Wajtaoa LAEBRI LONG INTENET
Wajtaoa
LAEBRI LONG INTENET
Bislama
  • BAEBOL
  • OL BUK
  • OL MITING
  • be p. 4-p. 8 haf 1
  • Welkam Long Tiokratik Skul

I no gat video yet long haf ya.

Sori, i gat problem taem i stap lodem video ya.

  • Welkam Long Tiokratik Skul
  • Tiokratik Skul i Save Givhan Long Yu Long Wok Blong God
  • Ol Sabtaetol
  • ?Yu Mas Mekem Wanem Blong Skul Ya i Givhan Fulwan LonYu?
Tiokratik Skul i Save Givhan Long Yu Long Wok Blong God
be p. 4-p. 8 haf 1
Picture on page 5

Welkam Long Tiokratik Skul

LONG bitim 200 kantri blong wol, plante milian man oli stap kasem gudfala trening long Tiokratik Skul. Sam long olgeta oli jes joen long skul ya, mo sam oli stap plante yia finis. Skul ya i stap gohed long plante taosen ples long wol. Nomata se yu stap wea, yu save kasem trening long skul ya. Ol olfala mo ol yangfala, ol man blong ol defdefren laen, olgeta we oli skul gud wetem olgeta we oli no skul gud, be Tiokratik Skul ya i stap tijim olgeta evriwan blong oli mekem wok blong God. Mo oli no pem wan samting nating blong kasem tijing ya.

Skul ya i stat long ol kongregesen blong ol Witnes blong Jehova long yia 1943. Oli talemaot bigfala tingting blong hem, se: “[Skul ya i] blong rerem ol ‘man blong bilif,’ hemia olgeta we oli harem Tok blong God mo we oli soemaot se oli bilif long hem, blong oli kam ‘nafgud blong tijim ol narafala.’ . . . Hem i blong mekem se olgeta wanwan . . . oli gat evri samting we oli nidim, blong oli save talemaot long olgeta man ol promes we oli putum tingting blong olgeta i stap strong long hem.” (Course in Theocratic Ministry, pej 4) Bigfala tingting blong skul ya i sem mak yet tede.

Fasin blong toktok i wan nambawan presen we God i givim. ?Wanem rod we i beswan blong yusum presen ya? Baebol i ansa se: “Yumi olgeta samting we yumi gat laef, yumi evriwan i mas presem [Jehova].” (Sam 150:6) Taem yumi mekem olsem, Papa blong yumi long heven i glad tumas. Yumi soemaot se yumi wantem talem tangkiu long hem from we hem i mekem i gud long yumi mo i lavem yumi. Taswe, Baebol i talem long yumi ol Kristin, se oltaem “yumi mas mekem wan sakrefaes long God, we i blong presem hem. Sakrefaes ya i olsem frut blong maot blong yumi we i talemaot nem blong hem long ol man.” (Hib. 13:15, NW) Mifala i talem welkam long yu we yu jes joen long Tiokratik Skul. Skul ya bambae i givhan long yu blong yu kam gud moa blong yusum presen ya we Jehova God i givim long yu blong presem hem, hemia fasin blong toktok.

Tiokratik Skul i save givhan long yu blong yu gat gudfala fasin blong toktok, yu rid gud long fored blong ol man, mo yu kam naf blong tijim narafala. Be i no hemia nomo. Bambae yu lanem ol gudfala fasin ya blong rid yu wan, lesin gud, rimemba ol samting we yu lanem, stadi, lukaot moa save, skelem ol save mo putum long stret ples long tok blong yu, storian gud, ansarem ol kwestin, mo raetemdaon ol tingting blong yu. Taem yu stadi, givim ansa, mo givim ol tok long skul ya, bambae yu yusum Baebol wetem ol buk we oli stanap long Baebol. Taem yu fulumap tingting blong yu wetem ol nambawan trutok we oli kamaot long Baebol, bambae yu stat blong save tingting blong God. !Samting ya i save givhan bigwan long yu long evri haf blong laef blong yu! Wan tija blong yunivesiti long ol yia 1900, nem blong hem William Lyon Phelps, i luksave se Tok blong God i save givhan bigwan long man. Hem i raetem se: “Evriwan we oli savegud Baebol, oli kasem gudfala edukesen. . . . Long tingting blong mi, sipos wan man i save Baebol be hem i no go long haeskul, hemia i moa gud i winim we hem i go long haeskul be i no save Baebol.”

?Yu Mas Mekem Wanem Blong Skul Ya i Givhan Fulwan LonYu?

Full-page picture on page 4

Yu we yu jes joen long skul ya, yu mas traehad sipos yu wantem we Tiokratik Skul i givhan long yu fulwan. Aposol Pol i talem long Kristin fren blong hem, Timoti, se: “Yu mas mekem ol wok ya, mo yu mas putum tingting blong yu i stap strong blong mekem olgeta samting ya, blong bambae olgeta man oli save luk we yu stap gohed gud long laef blong yu mo long wok blong yu.” (1 Tim. 4:15) ?Yu save mekem wanem blong folem advaes ya?

I gud yu traehad blong kam long Tiokratik Skul evri wik. Yu mas yusum gud buk ya, Tiokratik Skul i Save Givhan Long Yu Long Wok Blong God. Yu save raetem nem blong yu long fas pej blong buk ya, long ples we oli makem se i blong nem blong yu. Mo yu mas karem buk ya wetem yu taem yu kam long Tiokratik Skul evri wik. Yu save raetem ol not tu insaed long buk ya. Taem yu ridim wan impoten poen we yu ting se bambae i givhan long yu, i gud yu putum wan mak long poen ya. Yu save yusum spes we i stap long ol pej, blong raetemdaon sam save we yu lanem long skul ya mo we yu save yusum.

Taem yu stap rerem Tiokratik Skul evri wik, i gud yu tingbaot se Baebol nao i impoten buk we yumi stap stadi long hem. Bifo long ol narafala samting, i gud yu ridim olgeta japta blong Baebol we oli stap long program blong wik. Sipos yu ridim ol save we ol defren tok long miting ya oli stanap long hem, samting ya tu bambae i givhan bigwan long yu.

Long sam tok long skul ya, olgeta we oli stap lesin oli gat janis blong givim ansa. Yu mas yusum gud janis ya. Taem yu givim ansa long miting, hemia i save givhan long yu blong yu rimemba ol samting we yu stap lanem, mo blong yu mekem i wok long laef blong yu.

Olgeta we oli joen long Tiokratik Skul bambae oli gat janis blong givim tok mo mekem pleplei long fored blong kongregesen. Taem yu kasem wan tok no pleplei olsem, yu mas yusum janis ya blong traem kam gud moa. Yu mas traehad blong wok long poen we oli givim long yu. Bambae yu kasem advaes we i save givhan long yu blong yu gohed gud. Yu mas glad long advaes ya. Yu save raetemdaon long buk blong yu, ol spesel advaes we yu save folem blong kam gud moa. I no isi blong luksave ol poen we yu wan yu slak long olgeta. Taswe, ol gudfala advaes ya we oli givim long kaen fasin, mo we i stanap long Baebol, bambae i givhan bigwan long yu blong yu gohed gud. Samting ya i tru tu long olgeta we oli joen long skul ya plante yia finis.—Prov. 1:5.

?Yu yu wantem gohed kwiktaem? Sipos yes, yu wan yu mas mekem sam samting. Bifo long miting, i gud yu stadi long ol save we bambae i kamaot long ol tok long Tiokratik Skul. Ale, sipos wan long olgeta we i mas givim tok i no kam long miting, bambae yu yu rere finis blong tekem ples blong hem. Samting ya bambae i givim plante moa janis long yu blong mekem ol tok. Taem narafala i givim tok, yu mas lesin gud long fasin blong hem blong eksplenem ol save. Yumi save lanem plante samting long ol narafala.

Sipos yu gat taem, yu save stadi yu wan long olgeta haf blong buk ya. Hemia i save givhan long yu blong yu gohed kwik moa. Afta we yu kasem save gud long japta 2 kasem 16, yu save gohed long haf ya we i stat long pej 78, “Trening Blong Kam Gud Moa Long Fasin Blong Toktok Mo Tijim Man.” Fastaem, i gud yu stadi long ol poen ya, mo yu trenem yu wan long ol samting we oli tokbaot. Taem yu stap prij, yu traem folem ol samting we yu lanem. Hemia i save givhan long yu blong yu kam gud kwiktaem long fasin blong toktok mo blong tijim ol narafala long Tok blong God.

Tiokratik Skul bambae i rerem yu blong yu mekem samting we i impoten moa i winim ol narafala samting long laef. Yumi stap laef from we God nao i wantem olsem. Taswe sipos yumi yusum laef blong yumi blong presem Hem, hemia i soemaot se yumi kasem save long risen from wanem yumi stap laef. I stret nomo we ol man oli mas mekem bes blong olgeta blong presem Jehova God. (Rev. 4:11) Trening we yumi kasem long skul ya i blong givhan long yumi blong mekem samting ya. Olsem nao, tingting blong yumi bambae i klia gud, bambae yumi mekem ol samting we i waes, mo bambae yumi toktok gud long ol man blong talemaot ol nambawan trutok we oli stap long Baebol.

OL GUDFALA SAMTING LONG SAED BLONG SKUL YA

  • Hem i wan program we yu folem evri wik, blong rid, stadi, mo lukaot moa save long Baebol

  • Hem i save tijim yu blong yu rid gud long fored blong ol man, yu toktok gud, mo yu naf blong tijim narafala

  • Hem i save trenem yu blong yu joen gud wetem ol narafala blong storian

  • Hem i save trenem yu blong yu givim tok long fored blong kongregesen

  • Hem i rod blong yu wan yu kasem advaes blong yu save kam gud moa

SKUL YA I SAVE GIVHAN LONG YU BLONG . . .

  • Lesin gud

  • Rimemba ol samting we yu lanem

  • Rid gud

  • Stadi

  • Lukaot moa save

  • Skelem ol save mo putum long stret ples long tok blong yu

  • Storian gud

  • Ansarem ol kwestin

  • Raetemdaon ol tingting blong yu

OL STAMBA SAVE BLONG GIVHAN MOA LONG YUMI

I no isi blong toktok gud mo blong mekem se narafala i kasem save long tingting blong yumi. Sam man nomo oli gud long fasin ya. Ol man oli wokem fulap buk blong givhan long ol narafala blong oli gat fasin ya. Be God we i mekem olgeta samting, hem nao i mekem se man i save toktok. Taswe, hem i gat moa save long fasin blong toktok mo blong tijim man i bitim ol narafala tija long wol. Pikinini blong hem, wan nomo we hem i gat, i bin wok wetem hem olsem Nambawan Man blong Wok. Tufala ya nao i wokem bren blong man mo ol haf blong bodi we yumi yusum blong toktok, wetem ol nambawan samting raonabaot long yumi.

Taem God i mekem ol enjel mo ol man, Pikinini blong hem i wok olsem Tok blong Hem. Hem i stamba Man we God i yusum blong givimaot tijing blong hem. (Prov. 8:30, NW; Jon 1:1-3, NW) God i sanem Pikinini blong hem i kam long wol ya, nao hem i karem nem ya Masta Jisas Kraes. Baebol i talem se: “Ol man oli sapraes tumas long tok blong hem.” Mo sam man we oli lesin long hem oli talem se: “!I no gat man we i save tok olsem man ya!” (Mat. 7:28; Jon 7:46) Bitim 40 taem, ol Gospel oli kolem Jisas se Tija, mo i stret nomo we oli talem olsem. Yumi save lanem fulap samting long fasin blong hem blong toktok mo blong tijim ol man.

Baebol i tokbaot ol man mo woman we oli gat ol defdefren fasin, we Jehova God i yusum olgeta blong oli mekem wok blong hem. Sam long olgeta oli talemaot ol sot mesej nomo, be ol mesej ya oli strong. I gat samfala nomo we oli toktok long fored blong plante man. Be olgeta evriwan oli holemstrong long wok ya blong talemaot tru God mo stamba tingting blong hem. I luk olsem we bighaf blong olgeta ya oli no save toktok gud, be nating, God i blesem olgeta taem oli traehad. Baebol i talem plante samting long saed blong wok blong prij we oli mekem, mo ol tok ya i save tijim yumi.—Sam 68:11.

I tru, Baebol i no wan buk blong tijim yumi blong toktok gud long fored blong ol man. Be i gat plante gudfala save long Baebol blong givhan long yumi blong toktok gud mo blong tijim gud narafala. Taem yumi ridim Baebol, i gud yumi traem faenem ol save ya. Buk ya Tiokratik Skul i Save Givhan Long Yu Long Wok Blong God, i save halpem yumi blong gohed moa long saed ya.

    Ol buk long Bislama (1987-2026)
    Logaot
    Login
    • Bislama
    • Serem
    • Setemap Olsem Yu Wantem
    • Copyright © 2025 Watch Tower Bible and Tract Society of Pennsylvania
    • Ol Rul
    • Privacy Policy
    • Privacy Settings
    • JW.ORG
    • Login
    Serem