?Ol Witnes Blong Jehova Oli Mekem Famle i Seraot No i Joengud?

Ol Witnes blong Jehova, oli traehad blong mekem famle blong olgeta i joengud, mo oli givhan long ol narafala tu blong oli mekem olsem. Oli respektem God we hem nao i stamba blong famle. (Jenesis 2:​21-​24; Efesas 3:​14, 15) Baebol i tokbaot ol rul blong God we oli save givhan long ol narafala, blong oli harem gud long mared blong olgeta.

Ol Witnes Blong Jehova Oli Mekem Famle i Stap Strong

Ol Witnes blong Jehova oli traehad blong folem ol advaes blong Baebol, mo samting ya i mekem se oli kam ol gudfala hasban mo waef, papa mo mama. (Ol Proveb 31:10-​31; Efesas 5:22–​6:4; 1 Timoti 5:8) Waes we i kamaot long Baebol i givhan long ol famle we oli gat defdefren bilif blong olgeta tu oli harem gud. (1 Pita 3:​1, 2) Traem luk toktok blong olgeta we hasban no waef blong olgeta nomo, i wan Witnes blong Jehova:

• “Long ol fas sikis yia we mitufala i mared, oltaem mitufala i kros mo rao. Biaen Ivete i kam wan Witnes blong Jehova, mo hem i kaen mo i soemaot moa se hem i lavem mi. Ol jenis we hem i mekem, i givhan blong mekem mared blong mitufala i stap strong oltaem.”​—Clauir, blong Brasil.

• “Mi mi no glad taem man blong mi, Chansa, i stat blong stadi Baebol wetem ol Witnes blong Jehova, from we mi ting se bae oli mekem famle blong mi i seraot. Be afta, mi luksave se Baebol i givhan long mared blong mitufala.”​—Agness, blong Sambia.

Taem mifala i storian wetem ol man long haos blong olgeta, mifala i yusum Baebol blong halpem olgeta blong oli

• Jusum man no woman we oli wantem maredem

• Stanap strong long ol faswan yia blong mared

• Joen gud wetem papa no mama blong hasban no waef blong olgeta

• Yusum gud mane

• No moa raorao

• Lanem blong fogivim narafala

• Tijim pikinini blong olgeta

?I save gat problem long mared sipos hasban mo waef i gat defdefren bilif?

Blong talem stret, samtaem i gat problem. Eksampol, long 1998, Sofres we i wan kampani we i mekem risej long ol famle i talem se, long ol 20 man no woman we oli mared wetem wan Witnes, i gat wan we i kasem problem long mared blong hem.

Jisas i talem se olgeta we oli biaen long hem, bambae oli kasem fasin agensem long famle. (Matiu 10:32-​36) Will Durant, wan man blong histri i tokbaot samting we i hapen long taem we Rom i rul. Hem i talem se: “Ol Kristin nao oli mekem ol famle oli seraot,”a mo tede sam long ol Witnes blong Jehova oli fesem sem problem. ?Hemia i min se ol Witnes blong Jehova nao oli mekem ol famle oli seraot?

Kot Blong Yurop We i Lukaot Long Raet Blong Ol Man, i jajem kes blong ol man we oli talem se ol Witnes blong Jehova oli mekem famle i seraot. Kot i talem se: “Ol famle we oli no Witnes, oli kros taem oli luk hemia we i Witnes, i folem bilif blong hem. Mo tu, Kot i talem se i no ol Witnes blong Jehova nomo we oli kasem problem ya, ol man blong narafala jos tu oli kasem.”b Sipos narafala i mekem nogud long ol Witnes, olgeta oli folem advaes blong Baebol, we i se: “Sipos wan man i mekem i nogud long yufala, bambae yufala i no givimbak fasin ya long hem. . . . Oltaem, long saed blong yufala, yufala i mas traehad blong faenem rod blong yufala i gat pis wetem olgeta man.”​—Rom 12:17, 18.

?From wanem wan Witnes blong Jehova i mas mared long wan witnes?

Ol Witnes blong Jehova oli folem tok blong Baebol we i se, mared long “man blong Masta,” hemia i min se oli mas mared long narafala we i gat sem bilif olsem olgeta. (1 Korin 7:​39) Advaes ya i kamaot long Baebol mo i save givhan long ol man. Eksampol, long wan atikol we i kamaot long 2010 long magasin ya Journal of Marriage and Family i se: “Taem hasban mo waef i gat sem bilif,” fasin blong tufala blong fren gud tugeta i kam strong moa.c

Ol Witnes blong Jehova oli no pulum ol narafala blong oli lego waef no hasban blong olgeta we i no wan Witnes. Baebol i talem se: “Sipos wan long yufala i gat woman blong hem we i no bilif long Kraes, be woman ya i agri blong stap gud wetem hem, man ya i no save mekem divos long woman ya. . . . Mo sipos wan woman long yufala i gat man blong hem we i no bilif long Kraes, be man ya i agri blong stap gud wetem hem, woman ya i no save lego man ya.” (1 Korin 7:​12, 13) Ol Witnes blong Jehova oli folem advaes ya.