Ol wing blong bataflae ya Cabbage White Butterfly

Wan bataflae i nidim blong laet blong san i kasem ol masel we hem i stap yusum blong flae, nao biaen i save flae. Be taem i gat plante klaod, bataflae ya we nem blong hem Cabbage White Butterfly, i save flae kwik moa i bitim ol narafala bataflae.?From wanem hem i naf blong mekem olsem?

Tingbaot: I gat plante defdefren bataflae we bifo oli flae, oli mas sarem ol wing blong olgeta o oli mas openem i stret folem laet blong san. Be bataflae ya, Cabbage White Butterfly, hem i openem ol wing blong hem long fom blong leta “V”. Ol man blong stadi oli faenemaot se, blong laet blong san i kasemgud ae blong hem, hem i mas openem ol wing blong hem long wan ankel blong 17 digri. Taem hem i stap long posisen ya, bae laet blong san i kasemgud ol masel blong tufala wing blong hem we i joen long ol nara haf blong bodi, nao hem i save flae.

Sam man blong stadi long Yunivesiti blong Exeter, Iong Inglan, oli traem wokem ol sola panel we i folem fom blong wing blong bataflae ya. Mo biaen, oli faenemaot se oli save leftemap prodaksen blong laet long klosap 50%.

Mo tu, ol man blong stadi oli faenemaot se i isi blong laet blong san i gotru long ol wing blong hem. Nao, taem oli wokem ol niufala sola panel long fom blong leta”V”, hemia i mekem se ol sola panel ya oli no hevi tumas mo oli wokgud moa. Wan long ol man blong stadi, Profesa Richard ffrench-Constant, i talem se bataflae ya hem “i wan nambawan samting we i kasemgud laet blong san”.

?Wanem tingting blong yu? Bataflae ya, Cabbage White Butterfly i kamaot olsem nomo, no i gat wan Man we i Wokem?