Ol Sam 46:10—“Stap Kwaet, Mo Kasem Save Se Mi Mi God”

“I naf, mo yufala i mas save se mi mi God. Ol nesen bambae oli leftemap mi. Ol man long wol bambae oli leftemap mi.”—Ol Sam 46:10, Baebol Long Niu Wol Translesen.

“Stap kwaet, mo kasem save se mi mi God. Bambae mi kam hae moa long medel blong ol hiten man, mo long fulwol bambae mi kam hae moa.”—Ol Sam 46:10, King James Version.

Mining blong Ol Sam 46:10

God i stap talem long evriwan se oli mas wosipim hem, mo oli mas luksave se hem i gat raet blong rulum wol. Evriwan we oli wantem gohed blong laef olwe oli mas luksave se hem i gat olgeta paoa mo raet blong rul.—Revelesen 4:11.

“I naf, mo yufala i mas save se mi mi God.” Long sam Baebol, oli transletem fas haf blong vas ya se “stap kwaet.” From samting ya, plante man oli ting se hemia wan oda se taem oli stap insaed long jos oli mas soem ona mo stap kwaet. Be long olfala Hibru lanwis, tok ya “i naf, mo yufala i mas save se mi mi God,” hemia ol tok we Jehovaa God i talem long ol man long olgeta nesen. Hem i stap talem long olgeta se oli stap agensem hem be naoia i naf, oli mas luksave se i stret blong wosipim hem nomo.

Long Ol Sam 2, yumi faenem sam toktok we i klosap sem mak. Long ples ya, God i promes blong tekem aksen agensem olgeta we oli agensem hem. Olgeta we oli luksave se God i gat raet blong rul, oli trastem hem blong lidim olgeta mo blong givim waes mo paoa long olgeta. “Olgeta we oli stap go long Hem blong haed,” oli glad mo oli no fraet, speseli taem oli kasem hadtaem mo trabol.—Ol Sam 2:9-12.

“Ol nesen bambae oli leftemap mi. Ol man long wol bambae oli leftemap mi.” Long taem bifo, ol man oli leftemap Jehova God taem hem i yusum paoa blong hem blong protektem ol man blong hem. (Eksodas 15:1-3) Long fiuja, olgeta man long wol bambae oli leftemap hem long fasin we i bigwan moa, taem oli obei long rul blong hem mo wosipim hem.—Ol Sam 86:9, 10; Aesea 2:11.

Ol vas raonabaot long Ol Sam 46:10

Wan buk i talem se Ol Sam 46 i “wan him blong presem bigfala paoa blong God, we i protektem ol man blong hem.” Taem ol man blong Jehova oli singim Ol Sam 46, oli soemaot se oli trastem Hem se hem i naf blong protektem mo halpem olgeta. (Ol Sam 46:1, 2) Ol tok ya i mekem olgeta oli tingbaot se oltaem Jehova i stap wetem olgeta.—Ol Sam 46:7, 11.

Sam ya i askem long olgeta blong oli tingting gud long ol nambawan wok we Jehova i mekem long paoa blong hem. Olsem nao, bambae oli trastem Jehova moa blong protektem olgeta. (Ol Sam 46:8) Mo tu, Sam ya i tokbaot plan blong Jehova blong finisim ol wo. (Ol Sam 46:9) Long wan fasin, Jehova i finisim ol wo long taem we oli raetem Baebol, from we hem i protektem ol man blong hem long ol enemi nesen. Be Baebol i promes se i no longtaem, Sam ya bambae i kamtru long fasin we i bigwan moa, taem Hem i finisim ol wo long fulwol.—Aesea 2:4.

?Olsem wanem? ?Tede Jehova i stap halpem ol man blong hem yet? Yes. Aposol Pol i pulum ol Kristin blong oli trastem hem blong halpem olgeta. (Hibru 13:6) Ol tingting long Ol Sam 46 oli mekem se yumi trastem paoa blong God moa, blong protektem yumi. Oli givhan long yumi blong tingbaot God olsem “ples blong haed blong yumi mo paoa blong yumi.”—Ol Sam 46:1.

Wajem sot video ya blong luk wanem samting we buk blong Ol Sam i tokbaot.