Pis Long Wol​—?Olsem Wanem Bambae i Kamtru?

Ansa we Baebol i Givim

Pis long wol bambae i kamtru, i no from samting we man i mekem, be from samting we Kingdom blong God bambae i mekem. Kingdom ya, hem i wan gavman long heven we Jisas nao i rul long hem. Traem luk samting we Baebol i tijim long saed blong gudfala hop ya.

1. God bambae i mekem “ol faet i finis long olgeta ples long wol,” hemia i mekem promes blong hem i kamtru we i se, “long wol ya, ol man we God i glad long olgeta bambae oli gat pis.”—Ol Sam 46:9; Luk 2:14.

2. Kingdom blong God long heven bambae i rul long olgeta ples long wol. (Daniel 7:14) Bambae hem i finisim fasin ya blong no laekem narafala, we i wan fasin we i stamba blong plante raorao tede.

3. Baebol i singaot Jisas, we i King long Kingdom blong God, se: “Pikinini ya blong King, we Hem i Stamba blong Pis,” mo bambae hem i mekem se ‘ples we hem i rul long hem, oltaem bambae i stap kwaet.’—Aesea 9:6, 7.

4. Ol man we oli wantem gohed blong faet, bambae oli no save laef aninit long Kingdom blong God, from we “[God] i no laekem nating olgeta we oli laekem tumas blong mekem faet.”—Ol Sam 11:5; Ol Proveb 2:22.

5. God i tijim ol man blong hem se oli mas gat pis wetem narafala. Frut we bambae i kamaot taem man i folem ol advaes ya, hemia: “Ol man bambae oli hamarem ol naef blong faet blong olgeta, gogo oli kam aean blong digim graon. Mo ol spia blong olgeta, bambae oli wokem olgeta oli kam huknaef blong katem gru blong ol grep blong olgeta. Nao olbaot long wol, ol man bambae oli no moa save girap blong go kilim ol narafala man, neva bambae oli save mekemrere bakegen blong go mekem faet.”—Aesea 2:3, 4.

Tede, plante milian Witnes blong Jehova long fulwol, oli lanem blong gat pis wetem narafala. (Matiu 5:9) Nating se oli gat defren kalja, mo oli kamaot long bitim 230 defren kantri, be oli no faet agensem ol brata mo sista blong olgeta.