Mi Wantem Tumas Blong Givhan Long Ol Man We Sora Blong Olgeta i Fas

Mi mi bon long 1941 long Virrat, Finlan. Sora blong evriwan long famle i fas, Papa mo Mama, smol brata mo sista blong mi, mo plante narafala famle tu. Mifala i yusum saen lanwis blong toktok.

Mi Lanem Ol Nambawan Samting Long Baebol

Mi mi stap go long wan skul we i 240 kilometa longwe long hom blong mi. Long skul ya, oli no letem mifala i yusum saen lanwis, from we long taem ya, ol skul blong olgeta we sora blong olgeta i fas long Finlan, oli fosem ol studen blong lanem blong toktok wetem maot blong olgeta, mo lukluk maot blong man we i toktok blong kasem save. Sipos ol tija oli luk mifala i yusum saen lanwis, oli kilim strong han blong mifala wetem wan stik, we i mekem ol fingga oli solap blong plante dei.

Afta we mi finis long haeskul, mi mi go long wan kolej we i tijim agrikalja. Papa mo Mama i gat wan fam, taswe mi mas lanem blong wokem garen. Taem mi kamhom, mi luk wan Wajtaoa mo Wekap! long tebol. Papa i talem long mi se tufala magasin ya i eksplenem ol nambawan samting long Baebol. Wan kapol we sora blong tufala i no fas, i stap mekem Baebol stadi wetem hem mo Mama. Kapol ya i stap raetemdaon ol samting we oli wantem talem long Papa mo Mama.

Papa i talem se aninit long rul blong Kingdom blong God, wol ya bambae i kam wan naesfala paradaes mo ol dedman bambae oli laef bakegen. Be mi bin lanem se taem man i ded, hem i go long heven. Mi ting se Papa i no kasem save gud long ol Witnes from oli no yusum saen lanwis blong toktok long hem.

Taem kapol ya i kam luk Papa mo Mama bakegen, mi askem long tufala blong eksplenem samting we Papa i talem long mi. Tufala i se: “Samting we papa blong yu i talem i stret.” Tufala i soem ol tok we Jisas i talem long saed blong laef bakegen, long Jon 5:28, 29. Tufala i tokbaot olsem wanem God bambae i tekemaot ol rabis fasin long wol ya, mo ol man bambae oli laef olwe wetem gudfala helt mo pis.—Ol Sam 37:10, 11; Daniel 2:44; Revelesen 21:1-4.

Mi wantem save moa, ale mi tu mi stadi Baebol wetem Antero, wan Witnes we sora blong hem i no fas. Hem i no save saen lanwis, taswe mi raetem ansa blong ol kwestin long wan pepa. Antero i ridim, mo i raetem sam moa kwestin mo komen blong hem. Hem i mekem olsem blong tu aoa evri wik, mo i soemaot longfala tingting long mi.

Long 1960, mi go long wan bigfala asembli blong ol Witnes blong Jehova, we oli tanem ol tok i go long saen lanwis. Long Fraede aftenun, oli talemaot se long nekis dei, bambae samfala i baptaes. Ale, long Sarede moning, mi karem klos blong swim mo tawel blong mi, !mo mi tu mi baptaes!a Smoltaem biaen, Papa mo Mama wetem brata mo sista blong mi, olgeta tu oli baptaes.

Mi Serem Trutok Blong Baebol

Mi wantem tumas blong serem ol samting we mi lanem wetem ol man we sora blong olgeta i fas. Beswan rod blong mekem olsem, i blong yusum saen lanwis. Fastaem, mi gat strong tingting blong prij long olgeta we sora i fas, long taon we mi stap long hem.

Smoltaem biaen, mi muv i go long bigfala taon ya Tampere, we i gat plante faktri long hem. Mi go long evri haos blong askem long ol man sipos oli save samfala we sora blong olgeta i fas. Long rod ya, mi statem plante Baebol stadi, mo afta we sam yia i pas, i gat ten pablisa we sora blong olgeta i fas, long Tampere.

Long 1965, mi mitim wan nambawan sista, nem blong hem Maire. Wan yia biaen, mitufala i mared. Kwiktaem nomo, Maire i lanem saen lanwis, mo hem i wan tru fren we i wok had long ol 50 yia we mitufala i mekem wok blong Jehova tugeta.

Tu yia afta we mitufala i mared, boe blong mitufala, Marko, i bon, mo sora blong hem i no fas. Long haos, hem i lanem lanwis blong Finlan olsem mama lanwis blong hem, mo i lanem Saen Lanwis Blong Finlan tu. Taem Marko i gat 13 yia, hem i baptaes.

Sloslo, plante oli joen long grup blong saen lanwis long Tampere. Taswe, long 1974, mifala i muv i go long bigfala taon ya Turku, we i no gat wan Witnes we sora i fas. Bakegen, mifala i go long evri haos blong faenem ol man we sora blong olgeta i fas. Long ol yia we mifala i stap long Turku, 12 Baebol stadi blong mi oli baptaes.

Mi Wok Long Ol Kantri Klosap Long Baltik Si

Long 1987, oli askem long Marko sipos hem i glad blong wok long Betel. Grup we i toktok saen lanwis long Turku i kam strong, ale mitufala i mekem plan blong muv i go long narafala ples bakegen.

Long taem ya, i no moa tabu blong prij long plante ples long Is Yurop, ale long Jenuware 1992, mi wetem wan narafala brata we sora blong hem i fas, mitufala i go long Tallinn, long Estonia.

Mitufala i kontaktem wan Kristin sista we stret brata blong hem, sora blong hem i fas. Man ya i no intres long gud nius blong Kingdom, be hem i kaen mo i givhan long mitufala blong faenem plante man Estonia we sora blong olgeta i fas. Long naet bifo we mitufala i aot, hem i tekem mitufala i go long wan miting blong Asosiesen Blong Olgeta We Sora i Fas long Tallinn. Mifala i go eli mo putum plante buk mo magasin long lanwis blong Estonia mo Rasia long wan tebol. Long ples ya, mitufala i givimaot 100 buk mo 200 magasin mo kasem adres blong 70 man we sora blong olgeta i fas. !Long naet ya, wok blong prij long saen lanwis i stat long Estonia!

Smoltaem biaen, mi mo Maire i stat blong mekem ol trip i go long Estonia blong prij. Mitufala i katem taem we mitufala i spenem blong wok blong winim mane, mo mitufala i kam fultaem paenia. Long 1995, mitufala i muv i go klosap moa long Helsinki, blong mekem i isi moa blong jam long bot blong go long Tallinn. !Wok blong prij long Estonia i moa gud i bitim wanem we mitufala i bin tingbaot!

Mitufala i gat plante Baebol stadi mo 16 long ol stadi ya oli gohed gud gogo oli baptaes. Long olgeta, i gat tu woman we tufala i stret sista, tufala i blaen mo sora blong tufala i fas tu. Blong mekem Baebol stadi wetem tufala, mi yusum saen lanwis be mi mekem long han blong tufala blong tufala i save filim.

I no isi blong stadi wetem ol man we sora blong olgeta i fas. Long taem ya i no gat ol buk long saen lanwis long ples blong mifala, taswe mi yusum ol pija long ol buk blong yumi, mo mi mekem wan bigfala pija buk.

Branj ofis long Finlan i askem long mi blong visitim Latvia mo Lituenia, blong traem faenemaot olsem wanem wok blong prij long saen lanwis i save gohed long ol ples ya. Mitufala i visitim ol kantri ya plante taem blong halpem ol Witnes blong faenem ol man we sora blong olgeta i fas. Klosap evri kantri i gat prapa saen lanwis blong olgeta. Mi lanem saen lanwis blong Estonia, Latvia, Lituenia, mo Rasia tu, blong toktok long ol man Rasia we oli laef long ol kantri ya.

Sore tumas, taem mitufala i stap go kam long Estonia mo ol narafala kantri klosap long Baltik Si, dokta i talem long Maire se hem i gat sik ya Parkinson, ale mitufala i no moa save mekem ol trip ya.

Oganaesem Wok Blong Halpem Ol Man We Sora Blong Olgeta i Fas

Long 1997, oli setemap wan grup long branj ofis long Finlan blong transletem ol samting i go long saen lanwis. Mi mo Maire i stap klosap long branj ofis, ale mitufala i givhan blong rerem sam buk long saen lanwis. Sam samtaem mi givhan yet long wok ya. Mitufala i wok wetem boe blong mitufala Marko. Biaen, hem wetem waef blong hem Kirsi, tufala i givhan blong trenem sam grup long ol narafala kantri, blong oli transletem ol buk i go long saen lanwis.

Mo tu, branj ofis i mekem sam kos blong halpem ol pablisa we sora blong olgeta i no fas, blong oli lanem saen lanwis. Ol kos ya oli mekem se plante oli joenem ol grup mo kongregesen blong saen lanwis, oli sapotem wok blong prij mo ol miting, mo samfala oli mekem wok insaed long kongregesen.

Filing Ya Blong Wantem Tumas Blong Givhan i Stap Yet

Long 2004, mi mo Maire i givhan blong statem fas saen lanwis kongregesen long Helsinki, long Finlan. Tri yia biaen, hem i wan strong kongregesen we ol pablisa oli wok had mo i gat plante paenia tu.

Bakegen, mitufala i stat mekem plan blong muv i go long ples we i gat moa nid. Long 2008, mitufala i muv i go klosap long Tampere, mo mitufala i gobak long saen lanwis grup we mitufala i lego olgeta 34 yia bifo. Wan yia biaen, grup ya i kam nambatu saen lanwis kongregesen long Finlan.

Be sloslo, helt blong Maire i stap kam moa nogud. Mi glad nomo blong lukaot long hem go kasem we hem i ded long 2016. Mi misim hem bigwan, be mi stap wet blong luk hem bakegen long niufala wol, we bambae i no moa gat sik.—Aesea 33:24; Revelesen 21:4.

Blong 60 yia, wok blong mi i blong serem gud nius wetem ol man we sora blong olgeta i fas, !mo filing ya blong wantem tumas blong halpem olgeta i stap strong yet!