God i Givim Paoa Blong Mitufala i No Tanemraon

I gat gudfala risen blong oli talem se bambae mi no gohed longtaem long wok blong paenia. Tingting blong mi i no bin stap long wok blong Jehova. Mi no laekem wok blong prij, oltaem mi prea se bambae i ren long Sande blong mi no save prij. Taem mi go prij, mi seremaot ol magasin nomo. Mi neva yusum wan vas blong Baebol. Taem mi gat wan Baebol riding long kongregesen, Mama i talem se bambae i givim wan gudfala presen long mi sipos mi mekem. Mi no wantem stadi, mo mi no putum wan mak blong kasem long wok blong Jehova.

Long hot taem long yia ya, i gat wan distrik asembli (naoia yumi kolem bigfala asembli) long Cardiff, Wels. Long ples ya nao, laef blong mi i jenis. Wan brata we i givim tok i askem sam kwestin we wanwan long mifala i mas tingbaot. Hem i se: “?Yu yu givim laef blong yu long Jehova finis, mo yu baptaes?” Long tingting blong mi mi talem ‘Yes.’ “?Yu yu promes blong mekem wok blong Jehova wetem olgeta hat, laef, tingting, mo paoa blong yu?” ‘Yes.’ “?Yu gat wan sik o wok long famle we i blokem yu blong paenia?” ‘Nogat.’ “?I gat wan narafala risen we i mekem se yu no save paenia?” ‘Nogat.’ “Sipos yu ansa ‘no’ long las kwestin, ?from wanem yu no wan paenia?”

I olsem we hem i onem wan laet long tingting blong mi. Mi stap tingting se: ‘Mi mi stap westem laef blong mi. Mi no kipim promes we mi mekem taem mi givim laef blong mi long Jehova. Mi no stap mekem wok blong Jehova wetem olgeta laef blong mi.’ Mi tingbaot se sipos mi wantem se Jehova i kipim promes we hem i mekem long mi, mi tu mi mas kipim promes we mi mekem long hem. Ale, long Oktoba 1956 mi statem wok blong haftaem paenia (bifo mifala i kolem paenia long taem blong spel).

Wan yia biaen, mi kam wan fultaem paenia mo mi muv i go long wan kongregesen we i gat 19 pablisa nomo. Evri wik, mi kasem ol tok blong mekem long miting. Ol brata we oli gat longfala tingting, oli givhan long mi blong kam gud moa blong rerem mo givim ol tok. Tu yia biaen, hemia long 1959, mi kam wan spesel paenia mo oli askem long mi blong go long Aberdeen, long not blong Skotlan. Afta we sam manis i pas, oli askem long mi blong kam wok long Betel long London. Seven yia mi stap long Betel, mo mi harem gud tumas long wok we mi mekem long ples blong printim ol buk.

Nating se mi laekem tumas Betel, be mi harem se mi wantem mekem spesel wok afsaed blong Betel. Mi mi yang, mi helti, mo mi rere blong letem Jehova i yusum mi long eniples. Taswe long Eprel 1965, mi fulumap pepa blong askem blong go kasem trening long Skul Blong Gilead blong kam wan misinari.

Long yia ya, mi mo brata we mi serem rum wetem, mitufala i go long wan bigfala asembli long Berlin. Mo tu, mitufala i wantem luk Berlin Wol we oli bin wokem sam yia bifo.

Wan dei long asembli ya, mifala i gat janis blong prij, mo oli putum mi wetem Susanne Bandrock. Long 1966, mitufala i mared, mo tu yia biaen, mitufala i kasem invetesen blong go long namba 47 klas blong Gilead. !Hemia wan nambawan blesing! Kwiktaem nomo, faef manis blong trening ya i pas. Oli askem mitufala blong go long Sair, we naoia oli kolem Demokratik Ripablik blong Kongo. !Mitufala i sapraes! Mitufala i no save plante samting long saed blong kantri ya. Mitufala i fraet, be mitufala i talem yes mo trastem Jehova.

Mitufala i spenem plante aoa long ol epot mo long ol plen. Biaen mitufala i kasem wan smol taon we ol man blong hem oli wok long maen, nem blong taon ya Kolwezi. I no gat wan brata i kam long epot blong mitim mitufala. Biaen mitufala i faenemaot se mesej we mitufala i sanem long ol brata tru long postofis, i kasem olgeta tu dei afta we mitufala i kamtru. Wan man we i wok long epot i kam talem wan samting long mitufala long Franis, be mitufala i no save lanwis ya. Woman we i stap fored long mitufala i tanraon mo i transletem tok blong hem, i se: “Hem i arestem yutufala.”

Man ya we i arestem mitufala i fosem wan man blong tekem mifala long olfala trak blong spot blong hem, we i gat tu jea nomo mo enjin i stap biaen. Tufala man ya wetem mi mo Susanne, mifala evriwan i skwis i go insaed long trak ya. Ating i mas luk olsem wan fani muvi taem trak i jamjam long ol hol long rod, mo top blong hem i open olsem maot blong wan fis we i stap kakae ol basket blong mitufala.

Mifala i ron i go kasem misinari hom. Mitufala i no save se i stap wea, be man blong epot hem i save. Ol get oli lok mo i no gat man long haos. Ol misinari oli go long intenasnal asembli mo tekem spel blong olgeta. Taem mifala i stanap long san we i hot tumas, mifala i stap tingbaot wanem bambae i hapen long mitufala. Biaen, wan brata i kam. Taem hem i luk mitufala, hem i smael bigwan, mo wantaem nomo mitufala i harem gud. Hem i save man ya we i wok long epot, mo i luk olsem se man ya i wantem kasem sam mane long mifala. Brata i toktok smoltaem wetem hem, nao hem i go, mo mifala i karem olting blong mitufala i go insaed.

I No Taem Blong Tanemraon

Kwiktaem nomo, mitufala i luksave se ol manples oli hapi mo kaen, mo oli bin gotru long plante hadtaem. Sore tumas, long ol ten yia bifo, stronghed mo raf fasin i mekem plante faet i kamaot long kantri ya. Long 1971, gavman i no moa luksave ol Witnes blong Jehova olsem wan jos. Mifala i no save wanem bambae i hapen long mifala.

Be i no taem blong fraet mo tanemraon, mo bighaf blong ol brata mo sista oli no mekem olsem, nating se gavman i traem fosem olgeta blong karem wan kad mo werem wan pin long klos blong olgeta, blong soem se oli joen long wan politik pati. Sipos oli no mekem olsem, oli no save kasem ol sevis we gavman i givim, mo ol polis mo ami oli stap mekem trabol long olgeta oltaem. Plante brata oli lusum wok blong olgeta, mo oli sakemaot plante pikinini long ol skul. Oli putum plante handred brata long kalabus tu. Hemia wan hadtaem. Nating se i olsem, ol Witnes oli no fraet, be oli gohed nomo blong talemaot gud nius.

Mitufala i Mas Gat Fasin Blong Stanap Strong Longtaem

Long ol yia ya, mi mo Susanne i spenem plante taem blong travel long ol ples blong mekem wok blong eria elda mo distrik elda. Long ol vilej we mitufala i slip long olgeta, mitufala i fesem sam hadtaem mo sam samting we oli narakaen. Ol smol haos we oli wokem ruf blong olgeta long gras, oli smol bitim mak, klosap oli no naf blong mitufala i save slip long floa. Mi no save kaontem hamas taem mi bangem hed blong mi taem mi stap pas long ol smol doa. Mitufala i mas go long reva mo ol smol krik blong karem wota blong swim. Long naet, mitufala i yusum laet blong kandel blong rid. Mitufala i yusum jakol faea blong kuk. Be long tingting blong mitufala, hemia nao laef blong ol misinari. Mitufala i kam long ples ya blong laef olsem nao, mo mitufala i glad se mitufala i stap mekem wok ya olsem ol soldia we oli stap long fran laen blong faet.

Taem mitufala i laef wetem ol famle we oli Witnes, mitufala i lanem blong tinghevi long ol samting we bifo mitufala i ting nating long olgeta, olsem: kakae, wota, klos, mo ples blong slip. (1 Timoti 6:8) Eni narafala samting we mitufala i no rili nidim, i olsem wan presen. Tingting ya blong gat wan laef we i simpol i stap yet long hat blong mitufala.

I tru, mitufala i neva fesem sem trabol olsem aposol Pol. Be samtaem, mitufala i fesem samting we i traem bilif mo gudfala tingting we i pusum mitufala. Mitufala i travel long ol rod we oli rabis olgeta, mo samtaem i no gat wan prapa rod. Taem mitufala i ron long ol rod ya we oli fulap long ol ston, trak blong mitufala i seksek bitim mak. Samtaem trak i fas long sanbij we i sofsof, o long sofmad we i fasgud olsem glu. Wan dei, mitufala i ron 70 kilometa nomo, mo mitufala i mas digimaot trak we i fas 12 taem.

Be long taem ya we mitufala i prij long ol had ples long bus, mitufala i harem se mitufala i klosap moa long Jehova. Mitufala i lanem se Jehova i save halpem yumi blong stanap strong wetem glad, nating se yumi no gat paoa blong jenisim ol trabol we yumi fesem. Susanne i no wan woman we i laekem blong wokbaot long bus mo mekem ol samting we oli denja, be taem mitufala i fesem ol hadtaem, hem i neva komplen. Mitufala i tingbaot ol taem ya olsem ol hapi taem, mitufala i kasem plante blesing mo lanem plante samting.

Long ol yia we mitufala i stap long Sair, oli arestem mi plante taem. Wan taem, oli talem ol giaman toktok se mi mi stap pem mo salem ol daemon long fasin we i brekem loa. Ol samting olsem i mekem mitufala i wari, be mitufala i stap tingbaot se sipos Jehova i wantem mitufala blong mekem wok we hem i givim, bambae hem i halpem mitufala. !Mo samting ya i rili hapen!

Gohed Long Wok Blong Jehova

Long 1981, oli invaetem mitufala blong wok long branj ofis long Kinshasa. Wan yia bifo, gavman i luksave bakegen ol Witnes blong Jehova mo wok we mifala i mekem. Ale ol brata oli pem wan graon blong wokem wan branj ofis we i bigwan moa. Be long Maj 1986, mifala i sek taem presiden blong kantri i saenem wan loa blong putum tabu long wok blong ol Witnes blong Jehova. Wok blong bildim branj ofis i stop, mo i no longtaem, bighaf blong ol misinari oli mas aot long kantri.

Mitufala i stap smoltaem moa. Mitufala i traehad blong gohed blong prij, nating se mitufala i save se ol haeman oli stap wajem mitufala. Mitufala i lukaot gud, be wan dei, taem mi stap mekem wan Baebol stadi, oli arestem mi. Oli putum mi long wan dak rum we i fulap long ol prisena. Ples i hot, i smel nogud, mo i no gat ea insaed. Wan smol hol long wol klosap long ruf, hemia nomo i letem smol laet mo win i kam insaed. Sam prisena oli holem mi mo mekem mi mi stanap fored long wan narafala prisena we oli bin putumap hem olsem bos blong olgeta. Hem i talem se: “!Yu singim singsing blong kantri!” Mi ansa se: “Mi no save singsing ya.” Ol narafala oli talem se: “!Ale singim singsing blong kantri blong yu!” Mi ansa se: “Mi no save singsing ya tu.” Bos i mekem mi mi stanap agensem wol blong 45 minit. Biaen, ol lokol brata oli toktok long olgeta nao oli letem mi mi go fri.

I klia se ol samting bambae i no kam gud long kantri ya, mo i no longtaem, mitufala i kasem nius se bambae mitufala i go long Sambia. Taem mitufala i krosem boda, mitufala i gat tu filing wantaem, glad mo harem nogud. Mitufala i tingbaot ol 18 yia we mitufala i bin wok wetem ol gudfala misinari mo ol lokol brata mo sista. Nating se samtaem i gat stres, be mitufala i harem se oltaem Jehova i stap mo i blesem mitufala. Mitufala i bin lanem lanwis Swahili mo Franis, mo Susanne i lanem sam Lingala. I gat ol gudtaem long wok blong prij, mo mitufala i halpem bitim 130 man blong oli gohed kasem baptaes. Mitufala i harem gud blong save tu, se mitufala i bin joen long wok blong putum fandesen blong trutok we i save gru moa long fiuja. !Mo hemia samting we i hapen! Long 1993, Saprim Kot i tekemaot tabu we gavman i putum long 1986. Mo naoia, i gat bitim 240,000 pablisa blong Kingdom long Kongo.

Long ol yia we mitufala i stap long Sambia, oli bildim wan niufala branj ofis mo oli mekem i kam bigwan moa. Naoia, namba blong pablisa long kantri ya i tri taem antap long namba we i stap taem mitufala i kam long 1987.

?Wanem i hapen long yangfala brata ya we oli talem se bambae hem i lego wok blong paenia bifo we wan manis i finis? Blesing blong Jehova mo help we gudfala waef blong mi Susanne i givim, i mekem se mi spenem 65 nambawan yia long wok blong paenia. !Mi testem mo mi luk we Jehova i gud!—Ol Sam 34:8.

Mitufala i no spesel, be mitufala i traem bes blong mitufala nomo blong kipim promes blong givim laef blong mitufala long Jehova. Mitufala i trastem Jehova se bambae hem i gohed blong halpem mitufala, blong mitufala i neva “tanemraon,” be bilif blong mitufala bambae i kam strong moa we “i lukaot gud long laef” blong mitufala.—Hibru 10:39.

Wajem video ya: Dayrell and Susanne Sharp: We Promised to Serve Jehovah Whole-Souled.