Pis Long Wol—?From Wanem i Had Blong Gat Pis?
Ansa we Baebol i givim
Ol man oli traehad blong mekem pis long fulwol, be neva oli gat pis. I gat sam risen from wanem tede i no gat pis long fulwol:
“I no gat man i save kam bos long laef blong hem.” (Jeremaea 10:23) God i no wokem man blong i rul antap long man bakegen, taswe traehad we man i mekem blong gat pis bambae i no save kamtru.
“Yufala i no mas trastem ol lida blong wol ya. Olgeta oli no save sevem yufala. Taem oli ded, oli stap gobak long graon nomo, nao ol plan blong olgeta oli no save kamtru.” (Ol Sam 146:3, 4) Ol lida blong ol gavman mo ol man we oli gat hae save, oli no save faenem wan rod blong stretem ol faet bitwin ol kantri.
“Long ol las dei, laef bambae i strong tumas mo bambae i had blong winim ol trabol. Bambae ol man . . . oli wael olgeta, mo oli no laekem ol gudfala fasin. Bambae oli putum ol fren blong olgeta long han blong ol enemi, oli stronghed, oli flas gogo tingting blong olgeta i go antap tumas.” (2 Timoti 3:1–4) Yumi laef long ol “las dei” blong wol ya, hemia wan taem we i had blong mekem pis, from ol rabis fasin oli stap kam antap.
“Trabol long yu graon, mo long yu solwota, from we Devel i kamdaon finis long yufala. Mo hem i kros tumas, from we hem i save se i gat smol taem nomo blong hem i stap yet.” (Revelesen 12:12) Setan we i enemi blong God, i kamdaon mo i stap long wol ya. Hem i pulum ol man blong oli agensem ol narafala, olsem we hem i stap mekem. Hem “i rulum wol ya,” taswe bambae yumi neva stap gud long pis.—Jon 12:31.
“I no gat wan king i save winim [Kingdom blong God]. Bambae hem i save flatemgud paoa blong ol narafala king, nao bambae hem i rul oltaem gogo i no save finis.” (Daniel 2:44) Kingdom blong God nomo, bambae i mekem se yumi save harem gud long pis, long fulwol.—Ol Sam 145:16.