?Baebol i Save Givhan Long Man We i Gat Wan Sik?
Ansa we Baebol i Givim
Yes. God i kea long ol man blong hem we oli sik. Baebol i tokbaot ol man blong God se: “Taem oli sik, hem bambae i givhan long olgeta, i mekem olgeta oli oraet bakegen.” (Ol Sam 41:3) Sipos yu yu gat wan sik, ol trifala rod daon oli save givhan long yu blong yu no harem nogud tumas.
Yu prea blong yu gat paoa blong stanap strong. Yu save kasem “pis ya blong God we i bigwan tumas i bitim olgeta save blong yumi” blong mekem se yu no wari tumas, mo yu naf blong stanap strong.—Filipae 4:6, 7.
Yu mas gat gudfala tingting. Baebol i talem se: “Sipos yu yu stap glad oltaem, sik i no save spolem yu, be sipos tingting blong yu i stap kam nogud oltaem, bambae yu stap long rod blong ded nomo.” (Ol Proveb 17:22) Yu mas traem blong mekem we samtaem yu luk ol samting se oli fani. Hemia bambae i mekem se yu no wari tumas long ol trabol blong yu, mo i save givhan tu long helt blong yu.
Yu tingbaot ol promes blong God. Taem yu tingbaot ol samting we bambae oli kamtru long fiuja, hemia i save mekem yu harem gud, nating se yu sik. (Rom 12:12) Baebol i tokbaot wan taem we “bambae i no moa gat man olbaot long kantri ya we i save talem se hem i sik.” (Aesea 33:24) God bambae i finisim olgeta sik we ol saentis tede oli no naf blong winim. Wan eksampol, Baebol i tokbaot se ol olfala bambae oli kam yangfala bakegen, i se: “Bambae bodi blong man olsem i save kam gud bakegen, i save kam strong olsem we i yangfala nomo.”—Job 33:25.
Makemgud: Ol Witnes blong Jehova oli luksave ol samting ya we God i givim blong givhan long olgeta. Mo tu, oli go luk ol dokta taem oli sik. (Mak 2:17) Be oli no stap leftemap wan tritmen se i gud moa long narawan. Oli ting se olgeta man wanwan oli mas mekem prapa desisen blong olgeta long bisnes ya.