?From Wanem Ol Man Oli Ded?

Ansa we Baebol i givim

I stret nomo blong askem se from wanem man i ded, speseli taem yumi lusum wan fren no famle blong yumi. Baebol i talem se: “Posen we i stap mekem man i ded, hemia sin.”—1 Korin 15:56.

?From wanem olgeta man oli mekem sin mo oli ded?

Adam mo Iv i ded from we tufala i mekem sin agens long God. (Jenesis 3:17-19) Ded i olsem frut blong samting we tufala i mekem agensem God, from we God i “stamba blong laef.”—Ol Sam 36:9; Jenesis 2:17.

Adam i pasem sin long olgeta man we oli kamaot biaen long hem. Baebol i talem se: “Wan man nomo i mekem se sin i kam long wol, mo ded i kamaot from sin. Mo ded i kasem olgeta man from we olgeta evriwan oli mekem sin.” (Rom 5:12) Olgeta man oli ded from we olgeta evriwan oli gat sin.—Rom 3:23.

Wan dei bambae man i no moa ded

God i promes se wan dei bambae hem i ‘mekem we ded i go lus olgeta.’ (Aesea 25:8) Blong tekemaot ded, God i mas tekemaot stamba blong ded, hemia sin. God bambae i mekem samting ya tru long Jisas Kraes, we hem nao i “tekemaot sin blong ol man long wol.”—Jon 1:29; 1 Jon 1:7.