EKSPLENESEN BLONG OL VAS
Jenesis 1:26—“I Gud Yumi Mekem Man Long Pija Blong Yumi”
“Biaen God i talem se: ‘I gud yumi mekem man long pija blong yumi, blong i olsem yumi. Mo i gud olgeta oli bos long ol fis long solwota, mo long ol pijin we oli stap flae long heven, mo long ol animol we oli save laef wetem ol man, mo long evri animol we oli olsem snek mo lised we oli stap muv olbaot long wol ya.’”—Jenesis 1:26, Baebol Long Niu Wol Translesen.
“Mo God i se, ‘I gud yumi mekem man long pija blong yumi, bambae hem i olsem yumi: mo i gud oli bos long ol fis long solwota, mo ol pijin long skae, mo long ol buluk, mo long fulwol, mo long olgeta animol we oli stap muv sloslo olbaot long graon.’”—Jenesis 1:26, King James Version.
Mining blong Jenesis 1:26
God i wokem ol man long pija blong hem, mo oli naf blong wokem mo soemaot ol fasin we God i gat, olsem lav, sore, mo jastis. Taswe ol man oli save folem fasin blong God.
“God i talem se: ‘I gud yumi mekem man long pija blong yumi.’” Bifo we Jehova Goda i wokem man o eni narafala samting, hem i wokem wan strongfala enjel, hemia Jisas. Jisas i wok wetem Hem blong mekem “olgeta narafala samting long heven mo long wol.” (Kolosi 1:16) Jisas i soemaot ol fasin blong Jehova—hem i “pija blong God ya we yumi no save luk hem.” (Kolosi 1:15) Taswe i stret we God i talem long Jisas, se: “I gud yumi mekem man long pija blong yumi.”
“I gud olgeta oli bos long . . . ol animol we oli save laef wetem ol man, mo . . . long olgeta samting long wol.” God i no wokem ol animol long pija blong hem. Oli no save soemaot ol fasin we ol man oli gat, olsem lav, mo tingting blong olgeta i no save stikim olgeta. Be God i laekem ol animol, taswe Hem i askem long ol man blong oli “bos” long olgeta, hemia wan tok we yumi save tanem tu i kam “rulum” (New International Version) o “lukaotem” (Common English Bible). Jehova i putumap ol man blong oli lukaot long ol animol. (Ol Sam 8:6-8; Ol Proveb 12:10) Jehova i ekspektem se ol man oli lukaot gud long wol mo long olgeta laef samting.
Ol vas raonabaot long Jenesis 1:26
Japta wan mo tu blong Jenesis i tokbaot kriesen blong yunives, planet blong yumi, mo laef long wol. Evri samting we Jehova i wokem i nambawan, be beswan kriesen blong hem long wol, hemia ol man. Afta we God i finisim wok blong hem, hem i “luk olgeta samting we hem i mekem, hem i luk se oli gud tumas.”—Jenesis 1:31.
Wajem sot video ya blong faenemaot moa long samting we buk blong Jenesis i tokbaot long saed blong kriesen.
Rong tingting long saed blong Jenesis 1:26
Rong tingting: Ol man nomo, be i no ol woman, oli naf blong folem o soemaot ol fasin blong God.
Trutok: Tok ya “man” we i stap long plante Inglis Baebol, i save givim tingting se i stap tokbaot ol man nomo. Be tok ya long olfala Hibru lanwis i stap tokbaot olgeta man, i minim ol man mo woman tu. Ol man mo woman oli save soemaot ol gudfala fasin blong God. God i givim janis long tufala tugeta blong mekem hem i glad mo kasem laef olwe.—Jon 3:16.
Rong tingting: God i gat wan bodi olsem blong yumi.
Trutok: “God hem i Spirit”—hemia i min se bodi blong hem i defren long man. (Jon 4:24) I tru se, samtaem Baebol i tokbaot fes blong hem, ol han, hat mo ol nara samting bakegen. Baebol i yusum ol tok ya we yumi naf blong kasem save long hem, blong tijim yumi long saed blong God.—Eksodas 15:6; 1 Pita 3:12.
Rong tingting: Jenesis 1:26 i pruvum se Jisas hem i God.
Trutok: God i papa blong Jisas, mo Jisas i pikinini blong God, tufala i no sem man. Jisas i talem se God i hae moa long hem. (Jon 14:28) Blong faenemaot moa, yu save wajem video ya ?Jisas Kraes Hem i God? o ridim atikol ya “?From Wanem Baebol i Talem Se Jisas i Pikinini Blong God?”
Wajem sot video ya blong luk wanem samting we buk blong Jenesis i tokbaot.
a Jehova i prapa nem blong God. (Ol Sam 83:18) Ridim atikol ya “?Hu Ya Jehova?”