Luk 1:37—“Long Saed Blong God, i No Gat Wan Samting We Hem i No Naf Blong Mekem”

“I no gat wan samting we i strong tumas we God i no save mekem.”—Luk 1:37, Baebol Long Niu Wol Translesen.

“Long saed blong God, i no gat wan samting we hem i no naf blong mekem.”—Luk 1:37, King James Version.

Mining blong Luk 1:37

God ya we i gat olgeta paoa i save mekem ol samting we ol man oli no naf blong mekem. I no gat wan samting we i save blokem hem blong mekem ol tok mo promes blong hem oli kamtru.

Long ol olfala hanraet, ”wan samting” i save minim tu, ol “tok” we God i talem. Mo tu, hem i save minim samting we i kamaot from ol tok we Jehovaa God i talem. Oltaem tok blong God i kamtru, taswe i stret tu blong tanem Luk 1:37 i kam olsem: “I no gat wan promes blong God we i no save kamtru” o “Long saed blong God, i no gat wan samting we hem i no naf blong mekem.” Ol defren fasin blong tanem vas ya oli soemaot sem stamba trutok: Evri tok o promes blong God bambae oli kamtru, from we i no gat wan samting we hem i no naf blong mekem.—Aesea 55:10, 11.

Baebol i yusum sam narafala tok tu long saed blong ol promes blong God. Wan eksampol, Jehova i yusum wan enjel blong talemaot se Sera, waef blong Ebraham we i neva gat pikinini mo i olfala finis, bambae i gat bel. God i talem se: “?I gat wan samting we i strong tumas blong Jehova i mekem?” (Jenesis 18:13, 14) Job i tingbaot ol samting we Jehova i krietem, nao hem i talem se: “I no gat wan samting we yu stap tingting blong mekem we i strong tumas blong yu mekem.” (Job 42:2) Mo taem ol man blong Jisas oli wari se oli no naf blong kasem laef, Jisas i talem se “God hem i naf blong mekem olgeta samting.”—Matiu 19:25, 26.b

Ol vas raonabaot long Luk 1:37

Wan enjel we nem blong hem Gabriel, i talem ol tok long Luk 1:37 long wan gel Jiu we nem blong hem Meri. Gabriel i jes talem long hem se bambae hem i bonem wan boe we i “Pikinini blong Hae God,” mo hem i mas “putum nem blong hem se Jisas.” Boe ya bambae i kam King blong Kingdom blong God, mo bambae hem i rul gogo i no save finis.—Luk 1:26-33; Revelesen 11:15.

Meri i askem olsem wanem samting ya i save hapen, from we hem i no mared mo i “neva mekem seks wetem man.” (Luk 1:34, 35) Gabriel i talem se God bambae i yusum tabu spirit o paoa blong Hem. Long taem ya, Jisas i wan spirit pikinini blong God long heven. Ale Jehova i yusum tabu spirit blong tekem laef blong Boe blong hem long heven mo putum i go long bel blong Meri. (Jon 1:14; Filipae 2:5-7) Yes, wan merikel i mekem se Meri i gat bel. Blong mekem bilif blong Meri i strong moa long paoa blong God, enjel i talem long hem se Elisabet we i famle wetem Meri mo “i olfala,” hem tu i gat bel mo bambae hem i bonem wan boe. Elisabet mo hasban blong hem Sekaraea, tufala i no gat pikinini from we Elisabet i no save karem pikinini. (Luk 1:36) Jehova i talemaot tu ol wok we boe blong tufala, Jon Baptaes, bambae i mekem.—Luk 1:10-16; 3:1-6.

Maet enjel Gabriel i stap tingbaot tufala woman ya taem hem i talem ol tok blong Luk 1:37. Ol tok ya i mekem ol man blong Jehova tede oli gat strong tingting se bambae Hem i gohed blong mekem ol promes blong hem oli kamtru. Wan long ol promes ya, hemia se bambae i mekem rul blong Pikinini blong hem Jisas Kraes, we i King blong Kingdom blong God long heven, i tekem ples blong ol gavman blong man.—Daniel 2:44; 7:13, 14.

Wajem sot video ya blong luk wanem samting we buk blong Luk i tokbaot.