel long saed blong fiuja
Folem profet tok blong Daniel, Amerika mo Briten bambae i stap olsem bigfala politik paoa blong wol taem Kingdom blong God i tekem ples blong ol gavman blong man.—Daniel 2:44.
Long wan profet tok long Revelesen we i tokbaot samting ya, i talem se ‘ol king long evri ples long wol’ bambae oli hivap blong agensem Jehovac God long faet ya blong Amagedon, hemia “faet long bigfala dei blong God Ya We i Gat Olgeta Paoa.” (Revelesen 16:14, 16; 19:19-21) Long faet ya, Jehova bambae i spolem ol gavman blong man, mo hemia bambae i finisim gud olgeta politik paoa blong wol we statiu long profet tok blong Daniel i pija blong olgeta.
Blong save moa, yu luk atikol ya “?Wanem Ya Faet Blong Amagedon?”
Kasem gudfala samting from profet tok blong Daniel long saed blong ol trabol long politik
Baebol i talemaot stret ol trabol long politik we i stap hapen long Amerika mo Briten tede, mo sipos yu kasem save moa long saed ya, bambae yu gat wan defren tingting long ol samting we i stap hapen long wol.
Bambae yu kasem save from wanem Jisas i wantem se ol man blong hem oli no joen nating long ol politik blong wol. (Jon 17:16) Mo tu, bambae yu kasem save from wanem Jisas, we God i jusum hem blong kam King blong Kingdom blong hem, i talem se: “Kingdom blong mi i no blong wol ya.”—Jon 18:36.
Bambae yu glad long hop ya se i no longtaem, Kingdom blong God bambae i tekem aksen blong jenisim evri samting, mo blong karem ol blesing i kam we God i promes blong givim long ol man.—Revelesen 21:3, 4.
Bambae yu putum tingting blong yu i stap strong long wan gudfala fiuja, yu no moa wari se ol raorao blong ol nesen bambae i spolem wol ya.—Ol Sam 37:11, 29.
Profet tok blong Daniel i soemaot se leg blong statiu daon, we i pija blong politik paoa blong Amerika mo Briten, i laswan gavman blong man blong rulum wol. !Afta long hemia, bambae i gat wan gavman long heven we i stret olgeta, hemia Kingdom blong God, i rulum wol!
Blong faenemaot moa long samting we Kingdom blong God bambae i mekem long ol man, wajem video ya ?Wanem Ya Kingdom Blong God?
b Sivil sevis i minim “olgeta man we oli wok blong gavman blong givhan long ol man.”—Merriam-Webster’s Unabridged Dictionary.
c Jehova i prapa nem blong God. (Ol Sam 83:18) Luk atikol ya “?Hu Ya Jehova?”