1 Korin 10:13—“God i Stap Holem Promes Blong Hem”

“Ol samting we oli stap traem yufala, oli sem mak nomo long ol samting we oli stap traem olgeta man. Be God i stap holem promes blong hem, mo hem i no save letem wan samting i traem yufala we i strong tumas blong yufala i winim. Mo taem samting olsem i traem yufala, hem bambae i mekem rod blong yufala i naf blong stanap strong.”—1 Korin 10:13, Baebol Long Niu Wol Translesen.

“Ol samting we oli stap traem yufala, i sem mak long traem blong olgeta man, mo God i holem promes blong hem, hem i no save letem wan trabol we i strong tumas i traem yufala, be bambae hem i mekem rod blong yufala i save win, nao yufala i naf blong fesem traem ya.”—1 Korin 10:13, New King James Version.

Mining blong 1 Korin 10:13

Vas ya i makemaot wan fasin blong God we i pulum yumi blong lavem hem, hemia fasin blong hem blong holem promes we hem i mekem. Ol gudfala man blong God oli save sua se bambae hem i halpem olgeta, speseli taem ol samting i traem olgeta.

“Ol samting we oli stap traem yufala, oli sem mak nomo long ol samting we oli stap traem olgeta man.” Maet wan samting i save traem wan man blong God blong i mekem samting we Hem i no laekem. I tru, samting ya we i traem hem i no isi, be i no wan samting we i stap traem hem nomo from se i stap traem plante man.a Taswe ol man blong God oli save sua se olgeta tu oli naf blong fesem traem olsem.

“God i stap holem promes blong hem.” Yumi save trastem Jehovab God mo dipen long hem. Oltaem hem i holem promes blong hem se bambae i no lego olgeta we oli lavem hem, oli holemstrong long hem mo oli obei long hem. (Dutronome 7:9; Ol Sam 9:10; 37:28) Taswe, olgeta we oli wosipim hem, oli save sua fulwan se bambae hem i holem tufala gudfala promes we hem i mekem long las haf blong vas ya.

“Hem i no save letem wan samting i traem yufala we i strong tumas blong yufala i winim.” God i soem se hem i holem promes blong hem taem i no letem se ol trabol we oli strong tumas i winim ol man blong hem. Hem i save wanem we ol man blong hem oli naf blong mekem mo no mekem.—Ol Sam 94:14.

“Taem samting olsem i traem yufala, hem bambae i mekem rod blong yufala i naf blong stanap strong.” God i save tekemaot wan traem o givim samting we man blong hem i nidim blong stanap strong. Eksampol, Jehova i save yusum tabu spirit blong givim ol advaes blong lidim man blong hem, i save yusum Baebol blong kamfotem hem, mo Hem i save yusum ol brata mo sista blong givhan long hem.—Jon 14:26; 2 Korin 1:3, 4; Kolosi 4:11.

Ol vas raonabaot long 1 Korin 10:13

Vas ya i kamaot long wan leta we aposol Pol i raetem long ol Kristin long kongregesen blong Korin. Long haf ya blong leta blong hem, Pol i yusum stori blong ol man Isrel bifo, blong givim woning long olgeta. (1 Korin 10:11) Pol i talemaot ol samting we i traem ol man Isrel, olsem fasin ya blong wosipim ol aedol mo doti fasin blong seks. (1 Korin 10:6-10) Samfala oli foldaon long ol rabis fasin ya. Pol i yusum eksampol blong olgeta blong rimaendem ol Kristin se oli no mas trastem olgeta wan bitim mak se bambae oli neva foldaon. (1 Korin 10:12) Be, hem i leftemap tingting blong olgeta wetem ol tok we oli stap long 1 Korin 10:13. Ol gudfala man blong God oli naf blong stanap strong agensem enikaen trabol.

Wajem sot video ya blong luk wanem samting we buk blong 1 Korin i tokbaot.