OL YANFALA OLI ASKEM
?Olsem Wanem Blong No Kasem Stres?
?Yu ting se yu save kasem stres? !Sipos yes, atikol ya i save halpem yu!
?From wanem i hapen?
Presa. Wan yang gel we nem blong hem Julie i talem se: “Long evri samting we mifala i mekem long laef blong mifala, oli fosem mifala blong mas kam gud moa, gohed blong kam beswan, gohed blong putum ol haefala mak o kasem ol nambawan risal. !I had, taem oltaem narafala i putum presa long yu olsem!”
Teknoloji. Naoia wetem ol smatfon, ol tablet mo ol samting olsem, yumi “on” nomo mo narafala i save kasem yumi eni taem nomo—hemia wan samting we i save mekem yumi wari mo biaen yumi save kasem stres from.
No slip gud. Wan yang gel we nem blong hem Miranda i talem se: “Plante yangfala oli wekap eli mo tu oli wekap kasem long let naet. Oli no save olsem wanem oli save winim kaen laef ya we oli stap ronem skul, wok, spel mo pleplei.” Hemia i save mekem se oli kasem stres.
?From wanem i impoten blong tingbaot?
Baebol i talem se i gud blong wok had. (Ol Proveb 6:6-8; Rom 12:11) Be hem i no talem se yu mas wok had gogo kasem we yu stap safa from—hemia i save minim tu, long helt blong yu.
“I gat wan taem we mi makem se mi no bin kakae wan ful dei from we tingting blong mi i stap nomo long ol wok we mi akseptem blong mekem. Biaen mi lanem se i nogud blong akseptem evri wok we oli givim long mi—speseli sipos mi save kam sik from.”—Ashley.
From samting ya, Baebol i talem se: “Dog we i laef, hem i gud moa i winim laeon we i ded finis.” (Prija 9:4) Taem yu wok had tumas i olsem we yu stap tingting se yu gat paoa olsem laeon—maet ating blong smol taem. Be hemia i save mekem bigfala trabol long helt blong yu.
?Yu save mekem wanem blong winim?
Lanem blong talem no. Baebol i talem se: “Man we i mekem tingting blong hem i stap daon, hem i wan waes man.” (Ol Proveb 11:2) Man we i gat tingting daon, i save se hem i naf blong mekem wanem mo i no mekem ol samting we hem i save se hem i no naf blong mekem.
“Wan man we i save kasem stres hemia man we i no save talem no. Hem i traem blong mekem evri wok we oli givim long hem. Hemia i no waes nating. From we sloslo hem i save kasem stres.”—Jordan.
Spel gud. Baebol i talem se: “Sipos tingting blong yumi i stap gud, yumi no wari, hemia i winim fasin ya we yumi stap hadwok tumas oltaem, be yumi no winim wan samting nating. Fasin ya i olsem we yumi stap resis olbaot nomo.” (Prija 4:6) Ol man oli singaot slip se “kakae blong bren,” be bighaf blong ol yangfala oli no stap slip blong eit kasem ten aoa evri naet olsem we oli nidim.
“Taem program blong mi i fasfas tumas, hemia i mekem se mi no gat taem blong slip. Be samtaem, mi nidim smol ekstra taem blong slip nao biaen mi kasembak paoa blong wokgud mo blong mi glad long nekis dei.”—Brooklyn.
Mekem plan. Baebol i talem se: “Man we i mekem gudfala plan mo i stap wok strong long hem, hem i save kasem plante samting.” (Ol Proveb 21:5) Taem yu lanem blong skelemgud taem mo ol wok blong yu, hemia bambae i givhan long ful laef blong yu.
“Wan gudfala plan i save mekem se yu no stres tumas. Taem yu gat wan gudfala program bambae i mekem i isi blong save wanem nao yu mas mekem blong yu no kasem stres.”—Vanessa.