OL YANGFALA OLI ASKEM
?Mi Mi Wantem Mekem Evri Samting Long Fasin We i Stret Gud Olgeta?
?Yu ting se yu mas kasem A+ long evri eksam?
?Yu no wantem traem ol niufala samting from yu fraet se yu no naf blong mekem?
Taem narafala i stretem yu, ?yu ting se hem i spolem gudnem blong yu?
Sipos yes, maet yu wantem mekem evri samting long fasin we i stret gud olgeta. ?Be i rong blong gat fasin ya?
?I rong blong wantem mekem evri samting long fasin we i stret gud olgeta?
I no rong blong traem mekem bes blong yu. Be buk ya Perfectionism—What’s Bad About Being Too Good? i talem se: “Traem mekem bes blong yu i defren olgeta long traem kasem wan mak we yu no naf blong kasem. Taem yu traehad blong mekem evri samting long fasin we i stret gud olgeta, hemia wan hevi samting blong karem, from we i no gat man i stret gud olgeta.”
Baebol tu i talem olsem, i se: “I no gat wan stret man long wol we i stap mekem samting we i gud oltaem.” (Prija 7:20) From we yu no stret gud olgeta, samtaem bambae yu mestem.
?Olsem wanem? ?I had blong yu yu agri long samting ya? Sipos yes, tingbaot samting we i save hapen long yu sipos yu traem mekem evri samting long fasin we i stret gud olgeta. I gat fo samting:
Tingting we yu gat long yu wan. Olgeta we oli wantem mekem evri samting long fasin we i stret gud olgeta, oli putum ol mak we oli hae tumas blong kasem. Hemia i save mekem olgeta oli harem nogud. Alicia i talem se: ‘Samting we i tru se, yumi no save gud long evri samting. Mo sipos yu stap daonem yu wan from we yu no mekem samting long fasin we i stret gud olgeta, sloslo bambae yu ting nating long yu wan. Hemia i save mekem tingting i foldaon.”
Tingting we yu gat long gudfala advaes. Ol man we oli traem mekem evri samting long fasin we i stret gud olgeta, oli ting se advaes we i stretem olgeta i spolem gudnem blong olgeta. Yangfala Jeremy i talem se: “Taem narafala i stretem mi, mi harem nogud tumas. Taem yu wantem mekem evri samting long fasin we i stret gud olgeta, yu no luksave se yu no naf blong mekem sam samting mo yu nidim help blong narafala samtaem.”
Tingting we yu gat long ol narafala. Plante taem, man we i wantem mekem evri samting long fasin we i stret gud olgeta, i faenem poen long ol narafala. I isi blong luksave from wanem i olsem. Anna we i gat 18 yia, i talem se: “Taem yu traem mekem evri samting long fasin we i stret gud olgeta, yu ting se ol narafala tu oli mas sem mak. Taem oli no olsem, yu harem nogud long olgeta.”
Tingting we ol narafala oli gat long yu. Sipos yu ting se ol narafala oli mas kasem ol hae mak we oli no naf blong kasem, yu no mas sapraes sipos oli no wantem fren wetem yu. Beth i talem se: “Taem yu traehad blong kasem mak blong man we i wantem stret gud oltaem, yu lusum paoa blong yu. !Yu no moa wantem joen oltaem wetem man olsem!”
?Wanem fasin i moa gud?
Baebol i talem se: “Yufala i mas soemaot long olgeta man se yufala i no stap mekem i strong tumas long ol narafala.” (Filipae 4:5) Man we i no mekem i strong tumas long narafala i gat stret tingting long samting we hem i naf blong mekem mo samting we narafala i naf blong mekem.
“I gat plante samting finis we oli mekem laef i had. ?From wanem yu wantem ademap sam moa wari, taem yu traem blong mekem evri samting long fasin we i stret gud olgeta? !Hemia i tumas ya!”—Nyla.
Baebol i talem se: “!Wokbaot wetem God we tingting blong yu i stap daon!” (Maeka 6:8) Ol man we tingting blong olgeta i stap daon, oli luksave ol samting we oli no naf blong mekem. Oli no traem blong mekem tumas samting wantaem, mo oli no tekem tumas taem blong mekem wan wok we oli save mekem kwik.
“Sipos mi wantem mekem gud ol wok blong mi, mi no mas traem blong mekem tumas wok, be mi mekem wanem we mi naf blong mekem nomo.”—Hailey.
Baebol i talem se: “Wanem samting we han blong yu i stap mekem, yu mas mekem long ful paoa blong yu.” (Prija 9:10) Taswe, blong winim tingting ya blong wantem mekem evri samting long fasin we i stret gud olgeta, yu no mas les, be yu mas wok had, mo long semtaem, yu mas gat tingting daon mo no mekem i strong tumas long narafala.
“Mi traem mekem gud ol wok blong mi, be mi luksave se bambae mi neva stret gud olgeta. Mi glad blong save nomo se mi mekem evri samting we mi naf blong mekem.—Joshua.