Wok We Ol Homon Oli Mekem Insaed Long Bodi

Blong bodi blong yumi i wok gud, blad blong yumi i mas gat wan stret amaon blong ol minerol, olsem kalsium. Be ol samting we yumi kakae o dring evri dei, oli save mekem amaon blong ol minerol insaed long bodi blong yumi i no sem mak. Taswe, ?olsem wanem bodi blong yumi i mekem se evri dei yumi gat wan stret amaon blong ol minerol?

Sipos bodi blong yumi i helti, bambae hem i naf blong kipim stret amaon blong ol minerol. Bodi i mekem olsem taem i wokem, i storem, mo rilisim ol homon i go long blad. Ol homon oli ol smosmol samting long blad we oli givhan long bodi blong i wok gud. Wan smol amaon blong homon nomo i save gat paoa long bodi blong man. Buk ya Encyclopedia Britannica i talem se fasin ya we bodi i rilisim ol homon, “i no wan samting we i jes hapen olsem nomo, be hem i wok folem wan plan.”

Eksampol, parataeroid glan (parathyroid glands) we i stap insaed long trot blong yumi, i naf blong faenemaot amaon blong kalsium we i stap long blad. I gat fo parataeroid glan mo saes blong olgeta i olsem wan sid blong raes.

Taem ol glan ya oli harem save se bodi i no gat i naf kalsium, wantaem nomo bambae oli rilisim wan homon blong i givim signal i go long ol bun we oli storem kalsium, blong oli rilisim kalsium i go long blad. Homon ya bambae i mekem tu se ol kidni oli no moa klinimaot kalsium long blad, mo i mekem se smol gat long bel blong yumi i holemtaet ol kalsium we bodi blong yumi i kasem long samting we yumi kakae.

Be sipos i gat tumas kalsium long blad, taeroid (thyroid) we i wan narafala glan, bambae i rilisim wan defren homon. Homon ya bambae i givim signal long ol bun blong oli storem ol kalsium ya, mo bambae i mekem se kidni i klinimaot plante moa kalsium i bitim ol narafala taem.

Yumi tokbaot tu kaen homon nomo, be i gat bitim wan handred homon we oli mekem ol defdefren kaen wok insaed long bodi blong yumi.

?Wanem tingting blong yu? ?Wok we ol homon oli mekem insaed long bodi blong yumi i kamaot olsem nomo, o i gat wan Man we i wokem?