Aesea 41:10—“Yu No Fraet, Mi Mi Stap Wetem Yu”

“Yu no fraet, mi mi stap wetem yu. Yu no wari, mi mi God blong yu. !Mi bambae mi mekem yu yu strong! !Bambae mi givhan long yu! !Bambae mi holemtaet yu, mo mi yusum raet han blong mi blong lidim yu long stret fasin!”—Aesea 41:10, New World Translation.

“Yu no fraet, mi mi stap wetem yu. Yu no harem nogud, mi mi God blong yu. Bambae mi mekem yu yu strong, yes, bambae mi halpem yu. Bambae mi yusum raet han blong mi blong givhan long yu long stret fasin.”—Aesea 41:10, New King James Version.

Mining Blong Aesea 41:10

Jehovaa God i talem long ol man we oli wosipim hem se nomata wanem problem oli fesem, hem bambae i givhan long olgeta.

“Mi mi stap wetem yu.” Jehova i talem long ol man blong hem se oli no nid blong fraet, from we oli no stap olgeta nomo. Hem i luk evri samting we i hapen long olgeta mo i harem ol prea blong olgeta, taswe i olsem we hem i stap wetem olgeta.—Ol Sam 34:15; 1 Pita 3:12.

“Mi mi God blong yu.” Jehova i kwaetem tingting blong ol man blong hem taem hem i talem se nomata wanem i hapen long olgeta, hem i God blong olgeta, mo hem i glad long wosip blong olgeta. Oli save gat strong tingting se i no gat wan samting we i save blokem God, blong i no tekem aksen blong givhan long olgeta.—Ol Sam 118:6; Rom 8:32; Hibrus 13:6.

“!Mi bambae mi mekem yu yu strong! !Bambae mi givhan long yu! !Bambae mi holemtaet yu, mo mi yusum raet han blong mi blong lidim yu long stret fasin.” Jehova i yusum tri defren fasin blong talem se hem bambae i sapotem olgeta. Hem i soemaot samting we hem i save mekem taem wan man blong hem i foldaon. Hem i save pusum raet han blong hem, mo givhan long hem blong i stanap bakegen.—Aesea 41:13.

Wan impoten rod we God i yusum blong givhan long ol man blong hem mo mekem olgeta oli strong, hemia Tok blong hem Baebol. (Josua 1:8; Hibrus 4:12) Baebol i givim gudfala advaes long olgeta we oli kasem ol trabol olsem sot long mane, sik, wan fren o famle i ded. (Ol Proveb 2:6, 7) God i save yusum tabu spirit o paoa blong hem tu, blong mekem ol man blong hem oli tingting klia mo oli no harem nogud bitim mak taem oli kasem ol trabol ya.—Aesea 40:29; Luk 11:13.

Ol Vas Raonabaot Long Aesea 41:10

Ol tok ya i leftemap tingting blong ol man Jiu we oli holemstrong long Jehova, we biaen ol ami blong Babilon oli tekem olgeta oli go long Babilon. Jehova i talem finis se klosap long taem we oli aot long Babilon, bambae oli harem ol stori se i gat ol enemi oli stap kam blong spolem ol kantri raonabaot mo traem spolem Babilon tu. (Aesea 41:2-4; 44:1-4) Ol man Babilon mo ol narafala kantri bambae oli fraet long nius ya, be ol Jiu oli no nid blong fraet, from we Jehova bambae i protektem olgeta. Tri taem hem i talem long olgeta se oli no mas fraet.—Aesea 41:5, 6, 10, 13, 14.

Nating se ol tok blong Aesea 41:10 i go fastaem long ol man Jiu we oli stap long Babilon, be Jehova God i meksua se ol tok ya i stap long Baebol, blong i save leftemap tingting blong olgeta man blong hem. (Aesea 40:8; Rom 15:4) Hem i stap givhan long ol man blong hem tede, olsem we i givhan long ol man blong hem bifo.