Filipae 4:6, 7—“Yufala i No Mas Wari Tumas From Eni Samting”

“Yufala i no mas wari tumas from eni samting, be yufala i mas askem olgeta samting we yufala i wantem long God. Yufala i mas prea long hem, yufala i mas krae i go long hem, mo yufala i mas talem tangkiu long hem, nao tru long Kraes Jisas, pis ya blong God we i bigwan tumas i bitim olgeta save blong yumi, bambae i lukaot gud long hat mo tingting blong yufala.”—Filipae 4:6, 7, Baebol Long Niu Wol Translesen.

“Yufala i no mas wari long eni samting, be long evri situesen yufala i mas prea mo askem long God, mo talem tangkiu long hem. Nao pis blong God we i bitim save blong yumi, bambae i lukaot gud long maen mo hat blong yumi, tru long Jisas Kraes.”—Filipae 4:6, 7, New International Version.

Mining blong Filipae 4:6, 7

Taem ol man blong God oli wari tumas, oli save prea long hem blong oli harem gud bakegen. Hem i promes blong givim pis long olgeta we bambae i givhan long olgeta blong winim wari, mo blong lukaot gud long tingting mo filing blong olgeta. Vas 6 i tokbaot ol defren kaen prea we oli save givhan long olgeta blong kasem pis ya.

Krae i go long God. Hemia ol prea we yumi plis long God o askem strong long hem blong i givhan long yumi. Maet yumi prea olsem taem yumi wari bitim mak o yumi stap long denja, olsem Jisas i mekem. (Hibru 5:7) Plante taem yumi talem bakegen mo bakegen ol kaen prea olsem.

Askem olgeta samting. Hemia prea we yumi askem long God blong i givim wan samting we yumi wantem. Ol man blong hem oli save askem “eni samting” o “long evri situesen.” Be ol prea ya oli mas laenap wetem wil blong God we i stap long Baebol.—1 Jon 5:14.

Ol prea blong talem tangkiu long God oli soemaot se yumi glad long samting we hem i mekem mo we bambae i mekem blong yumi. Taem yumi putum tingting blong yumi long ol risen blong talem tangkiu long God, hemia i save givhan long yumi blong stap glad.—1 Tesalonaeka 5:16-18.

God i ansarem ol prea ya taem hem i givim pis long ol man blong hem. ‘Pis blong God’ i min se yumi gat kwaet tingting from we yumi frengud wetem hem. (Rom 15:13; Filipae 4:9) Pis ya “i bigwan tumas i bitim olgeta save blong yumi” from we i kamaot long God, mo i save givhan long yumi i bitim samting we yumi tingbaot.

Vas ya i talem se pis blong God i save lukaot gud long hat blong yumi. Grik tok ya we i minim “lukaot gud,” i wan tok we oli yusum long ami blong tokbaot wok we ol soldia oli mekem blong gad long wan taon. Long sem fasin, pis blong God i protektem filing mo tingting blong yumi, mo i givhan long yumi blong yumi no letem ol problem oli winim yumi.

Pis ya blong God i protektem yumi “tru long Kraes Jisas,” hemia from we Jisas nao i mekem se yumi save fren gud wetem God. Jisas i givim laef blong hem olsem wan ransom sakrefaes blong pemaot ol sin blong yumi. Sipos yumi bilif long hem, yumi save harem gud long ol blesing we oli kam long God. (Hibru 11:6) Mo tu, taem yumi prea, yumi mas pastru long Jisas. Hem i talem se: “I no gat man i save kam long Papa blong mi, sipos hem i no pas long mi.”—Jon 14:6; 16:23.

Ol vas raonabaot long Filipae 4:6, 7

Buk blong Filipae i wan leta we aposol Pol i raetem long ol Kristin long taon ya Filipae.a Long japta 4, Pol i pulum olgeta long kongregesen blong oli stap glad, mo hem i talem tangkiu long olgeta from we oli gat gladhat blong givim presen, mo samting ya i mekem hem i glad. (Filipae 4:4, 10, 18) Hem i soemaot olsem wanem prea i lidim yumi blong kasem pis blong God, mo i tokbaot ol tingting mo aksen we oli save givhan long yumi blong kasem help long “God ya blong pis.”—Filipae 4:8, 9.