OL YANGFALA OLI ASKEM
?Olsem Wanem Sipos Fren Blong Mi i Spolem Mi?
Samting we yu mas save
I no gat wan fren we i stret gud. Fren blong yu i no stret gud, taswe, nating se hem i besfren blong yu, maet hem i talem o mekem samting we i spolem yu. Be yu tu yu no stret gud. ?Yu save tingbaot wan taem we yu bin spolem narafala?—Jemes 3:2.
Intenet i save mekem yu yu harem nogud. Wan yangfala we nem blong hem Deved, i talem se: “Maet yu luk long Intenet sam pija blong fren blong yu we i joen wetem sam narafala long wan kakae, nao yu tingbaot se, ‘?From wanem hem i no invaetem mi?’ Nao yu stat blong ting se hem i wantem spolem yu mo yu harem nogud.”
Yu save winim problem ya.
Samting we yu save mekem
Jekem yu wan. Baebol i talem se: “I nogud yu holem kros blong yu i stap longtaem, from we hemia i fasin blong man we i no gat hed.”—Prija 7:9.
“Maet yu luksave biaen se samting we yu kros from, i no impoten.”—Alisa.
Tingbaot: ?Yu yu kwik tumas blong harem nogud? ?Yu save traehad moa blong no kam kros long narafala from mastik blong hem?—Prija 7:21, 22.
Tingbaot from wanem i gud blong fogivim fren blong yu. Baebol i talem se: “Sipos wan man i mekem i rong long yu, nao yu no tingbaot, hemia i wan gudfala fasin.”—Ol Proveb 19:11.
“Nating se yu gat wan gudfala risen blong kros, i gud yu fogivim narafala. Hemia i min se yu no tokbaot problem ya oltaem mo mekem fren blong yu i talem sore bakegen mo bakegen. Taem yu fogivim hem, yu no moa tingbaot problem ya.”—Malori.
Tingbaot: ?Mastik ya i rili impoten? ?Yu save fogivim hem mo holem pis?—Kolosi 3:13.
Taem yu traem stretem evri smosmol problem wetem wan fren, hemia i olsem we yutufala i stap long wan rum we i wom, be yu stap openem doa oltaem blong letem kolkol i kam insaed
Tingbaot fren blong yu. Baebol i talem se: “Yufala i no mas tingbaot yufala nomo, be yufala i mas tingbaot ol narafala man tu.”—Filipae 2:4.
“Taem tu fren i lavem mo respektem tufala, hemia wan bigfala risen blong stretem ol problem kwiktaem nomo. Yu bin spenem plante taem mo paoa mo yu bin wok had blong fren gud wetem hem, taswe yu no wantem lusum hem.”—Nikol.
Tingbaot: ?Yu save faenem wan samting long ol toktok blong fren blong yu we i stret blong yu wok long hem?—Filipae 2:3.
Stamba poen: Sipos yu save olsem wanem blong winim ol nogud filing olsem, hemia bambae i givhan long yu long fiuja. Taswe yu mas lanem blong winim naoia.