Rom 6:23—“Pei Blong Sin Hemia Ded, Be Presen We God i Givim . . . Hemia Laef Blong Olwe”

“Pei blong sin, hemia ded. Be presen we God i givim tru long Masta blong yumi Kraes Jisas, hemia laef we i no save finis.”—Rom 6:23, Baebol Long Niu Wol Translesen.

“Pei blong sin hemia ded, be presen we God i givim tru long Masta blong yumi Kraes Jisas, hemia laef blong olwe.”—Rom 6:23, New International Version.

Mining blong Rom 6:23

Aposol Pol i talem ol tok ya blong eksplenem se ol man oli stap ded from we oli mekem sin. Be God i wantem givim wan nambawan fiuja long ol man we oli wosipim hem, hemia presen ya blong laef we i no save finis.

“Pei blong sin hemia ded.” Taem ol man oli bon, oli no stret gud olgeta, taswe i isi nomo blong oli mekem sin.a (Ol Sam 51:5; Prija 7:20) From we ol man oli sinman taem oli bon, oli kam olfala mo oli ded.—Rom 5:12.

Pol i yusum wan pijatok blong soemaot poen ya, hem i talem se sin i olsem masta we i givim pei long ol man blong hem. Wokman i ekspektem blong kasem pei from wok blong hem, mo long sem fasin ol man oli ekspektem blong ded from we oli sinman.

Be Pol i eksplenem tu se, “taem man i ded, hem i fri long olgeta sin blong hem.” (Rom 6:7) Taem man i ded, hem i kam fri long ol sin we hem i mekem. Taswe, yumi save se ol dedman oli no stap safa samples from we oli mekem ol mastik long laef blong olgeta. Baebol i talem stret se ol dedman oli no save tingting, oli no save mekem wan samting, mo oli no gat filing.—Prija 9:5.

“Be presen we God i givim tru long Masta blong yumi Kraes Jisas, hemia laef blong olwe.” Presen we God i givim hemia laef blong olwe, we i defren olgeta long “pei” blong sin. Tok we oli talem long olfala lanwis blong minim “presen,” yumi save transletem se “presen we i bigwan tumas” o “presen we narafala i givim from kaen fasin blong hem.” Tok ya i minim samting we man i kasem be i no pei blong wok blong hem. I no gat wan sinman we wok blong hem i naf blong pem laef we i no save finis o pem God blong sevem hem. (Ol Sam 49:7, 8) Be God i givim nambawan presen ya blong laef we i no save finis, i fri nomo, long olgeta we oli soemaot bilif long Jisas.—Jon 3:16; Rom 5:15, 18.

Ol vas raonabaot long Rom 6:23

Pol i raetem leta ya long ol Kristin long Rom samwe long 56 K.T. I luk olsem se sam long ol Kristin ya oli gat rong tingting long saed blong fasin sore blong God. Maet ol tok blong ol waes man blong Gris i gat paoa long olgeta, nao oli ting se moa we oli mekem sin, moa we oli kasem fogif blong God. (Rom 6:1) Sam narafala oli ting se oli no save kasem panis from ol mastik blong olgeta, from we oli no moa stap aninit long Loa blong Moses. (Rom 6:15) Pol i makem gud long leta blong hem, se God i no save sore long ol Kristin sipos oli letem sin i stap bos long olgeta.—Rom 6:12-14, 16.

Ol tok blong Pol oli leftemap tingting blong ol man blong God tede, from we hem i soemaot se nating we oli bon wetem sin, be oli gat hop yet. Sipos oli obei long ol loa blong God long saed blong gudfala fasin mo oli no letem ol rabis fasin i pulum olgeta, God i promes se bambae hem i givim laef blong olwe long olgeta.—Rom 6:22.

Wajem sot video ya blong luk wanem samting we buk blong Rom i tokbaot.