JW Satelaet Janel i Kasem Sam Ples We Intenet i No Save Kasem

Evri manis, yumi wet blong luk ol niufala program mo video long JW Brodkasting. Be plante brata mo sista long Afrika oli no save wajem ol program ya long Intenet. ?From wanem?

Long plante ples long Afrika i no gat Intenet. Mo long ol ples we i gat, plante taem i slo o i sas tumas. Wan eria elda long Madagaska i daonlodem wan JW Brodkasting long wan Intenet kafe. !Hem i pem 1,700 vatu, hemia i bitim pei blong sam man blong ful wik!a

Nating se i gat ol problem olsem, naoia plante milian man Afrika oli save wajem JW Brodkasting we oli no yusum Intenet. ?Olsem wanem oli mekem samting ya?

Stat long 2017, olgeta we oli laef long ol ples saot long Sahara long Afrika, oli gat janis blong wajem JW Brodkasting tru long wan satelaet TV janel. Oli no pem, mo oli save wajem 24 aoa long wan dei, 7 dei long wan wik, mo long 16 lanwis.

Blong mekem olsem, ol Witnes blong Jehova oli pem wan kontrak blong yusum wan TV janel blong soemaot long 35 kantri long saot blong Sahara long Afrika, samting we oli kasem tru long satelaet. Oli pem 1.2 milian vatu evri manis blong kontrak ya. Sam samtaem, oli pem moa blong yusum wan narafala janel blong soem ol spesel program, maet taem wan brata i visitim branj ofis, o asembli. Long rod ya, plante taosen brata mo sista oli save harem gud long ol program ya.

Plante man, wetem samfala we oli no Witnes tu, oli stap wajem JW satelaet janel long haos blong olgeta. Be plante brata oli no gat mane blong pem ol masin we oli nidim blong wajem long haos. Blong givhan long olgeta, ol brata oli setemap ol masin ya long bitim 3,670 Haos Kingdom, blong ol brata mo sista oli save go wajem long ples ya. Praes blong ol masin ya wetem transpot blong karem olgeta i go, i samwe long 7,600 vatu, hemia sipos Haos Kingdom i gat wan skrin finis o wan masin blong soem ol muvi. Sipos no, praes i go antap kasem 57,000 vatu.

Ol brata mo sista oli glad tumas long janel ya. Wan elda long Kamerun i talem se: “Long famle blong mifala, janel ya i olsem mana long draeples.” Wan brata long Naejeria, Odebode, i talem se: “Famle blong mifala i wajem janel ya tri taem evri wik. Ol pikinini oli glad tumas blong wajem, mo oli askem long ol narafala taem tu sipos mifala i save jenisim i go long JW janel.” Ros, we hem tu i blong Naejeria, i talem se: “Bifo, mi wajem nius oltaem, be naoia mi glad blong talem se mi wajem JW satelaet janel long ples blong hem. Taem mi wajem nius plante, mi kam kros kwik from ol samting we mi luk, mo blad presa blong mi i go antap. !Be JW Brodkasting i mekem tingting i kwaet mo i leftemap tingting! Mi laekem janel ya bitim ol narawan, hem i wan bigfala blesing we Jehova i givim.”

Wan eria elda long Mosambik i talem se long eria blong hem, oli setemap ol masin long ol Haos Kingdom blong kasem satelaet janel ya. Ol brata long ol kongregesen oli kam wan aoa o bitim wan aoa bifo we miting i stat, blong wajem JW Brodkasting tru long satelaet.

Long 2019, long intanasnal asembli long Johannesburg, Saot Afrika, oli yusum janel ya blong sanem ol stamba tok blong asembli ya, wetem ol tok we Hed Kampani i givim tu, oli go long naen defren ples. Sphumelele, we i wok long Brodkasting Dipatmen long branj ofis long Saot Afrika, i talem se: “Bifo, mifala i sanem ol tok tru long Intenet, be hemia i nidim wan strong Intenet, mo mifala i mas pem tu. JW satelaet janel i no sas tumas, mo mifala i save trastem.”

From ol presen mane we yufala i givim wetem gladhat blong sapotem wok long fulwol, plante brata mo sista long Afrika oli save wajem JW Brodkasting tru long satelaet. Tangkiu tumas long ol presen mane we yufala i givim tru long ol defren rod, long websaet ya donate.jw.org