?Ol Witnes Blong Jehova Oli Fosem Ol Man Blong Oli Jenisim Jos Blong Olgeta?
Nogat. Mifala i raetem long magasin blong mifala, Wajtaoa, se: “I no stret nating blong fosem man blong jenisim skul blong hem.”a Mifala i no fosem ol man from ol risen ya daon:
Jisas i neva fosem ol man blong oli folem ol tijing blong hem. Hem i save se smol man nomo bambae oli lesin long tok blong hem. (Matiu 7:13, 14) Taem sam long ol disaepol blong hem oli harem nogud from tok we hem i talem nao oli lego hem, hem i letem olgeta nomo oli go, be i no fosem olgeta blong stap.—Jon 6:60-62, 66-68.
Jisas i tijim ol man blong hem se oli no mas fosem ol man blong oli jenisim bilif blong olgeta. Ol disaepol blong hem oli lukaot ol man we oli wantem lesin long gud nius blong Kingdom, be oli no traem fosem ol man blong oli lesin.—Matiu 10:7, 11-14.
Sipos wan man i jenisim jos blong hem from we ol narafala oli fosem hem, God i no glad nating long wosip blong hem, from we God i glad nomo long man we i wosipim hem long ful hat blong hem.—Dutronome 6:4, 5; Matiu 22:37, 38.
?Wok we mifala i mekem i blong fosem ol man blong oli jenisim jos blong olgeta?
I tru se mifala i talemaot tok blong Baebol long “olgeta ples long wol.” Blong mekem olsem, Baebol i talem se mifala i mas talemaot tok ya long “fes blong ol man mo long ol haos” wanwan. (Ol Wok 1:8; 10:42; 20:20) Olsem ol fas Kristin, samtaem ol man oli talem se mifala i brekem loa from we mifala i stap fosem ol man blong oli jenisim jos blong olgeta. (Ol Wok 18:12, 13) Be tok ya i no tru. Mifala i no stap fosem ol man blong oli gat sem bilif olsem mifala. Be mifala i bilif strong se ol man oli mas gat stret save. Olsem nao, sipos oli mekem prapa desisen blong olgeta, be desisen ya i stanap long save we oli kasem.
Mifala i no fosem ol man blong oli jenisim jos blong olgeta, mo mifala i no mekem politik mo yusum jos blong mifala blong haedem, mo mifala i no mekem sam pleplei mo givim kakae mo klos long ol man blong pulum olgeta oli kam memba blong mifala. Hemia i defren olgeta long sam skul we oli talem se oli Kristin be oli no ona long Kraes taem oli mekem ol samting olsem.b
?Wan man i gat raet blong jenisim jos blong hem?
Profet Ebraham i lego jos blong famle blong hem
Yes, Baebol i soemaot se ol man oli gat raet blong jenisim jos blong olgeta. Hem i tokbaot plante man we oli jusum blong no folem jos blong famle blong olgeta, mo oli jus blong wosipim tru God. Sam long olgeta ya, i gat Ebraham, Rut, sam man Atens, mo aposol Pol. (Josua 24:2; Rut 1:14-16; Ol Wok 17:22, 30-34; Galesia 1:14, 23) Mo Baebol i tokbaot tu se man i gat raet blong mekem desisen we i no waes, nao i lego wosip we God i glad long hem.—1 Jon 2:19.
Universal Declaration of Human Rights (Ol Tok Blong Talemaot Raet Blong Ol Man), we Yunaeted Neson i kolem se ol “stamba loa we i stanap long raet blong ol man long olgeta ples long wol,” hem i sapotem tingting ya se man i gat raet blong jenisim jos blong hem. Ol tok ya oli talem se evri man oli “fri blong jenisim jos no bilif blong olgeta” mo blong “lukaotem, kasem, mo givimaot ol save mo ol tingting,” wetem ol tingting blong ol jos tu.c I tru, ol raet ya oli joen wetem fasin ya blong respektem raet we ol narafala oli gat blong holemtaet bilif blong olgeta, mo blong sakemaot wan tingting sipos oli no agri wetem.
?Fasin ya blong jenisim jos i daonem famle mo kastom?
No, i no minim olsem. Baebol i pulum yumi blong respektem evriman, nomata se oli stap long wanem jos. (1 Pita 2:17) Antap moa, ol Witnes blong Jehova oli obei long tok ya blong Baebol we i talem se oli mas ona long ol papa mo mama blong olgeta, nating se bilif blong olgeta i defren.—Efesas 6:2, 3.
Be nating se i olsem, i no evriman we oli agri wetem tok ya blong Baebol. Wan woman we i gruap long Sambia i talem se: “Long komuniti blong mi, sipos wan man i jenisim jos blong hem, . . . hemia i olsem we hem i no moa laekem famle blong hem mo komuniti blong hem, mo i tanem baksaed long olgeta.” Taem woman ya i yangfala, hem i fesem problem ya taem hem i stadi Baebol wetem ol Witnes blong Jehova, mo smoltaem biaen, hem i mekem desisen blong jenisim jos blong hem. Hem i talem se: “Papa mo mama blong mi, tufala i talem plante taem long mi se tufala i no glad long samting we mi mekem, mo se mi spolem tufala. Mi mi wantem tumas se tufala i glad long mi, taswe hemia wan samting we i had tumas. . . . Mi mi wantem holemstrong long Jehova, i no ol kastom blong jos. Be hemia i no min se mi lego famle blong mi.”d
a Yu luk Wajtaoa blong 1 Jenuware 2002, pej 12, haf 15.
b Eksampol, samwe long yia 785 afta Kraes, man ya Charlemagne i givim wan loa se ol man long Saxony we oli no wantem baptaes blong kam Kristin, oli mas kilim olgeta i ded blong panisim olgeta. Mo i gat tu haeman, we wan i joen long Katolik Jos mo narawan i blong Luteran jos, tufala i stap faet agensem tufala. Ale gavman blong Rom i mekem tufala i saenem wan pepa long yia 1555, we nem blong hem ‘Pis blong Augsbeg.’ Pepa ya i talem se long evri ples we haeman ya blong Katolik i rul long hem, evriman oli mas joen long Katolik Jos. Mo long evri ples we haeman ya blong Luteran Jos i rul long hem, evriman i mas joen long jos ya. Olgeta we oli no wantem, oli mas go laef long defren kantri.
c Plante kantri oli stanemap ol semfala raet ya we yumi save faenem long African Charter on Human and Peoples’ Rights, mo long American Declaration of the Rights and Duties of Man, mo long 2004 Arab Charter on Human Rights, mo long ASEAN (Association of Southeast Asian Nations) Human Rights Declaration, mo long European Convention on Human Rights, mo long International Covenant on Civil and Political Rights. Ol neson oli talem se ol man blong olgeta oli gat ol raet ya, be nating se i olsem, olgeta oli gat defdefren tingting long saed ya.
d Jehova i nem blong God long Baebol.