OL YANGFALA OLI ASKEM
?Mi mas save wanem long fasin blong sanem teks mesej?
:-) Yusum long waes fasin; teks mesej i wan nambawan rod blong save sipos ol fren blong yu oli oraet.
:-( Yusum long fasin we i no waes; i save spolem fasin fren blong yu wetem ol narafala mo gudnem blong yu.
Atikol ya bambae i halpem yu blong gat moa save long saed blong
Mo tu insaed long atikol ya i gat:
Yu sanem teks long hu
Plante yangfala oli luk fasin ya blong sanem teks mesej olsem wan impoten rod blong toktok wetem narafala. Teks mesej i halpem yu blong storian wetem eniwan mo evriwan we yu gat namba blong olgeta.—Be hemia i save hapen nomo sipos papa mo mama blong yu oli letem yu.
“Papa blong mi i no laekem nating taem mi mo smol sista blong mi, mitufala i toktok wetem ol boe. Sipos Mitufala i wantem toktok long olgeta, mitufala i mas yusum fon we i stap long sitingrum mo i mas gat wan narafala i stap.”—Lenore.
Samting we yu mas save: Sipos yu givim namba blong yu long enikaen man nomo, yu save kasem trabol.
“Sipos yu stap givim namba blong yu olbaot, bambae yu sek se yu stap kasem ol teks mesej o ol pija we yu no wantem blong luk nating.”—Scott.
“Sipos oltaem yu stap sanem teks i go long wan boe o wan gel, bae kwiktaem nomo yu stat blong laekem hem.”—Steven.
Baebol i talem se: “Man we i gat gudfala tingting i save luksave we trabol i stap kam, nao i save ronwe long hem.” (Proveb 22:3) Sipos yu traehad blong lukaotgud, bambae yu naf blong blokem plante trabol we oli save kasem yu.
Wan tru stori: “Mi mi fren gud wetem wan boe mo oltaem mitufala i stap sanem teks long mitufala. Mi ting se mitufala i gudfren nomo. Mi no ting se hemia i wan problem, kasem taem we hem i talem se hem i Iavem mi. Naoia taem mi tingtingbak, mi luksave se mi no sud teks wetem hem oltaem.”—Melinda.
Traem tingbaot: ?Yu ting se fasin fren blong Melinda mo boe ya bambae i olsem wanem afta we hem i kasem save se boe ya i lavem hem?
!Raetem stori ya bakegen! ?Wanem samting we Melinda i save mekem blong hem mo boe ya oli stap olsem ol gudfala fren nomo?
Yu raetem wanem long teks
I isi blong sanem ol teks mesej—mo i taf taem yu kasem—be i isi blong fogetem se maet samfala oli save gat rong tingting long samting we yumi raetem.
Samting we yu mas save: Wan teks mesej i save givim rong tingting long narafala.
“Wetem wan teks, yu no save wokemaot se fasin blong man blong toktok i olsem wanem o ol pija we hem i sanem, oli wantem minim wanem stret. Samting ya i save givim rong tingting long man we i kasem teks ya.”—Briana.
“Mi save sam gel we oli spolem gudnem blong olgeta mo ol man oli luk olgeta se oli stap pleplei nomo wetem filing blong narafala, hemia from ol teks we oli bin sanem long ol boe.”—Laura.
Baebol i talem se: “Gudfala man i tingting gud fastaem, nao biaen i tok.” (Proveb 15:28) ?Yumi lanem wanem folem vas ya? !Yu ridim teks mesej blong yu bakegen, bifo we yu sanem!
Stret taem blong sanem teks
Taem yu yusum gud tingting blong yu, bambae yu naf blong wokem ol prapa rul blong yu long fasin blong sanem teks mesej—ol rul blong teks, olsem we samfala oli talem.
Samting we yu mas save: Sipos yu no lukaotgud long fasin blong yu blong sanem teks mesej, bambae ol man oli luk se yu no kaen mo bambae oli no moa wantem fren wetem yu.
“I isi blong fogetem ol rul we yumi putumap long fasin blong sanem teks mesej. Samtaem mi stap teks, be long semtaem mi stap storian wetem narafala o mifala i stap kakae.”—Allison.
“I denja blong teks mo draev long semtaem. From we sipos yu no moa lukluk rod blong yu, be bambae yu aksiden.”—Anne.
Baebol i talem se: “Olgeta samting we oli stap kamtru long wol ya, oli stap kamtru stret long taem we God i putum. . . . Hem i putum taem blong man i stap kwaet, mo i putum taem blong man i tok.” (Prija 3:1, 7) !Ol tok ya i laenapgud wetem fasin blong sanem teks mesej, semak olsem we taem man i toktok!
Sam advaes blong sanem teks mesej
Yu sanem teks long hu
;-) Obei long ol rul we papa mo mama blong yu oli putumap.—Kolosi 3:20.
;-)Yu no givim namba blong yu olbaot. Wetem kaen fasin, yu talem ‘no’ long man we yu no wantem se hem i save namba blong yu. Long rod ya, yu stap wokem wan fasin we bambae i givhan long yu taem yu kam bigman.
;-)Yu no mas gat fasin ya blong sanem ol teks we oli blong pleplei nomo wetem filing blong narafala. Sipos ol filing blong lav oli stat blong gru, hemia bambae i spolem yu nomo mo bambae i mekem yu kam kros o harem nogud.
“Papa mo mama blong mi oli trastem mi from we mi yusum mobael fon long waes fasin. Mo oli trastem mi se bambae mi no putum namba blong enikaen man long kontak lis blong mi.”—Briana.
Yu raetem wanem long teks
;-)Bifo we yu stat blong teks, i gud yu askem yu wan se: ‘?I stret we mi teks blong tokbaot samting ya?’ Ating i moa gud blong kolem hem o go toktok stret long hem.
;-)No tekstem samting we yu save se bambae yu no save talem taem yu toktok stret long man. Sarah we i gat 23 yia i talem se “Sipos yu no save talemaot samting ya taem yu toktok, be i no nid tu blong sanem long wan teks mesej.”
“Sipos wan man i sanem wan rabis pija i kam long yu, i gud yu talemaot samting ya long papa mo mama blong yu. Hemia wan rod blong protektem yu mo bambae papa mo mama oli trastem yu moa.”—Sirvan.
Stret taem blong sanem teks
;-)Mekem plan se wetaem bambae yu no yusum fon. Wan gel nem blong hem Olivia i talem se: “Mi no holem fon long taem blong kakae o taem mi stadi. Mo mi ofem fon blong mi taem mi stap long haos Kingdom, blong i no distebem mi.”
;-)Tingbaot narafala. (Filipae 2:4) Yu no teks taem yu stap toktok wetem narafala.
“Mi putum sam rul blong mi wan. Eksampol, mi no mas teks taem mi stap wetem ol fren, be sipos i gat wan samting we i rili impoten, mi save teks. Mo tu, mi no givimaot namba blong mi long enikaen man we mi no savegud olgeta.”—Janelly.