Ol Proveb 16:3—“Yu Putum Olgeta Samting We Yu Mekem Long Han Blong MASTA”

“Yu putum olgeta samting we yu stap mekem long han blong Jehova, nao ol plan blong yu bambae oli go gud.”—Ol Proveb 16:3, Niu Wol Translesen.

“Yu putum olgeta samting we yu mekem long han blong MASTA, mo hem bambae i mekem ol plan blong yu oli stanap.”—Ol Proveb 16:3, New International Version.

Mining blong Ol Proveb 16:3

Waestok ya i givhan long ol man we oli wosipim tru God blong bilif strong se sipos oli trastem God, bambae ol plan blong olgeta oli go gud. Oli soemaot se oli trastem God taem oli lukaot mo folem ol advaes blong hem.

“Yu putum olgeta samting we yu stap mekem long han blong Jehova.” Bifo we ol man blong Jehovaa oli mekem ol desisen, oltaem oli dipen long advaes blong hem. (Jemes 1:5) ?From wanem? Wan risen hemia se ol man oli no naf blong kontrolem ol samting we oli hapen long laef blong olgeta. (Prija 9:11; Jemes 4:13-15) Mo narawan, maet oli nogat i naf save blong mekem samting we oli wantem mekem. From samting ya, plante oli soemaot se oli waes taem oli dipen o trastem God blong i lidim olgeta. Oli mekem olsem taem oli prea blong God i lidim olgeta mo oli wok folem wil blong hem we oli raetem long Baebol.—Ol Proveb 3:5, 6; 2 Timoti 3:16, 17.

Tok ya “yu putum olgeta samting we yu mekem long han blong MASTA”b i min se yu “lego ol wok blong yu long han blong MASTA.” Wan buk i talem se, tok ya i save minim “wan man we i tekemaot ol hevi samting we i stap long solda blong hem mo i givim long wan narafala we i strong moa mo i naf blong karem.” Olgeta we oli gat tingting daon mo oli dipen long God, oli save sua se bambae hem i givhan long olgeta.—Ol Sam 37:5; 55:22.

Tok ya “olgeta samting we yu mekem” i no min se God bambae i apruvum o i blesem evri plan we man i mekem. Taswe blong kasem blesing blong Jehova, ol plan blong olgeta i mas laenap wetem ol loa blong hem mo wil blong hem. (Ol Sam 127:1; 1 Jon 5:14) God i no blesem olgeta we oli no obei, “hem i stap blokem plan blong ol man nogud.” (Ol Sam 146:9) Be long semtaem, hem i sapotem olgeta we oli stap traehad blong respektem ol loa blong hem we i stap long Baebol.—Ol Sam 37:23.

“Nao ol plan blong yu bambae oli go gud.” Long sam translesen oli transletem ol toktok ya i kam “Hem bambae i mekem ol plan blong yu oli stanap.” Long Hibru haf blong Baebol we samfala oli singaot se Oltesteman, tok ya we oli tanem i kam long Bislama se “stanap” i save minim wan fandesen. Mo plante taem oli yusum tok ya blong tokbaot ol samting we God i wokem se oli stanap strong. (Ol Proveb 3:19; Jeremaea 10:12) Long sem fasin, olgeta we oli stap mekem samting we i stret long fored blong God, hem bambae i mekem ol plan blong olgeta i stanap. Mo bambae hem i lidim olgeta blong oli gat wan laef we i sef mo i hapi.—Ol Sam 20:4; Ol Proveb 12:3.

Ol vas raonabaot long Ol Proveb 16:3

King Solomon nao i raetem ol waestok ya, mo hem i raetem bighaf blong ol tok we i stap long buk blong Ol Proveb. Hem i naf blong talemaot plante waestok olsem, from we God nao i givim waes long hem.—1 King 4:29, 32; 10:23, 24.

Long japta 16, Solomon i stat blong presem God from waes blong hem mo i talemaot olsem wanem hem i no laekem ol man we oli praod. (Ol Proveb 16:1-5) Japta ya i givhan long ol rida blong kasemsave long wan trutok we i stap kamaot bakegen mo bakegen long buk blong Ol Proveb, hemia se ol man oli save kasem trufala waes mo oli win long laef, sipos oli gat tingting daon mo oli letem God i lidim olgeta. (Ol Proveb 16:3, 6-8, 18-23) Trutok ya i stap kamaot oltaem long Baebol.—Ol Sam 1:1-3; Aesea 26:3; Jeremaea 17:7, 8; 1 Jon 3:22.

Wajem sot video ya blong luk wanem samting we buk blong Ol Proveb i tokbaot.